JOSHUA 16 - BUKUIT NE TILIL

Barbariatab werikab

¹ Ak kiibutyi barbariatab lagokab Josep Jordan eng’ Jeriko, eng’ beekab Jeriko eng’ kong’asis, ne ong’atet, kotogosta eng’ Jeriko kobun emetab tulonok kwo Bet-el;

² ak kiwa komanda eng’ Bet-el kwo Lus, ak kwo kosiirto kot koit kiwotetab Arikik agoi Atarot;

³ ak kwo kochortagei kotokyigei cherongo agoi kiwotetab Japletik, kot koit kiwotetab Bet-horon eng’ komosta ne rektoot, kot koit Geser; ak kimong’ji kiwotennyi nyanjet.

⁴ Ak kinam lagokab Josep, che ki Manase ak Eprain, borotenywa.

⁵ Ak ki u ni kiwotetab lagokab Epraim, ko u ortinwekwak: ak kiwotetab borotenywa ne kitokyingei kong’asis ko ki Atarotadar, kot koit Bet-horon barak;

⁶ ak kiwa kiwotet kotokyingei cherongo eng’ Mikmetat eng’ murot ne bo katam; ak kiyiemak kiwotet kotokyigei kong’asis kot koit Taanat-silo, ak kobun yoto eng’ kong’asis ne bo Janoa;

⁷ ak kichortagei eng’ Janoa kwo Atarot, agoi Nara, kot koit Jeriko, ak komanda eng’ Jordan.

⁸ Kiwa kiwotet kong’eete Tapua kobun cherongo kot koit ainetab Kana; ak kimong’ji kiwotennyi nyanjet. Nito ko borotetab bororietab lagokab Epraim ko u ortinwekwak;

⁹ koboto nganasok che kigitabanji lagokab Epraim eng’ kwenutab borotetab lagokab Manase, nganasok tugul koboto nganasokwak che mengechen.

¹⁰ Ago ma on Kanaik che kimenyei Geser: ago kimeny Kananik kwenutab Epraim, agoi rani, ak kiek otwogik che yaei boisionikab otwoknatet.