JOSHUA 18 - BUKUIT NE TILIL

Kepcheitoi emet ne king’et

¹ Ak kiiyumgei tuiyet tugul ne bo lagokab Israel eng’ Silo, ak koteech eng’ oloto emait ne kituiyechin: ak kiga kiterter emonoto eng’ tainywa.

² Ak king’et eng’ lagokab Israel bororiosiek tisab che kitom kopchei borotenywa.

³ Ak kilenji Josua lagokab Israel, Ogaige kot kotianit si onam emet, ne kigonok Jehovah Kamuktaindetab kwanisiekwok?

⁴ Olewenjige bik somok eng’ bororiet age tugul: si ayokto ichek, kong’eetyo kobendat eng’ emet, si kosir ko u ole teptoi borotenywa; ak kobwa ole ami.

⁵ Ak kopchei koek kebeberwek tisab; tebe Juda kiwotennyi eng’ murot ne bo tai, ak tebe Josep kiwotenywa eng’ murot ne bo katam.

⁶ Ak osir emonoto koek kebeberwek tisab, yeityo oibwa siranato: si aserjinewok barbarek eng’ taitab Jehovah Kamuktaindennyo.

⁷ Amu matinyei Lawik kebeberta eng’ kwenung’wong’; amu tiseinatetab Jehovah ko borotenywa: ak kigosich Gad ak Reuben ak kebebertab bororietab Manase borotenywa, eng’ Jordan bitonin bo kong’asis, ne kiigochi Musa otwogindetab Jehovah.

⁸ Ak king’eetyo bik ak koba: ak kiiyomis Josua bik che kiga ba kosir emet, kole, Oba obun emet, ak osir, si obwa kogeny ole ami, ak aserjinewok barbarek eng’ yu eng’ taitab Jehovah eng’ Silo.

⁹ Kiba anyun bichoto kobun emet, ak kosirji bukuit kobee nganasok koek kebeberwek tisab, ak kibwa ole mi Josua eng’ nganaset eng’ Silo.

¹⁰ Ak kiser Josua barbarek agobo ichek eng’ Silo eng’ taitab Jehovah: Ak kipchechi Josua emet lagokab Israel ko u pcheutikwak eng’ oloto.

Barbariatab Benjamin

¹¹ Ak kibiit bororietab lagokab Benjamin ko u ortinwekwak: ak kiwa kiwotetab barbariandenywa kwenutab lagokab Juda ak lagokab Josep.

¹² Ak king’eete kiwotenywa ne bo komostab katam Jordan; ak kitogosta kiwotenywa kobun tabandab Jeriko eng’ murot ne bo katam, ak kotogosta kobun emetab tulonok kotokyigei cherongo; ak kimong’ji kiwotenywa ong’atetab Bet-aben.

¹³ Ak kiwa kiwotet eng’ oloto agoi Lus, agoi tabandab Lus (noto ko Bet- el), kotokyingei murot ne bo tai; ak kichortagei kiwotet kot koit Atarot- adar, kobun tulwet ne mi komostab tai ne bo Bet-horon ne mi ole rektoot.

¹⁴ Ak kigitil kiwotet keyiem komostab cherongo ole tokyingei murot ne bo tai kong’eete tulwet ne mi taitab Bet-horon ne tokyingei murot ne bo tai; ak kimong’ji kiwotennyi agoi koit Kiriat-baal (noto ko Kiriat-jearim), nganasetab lagokab Juda: nito ko ki komostab cherongo.

¹⁵ Ak king’eete murot ne bo tai tabandab Kiriat-jearim, ak kiwa kiwotet kotokyigei cherongo, komong’ji kondab beekab Neptoa:

¹⁶ ak kichortagei kiwotet agoi tabandab tulwet ne mi taitab atebwetab weritab Hinom, ne mi atebwetab Repaik ne tokyingei murot ne bo katam; ak kichortagei kwo atebwetab Hinom, kot koit tabandab Jebusindet ne tokyingei murot ne bo tai, ak kochortagei kwo En-rogelo;

¹⁷ ak kigitil kobun murot ne bo katam, komong’ji En-semes, kwo Gelilot, ne tokyindos ak ole kitogostoe kebendi Adumin; ak kochortagei agoi koitab Boan weritab Reuben;

¹⁸ ak kosiirto kobun tabanda ne tokyingei Araba murot ne bo katam, ak kochortagei kot koit Araba:

¹⁹ ak kiwa kiwotet kobun tabandab Bet-hogla kotokyigei murot ne bo katam: ak kimong’ji kiwotet ole kiluktoegei beek murot ne bo katam eng’ Araraita ne bo Munyuk, eng’ murot ne bo tai ye boch Jordan: nito ko ki kiwotet ne bo murot ne bo tai.

²⁰ Ak ki Jordan kiwotennyi eng’ komostab kong’asis. Nito ko ki borotetab lagokab Benjamin ko u kiwotosiekyik che kiimut komoswek tugul, ko u ortinwekwak.

²¹ Nganasokab bororietab lagokab Benjamin ko u ortinwekwak ko ki Jeriko, Bet-hogla, ak Emek-kesis;

²² ak Bet-araba, Semaraim, ak Bet-el;

²³ ak Abim, Para, ak Opra;

²⁴ ak Keparamoni, Opni, ak Geba; nganasok taman ak aeng’ koboto nganasokwak che mengechen:

²⁵ Gibeon, Rama, ak Beerot,

²⁶ ak Mispe, Kepira, ak Mosa,

²⁷ ak Rekem, Irpeel, ak Tarala;

²⁸ ak Selar, Elep, ak Jebusindet (noto ko Jerusalem), Gibeat, ak Kiriat; nganasok taman ak ang’wan koboto nganasokwak che mengechen. Nito ko borotetab lagokab Benjamin ko u ortinwekwak.