JOSHUA 2 - BUKUIT NE TILIL

Komi segeik aeng’ Jeriko

¹ Kiiyokto Josua weritab Nun bik aeng’ eng’ Sitim koba eng’ ung’ot kosegei emet, kolenji, Oba ogeer emet, ak Jeriko. Kiba anyun ichek, ak kiit gotab chepkugoniot, ne ki kainennyi ko Rahab, ak kiruiyo yoto.

² Ak kigimwachi laitoriatab Jeriko kelenji, Keero, kait olito kemouni murenikab lagokab Israel, kobwa kosegei emet.

³ Kiiyokto anyun laitoriatab Jeriko bik kobwa oldab Rahab, koba kolenji, Imutu bichu kobwanjin kobwa sang’, che kabwa gong’ung’: amu kabwa kosegei emet tugul.

⁴ Kiimut anyun kobogoriondonoto bichoto aeng’ kouny; ak kole, Ee, kabwanja bichoto, ago ma anai ole kabunu:

⁵ ak kingo negit koit sait ne kigere ormarichet, ye kiga koimen, komanda bichoto: amangen ole kaba: osub ochakte; amu omuchi onam.

⁶ Ago kiga imut inendet ichek koba got barak, ak kotuge mabutek, che kiga tet komie eng’ got barak.

⁷ Koba anyun bichoto kole kosub eng’ oret ne wendi ainetab Jordan kot koit tabarwek ole landoe bik: ak ne matianit ko kata kobendi bichoto kiisubi ichek, keger ormarichet.

⁸ Ak ye kitom koruiyo, kotogosta kobogoriondonoto kwo ole mi ichek eng’ got barak;

⁹ ak kolenji bichoto, Angen ale kigonok Jehovah emoni, ak kigobutyech kamuiseng’wong’, ak begu kowoi bik tugul che bo emoni eng’ taing’wong’.

¹⁰ Amu kigegas ole kiiyaamnda Jehovah beekab Nyanjet ne Birir eng’ taing’wong’, ye kiobwane eng’ Misri; ak kit ne kioite laitorinik aeng’ che bo Amorik, che kimi Jordan bitonin, agot Sihon ak Og, che kiobar ogesu.

¹¹ Ak kingegas agobo noto, komeiyo mugulelwekyok, amata kong’et nyiganatet eng’ chi age tugul, amu okwek: amu Jehovah Kamuktaindeng’wong’, ko Kamuktaindent eng’ barak kipsengwet ak eng’ ng’ony.

¹² Ara anyun, asaok ale, oyosiewa eng’ Jehovah, amu kayaiywok ne mie, oyachi ne mie ak okwek gotab baba, ak ogona kaborunet ne bo iman:

¹³ amat obar baba, ak kamennyu, ak tupchosiekyuk, che murenik, ak che tibik, ak tugukwak tugul, ak osoru sobonwekyok eng’ meet.

¹⁴ Kolenji bichoto inendet, Igeeri sobonwekwok sobonwekyok, ngot ko mong’ande boisioninyo; ak ye tun konech Jehovah emet, keyaun ne mie ak ne bo iman.

¹⁵ Kichortae anyun ichek tirisiet eng’ rogoet: amu kimi gonnyi irimetab nganaset barak, ak kimenyei irimonoto barak.

¹⁶ Ak kilenji ichek, Oba tulwet, si manyoruok bik che cheng’otok; ak oung’ge eng’ yoto betusiek somok, agoi koweek bik che cheng’otok: ak ye ibata, obe bandang’wong’.

¹⁷ Ak kilenji bichoto inendet, Manamech ng’ogistab kayosioning’ung’ kesimjech kiyosieun.

¹⁸ Keero, ye kiitu emoni iratyi borowoni birir tirisiet ne kechortaenech: ak iyum kobwa go kwandang’ung’ ak komet, ak tupchosieguk, ak bik tugul che bo gotab kwandang’ung’.

¹⁹ Ak chi age tugul ne mandoi eng’ kurgetab gong’ung’ kowendi oret, kotebe korotikyik metinnyi, ak manamech ng’ogisto: ak chi age tugul ne omi tugul eng’ go, kotebe korotikyik metowekyok, ngot kotwa chi inendet.

²⁰ Ago ngot ing’ande boisioninyo ko manamech ng’ogistab kayosieng’ung’, ne kesimjech kiyosieun.

²¹ Ak kile inendet, Ingoyaak ko u ng’alekwok. Ak kiunda koba, koba anyun: koratyi anyun borowet ne birir tirisiet.

²² Kiba anyun bichoto, agoi tulwet, ak kotebe oloto betusiek somok, agoi koweek bichoto kiisubi ichek: ak kicheng’at ichek bichoto kiisubi eng’ oret tugul, ago manyor.

²³ Koweek anyun bichoto aeng’u kochortagei eng’ tulwet, koba kolanda, kot koit ole mi Josua weritab Nun; ak kimwachi inendet tuguk che kinyor agobo ichek.

²⁴ Ak kilenji bichoto Josua, Iman kigonde Jehovah emet tugul eunekyok; ak ne siirei noto, kobegu kowoi bikab emonoto eng’ tainnyo.