JOSHUA 17 - BUKUIT NE TILIL

Barbariatab werikab Josep: Manase

¹ Ak ni ko ki barbariatab bororietab Manase; amu ki taita ne bo Josep. Ko u Makir, ne ki taita ne bo Manase, kwandab Gilead, ko amu ki chi ne bo luget, ko kinyor anyun Gilead ak Basan.

² Ak kibunji barbariat lagokab Manase che king’et, ko u ortinwekwak; amu lagokab Abieser, ak lagokab Helek, ak lagokab Asriel, ak lagokab Sekem, ak lagokab Heper, ak lagokab Semida: chuto ko ki lagok che werik che bo Manase weritab Josep ko u ortinwekwak.

³ Ago kima sich werik Selopehad, weritab Heper, weritab Gilead, weritab Makir, weritab Manase, kisich tibik ichegei: chu ko kainaikab tibikyik, Mala, ak Noa, ak Hogla, Milka, ak Tirsa.

⁴ Ak kibwa korik taitab Eleasar tisiindet, ak taitab Josua weritab Nun, ak taitab bounik, ak kolenji, King’at Jehovah Musa kogonech borotet eng’ kwenutab tupchosiekyok: kiigochi anyun borotet eng’ kwenutab tupchosiekab kwandanywa, ko u ng’atutietab Jehovah.

⁵ Ak kisich Manase kebeberwek taman, koboto emetab Gilead ak Basan, ne mi Jordan bitonin;

⁶ amu kitinyei tibikab Manase borotet koboto werikyik: ak kibunji emetab Gilead werikab Manase che king’et.

⁷ Ak king’eete kiwotetab Manase Aser kot koit Mikmetat, ne itoorjingei Sekem; ak kibun kiwotet komostab tai, agoi koit ole menyei bikab En- tapua.

⁸ Ki bo Manase emetab Tapua: ago Tapua ne mi kiwotetab Manase ko ki bo lagokab Epraim.

⁹ Ak kichortagei kiwotet kwo ainetab Kana, komostab tai ne bo ainet: kibunji nganasochuto Epraim eng’ nganasokab Manase: ak kimi kiwotetab Manase komostab katam ne bo ainet, ak kimong’ji kiwotennyi nyanjet:

¹⁰ ki bo Epraim komostab tai, ki bo Manase komostab katam, ak ki nyanjet kiwotennyi; ak kiit Aser eng’ murot ne bo katam, agoi Isakar eng’ kong’asis.

¹¹ Ak kitinyei Manase eng’ Isakar ak eng’ Aser Bet-sean ak nganasokyik, ak Ibleam koboto nganasokyik ak che kimenyei Dor ak nganasokyik, ak che kimenyei Endor koboto nganasokyik, ak che kimenyei Taanak koboto nganasokyik, ak che kimenyei Megido koboto nganasokyik, komoswek somok che kiba barak.

¹² Ago kima imuch lagokab Manase koon che kimenyei nganasochoto; ago kimach mising’ Kananik komeng’is eng’ emonoto.

¹³ Ak ye kiga kogimegitu lagokab Israel, konde Kananik koyai boisionikab otwoknatet, ama on kogestagei.

¹⁴ Ak king’alalji lagokab Josep Josua, kolenji, Amu nee si igona barbariat agenge ak kebeberta agenge koek borotet, ak ingen ile a bororiet ne o, amu kigoberura Jehovah agoi rani?

¹⁵ Ak kilenji Josua ichek, Ngot ko i bororiet ne o, itogoste iwe osnet, ak ibatyige oldo eng’ emetab Perisik ak ne bo Repaik; amu mariich emetab tulonok ne bo Epraim eng’ inye.

¹⁶ Ak kimwa lagokab Josep kole, Mayamech emetab tulonok: ak kotinyei karisiekab karik Kananik tugul che menyei emetab atebwet, ichek che mi Bet-sean ak nganasokyik, ak ichek che menyei atebwetab Jesreel.

¹⁷ Ak king’alalji Josua gotab Josep, che Epraim ak Manase, kolenji, I bororiet ne o, ak itinye kimnatet: mesiche barbariat agenge kityo:

¹⁸ ago bunjinin emetab tulonok; amu nganda osnet, iswache, ak bunjinin ole boch: amu ione Kananik koba, nganda tinyei karisiekab karik, ak nganda kimen.