JOSHUA 19 - BUKUIT NE TILIL

Barbarekab ortinwek alak

¹ Ak kinyo barbariatab aeng’ ne bo Simeon, ne bo bororietab lagokab Simeon ko u ortinwekwak: ak kimi borotenywa kwenutab borotetab lagokab Juda.

² Ak kisich koek borotenywa Beer-seba, anan ko Sheba, ak Molada;

³ ak Hasarsual, Bala, ak Esem;

⁴ ak Eltolat, Betul, ak Horma;

⁵ ak Siklag, Bet-markabot, ak Hasar-susa;

⁶ ak Bet-lebaot, ak Saruen; nganasok taman ak somok koboto nganasokwak che mengechen:

⁷ Ain, Rimon, Eter, ak Asan; nganasok ang’wan koboto nganasokwak che mengechen,

⁸ ak nganasok tugul che mengechen che kiyiem nganasochuto agoi Balat- beer, Rama ne bo Murot ne bo Tai. Nito ko borotetab bororietab lagokab Simeon ko u ortinwekwak.

⁹ Kibun borotetab lagokab Simeon kebebertab lagokab Juda: amu ki o kebebertab Juda kosiir ichek: kisich anyun lagokab Simeon borotet eng’ kwenutab borotenywa.

¹⁰ Ak kibiit barbariatab somok eng’ lagokab Sebulun ko u ortinwekwak: ak kiit borotetab kiwotenywa Sarik:

¹¹ ak kitogosta kiwotenywa kotokyigei cherongo, kot koit Marala, ak kiit Dabeset; ak kiit ainet ne mi taitab Jokneam;

¹² ak kiweek eng’ Sarik kotokyigei kong’asis, kotokyigei ole chorune asista, kot koit kiwotetab Kislot-tabor; ak kimong’ji Daberat, ak kitogosta kwo Japia;

¹³ ak kisiirto kong’eete yoto kotokyigei kong’asis kwo Get-eper, agoi Et- kasin; ak kiwa eng’ Rimon ne kichulak kot koit Nea;

¹⁴ ak kiyiem kiwotet emonoto eng’ katam kwo Anaton: ak kimong’ji kiwotennyi, atebwetab Ipta-el;

¹⁵ ak Katat, ak Naalal, ak Simron, ak Idala, ak Bet-lehem: nganasok taman ak aeng’ koboto nganasokwak che mengechen.

¹⁶ Nito ko borotetab lagokab Sebulun ko u ortinwekwak, nganasochuto koboto nganasokwak che mengechen.

¹⁷ Ak kimong’ barbariatab ang’wan ne bo Isakar, ne bo lagokab Isakar ko u ortinwekwak.

¹⁸ Ak kiit kiwotenywa Jesreel, Kesulot, ak Sunem;

¹⁹ ak Aparaim, Shion, ak Anaarat;

²⁰ ak Rabit, Kision, ak Ebes;

²¹ ak Remet, En-ganim, En-hada, ak Bet-pases;

²² ak kiit kiwotet Tabor, Saasuma, ak Bet-semes; ak kimong’ji kiwotenywa Jordan: nganasok taman ak lo koboto nganasokwak che mengechen.

²³ Nito ko borotetab bororietab lagokab Isakar ko u ortinwekwak, nganasok koboto nganasokwak che mengechen.

²⁴ Ak kimong’ barbariatab mut ne bo bororietab lagokab Aser ko u ortinwekwak.

²⁵ Ak kiwotenywa ko ki Helkat, Ali, Beten, ak Aksap;

²⁶ ak Alamelek, Amad, ak Misal; ak kiit Karmel ole tokyingei cherongo, ak kwo Sihor-libnat;

²⁷ ak kiweek kotokyigei ole chorune asista agoi Bet-dagon, ak koit Sebulun, ak agoi atebwetab Ipta-el kotokyigei murot ne bo katam kwo Bet-emek, ak Neiel, ak komong’ji Kabul eng’ eutab katam,

²⁸ ak Hebron, Rehob, Haman, ak Kana, kot koit Sidon ne o;

²⁹ ak kiweek kiwotet kwo Rama, ak kwo nganasetab Turo ne kiging’ot ak kiweek kiwotet kwo Hosa; ak kimong’ji kiwotennyi nyanjet eng’ emetab Aksib;

³⁰ Uma agine, Apek, ak Rehob: nganasok tiptem ak aeng’ koboto nganasokwak che mengechen.

³¹ Nito ko borotetab bororietab lagokab Aser ko u ortinwekwak, nganasochuto koboto nganasokwak che mengechen.

³² Ak kimong’ barbariatab lo ne bo lagokab Naptali, ne bo lagokab Naptali ko u ortinwekwak.

³³ King’eete kiwotenywa Helep, eng’ ketit ne kimi Saananim, ak Adaminekeb ak Jabneel, agoi Lakum, ak kimong’ji kiwotennyi Jordan:

³⁴ ak kiweek kiwotet kotokyigei cherongo kwo Asnot-tabor, ak kiwa Hukok kong’eete yoto; ak kiit Sebulun eng’ murot ne bo tai, ak kiit Aser eng’ cherongo, kot koit Juda eng’ Jordan ne tokyingei ole chorune asista.

³⁵ Nganasok che kiga king’ot ko Sidim, Ser, ak Amat, Rakat, ak Kineret;

³⁶ ak Adama, Rama, ak Hasor;

³⁷ ak Kedes, Edrei, ak En-hasor;

³⁸ ak Iron, Migdal-el, Horem, Bet-anat, ak Bet-semes; nganasok taman ak sogol ak nganasokwak che mengechen.

³⁹ Nito ko borotetab bororietab lagokab Naptali ko u ortinwekwak, nganasok koboto nganasokwak che mengechen.

⁴⁰ Ak kimong’ barbariatab tisab ne bo bororietab lagokab Dan ko u ortinwekwak.

⁴¹ Ak kiwotetab borotenywa ko ki Sora, Estaol, ak Ir-semes;

⁴² ak Saalabin, Aijalon, ak Itla;

⁴³ ak Elon, Timna, ak Ekron;

⁴⁴ ak Elteke, Gibeton, ak Baalat;

⁴⁵ ak Jeud, Bene-berak, ak Gat-rimon;

⁴⁶ ak Mejarkon, ak Rakon, koboto kiwotet ne tokyingei Jopa.

⁴⁷ Ak kiwa kiwotetab lagokab Dan kosiirto, amu kitogosta lagokab Dan kobargei ak Lesem, ak kiluul, ak kobar eng’ rotwetab chok, ak konam emet kobunji, ak komeny oloto, ak kiguure Lesem, Dan, komwaitae kainetab Dan kwandanywa.

⁴⁸ Nito ko borotetab bororietab Dan ko u ortinwekwak, nganasochuto ak nganasokwak che mengechen.

⁴⁹ Koges anyun pcheetab emet koek borotet eng’ kiwotosiekyik; ak kiigochi lagokab Israel Josua weritab Nun borotet eng’ kwenunywa:

⁵⁰ kiigochi nganaset ne kiga som ko u ng’atutietab Jehovah, Timnatsera eng’ emetab tulonok ne bo Epraim: ak kiteech nganaset ak komeny.

⁵¹ Chuto ko borotosiek che kipchei eng’ barbarek Eleasar tisiindet, ak Josua weritab Nun, koboto che eechen eng’ gorikab kwanisiek, che bo bororiosiekab lagokab Israel, kipchei eng’ Silo koek borotet eng’ taitab Jehovah, eng’ kurgetab emait ne kituiyechin. Kiiges anyun pcheetab emet.