JOSHUA 15 - BUKUIT NE TILIL

Barbariatab Juda

¹ Ak barbariatab bororietab lagokab Juda ko u ortinwekwak ko kiibutyi kiwotetab Edom, agoi ong’atetab Sin ne tokyingei murot ne bo tai, eng’ tabanda ne bo murot ne bo tai.

² Kibochit kiwotenywa ne bo murot ne bo tai tabandab Araraita ne bo Munyuk, koboch nyanjet ne kiluktogei ne kitokyingei murot ne bo tai:

³ ak kibun murot ne bo tai ole kitogostoe kebendi Akrabik, kosiirto kot koit Sin, ak kotogosta kwo murot ne bo tai ne bo Kades-barnea, ak kosiirto kobun Hesron, ak kotogosta kwo Adar, ak koweek konyo Karka:

⁴ ak kisiirto kwo Asmon, ak kwo komandae ainetab Misri; ak kibochit kiwotonoto nyanjet; egu nito kiwoteng’wong’ ne bo murot ne bo tai.

⁵ Ak kiboch kiwotetab kong’asis Araraita ne bo Munyuk, agoi ole boch Jordan. Ak kiwotetab kebebertab murot ne bo katam ko kiboch nyanjet ne kiluktogei eng’ ole igesunegei Jordan:

⁶ ak kiwa kiwotet kot koit Bet-hogla, ak kosiirto kobun murot ne bo katam ne bo Bet-araba; ak kiwa kiwotet kot koit koitab Boan weritab Reuben:

⁷ ak kiwa kiwotet kot koit Debir kobun atebwetab Akor si kotokyigei murot ne bo katam, kootorjigei Gilgal, ne mi ole kitogostoe kebendi Adumim, ne mi murot ne bo tai ne bo ainet: ak kisiirto kiwotet kwo beekab En-semes, ak kimandae En-rogel:

⁸ ak kiwa kiwotet kobun atebwetab weritab Hinom agoi tabandab Jebusindet murot ne bo tai (noto ko Jerusalem): ak kiwa kiwotet agoi tulwet barak ne mi taitab atebwetab Hinom ne tokyingei cherongo, ne mi tabandab atebwet ne bo Repaik ne tokyingei murot ne bo katam:

⁹ ak kigitil kiwotet kong’eete tulwet barak kot koit kondab beekab Neptoa, ak komanda kwo nganasokab tulwetab Epron; ak kigitil kiwotet kotorjigei Baala (noto ko Kiriat-jearim):

¹⁰ ak kiweek kiwotet kong’eete Baala kotokyigei cherongo agoi tulwetab Seir, ak kosiirto kwo tabandab tulwetab Jearim eng’ murot ne bo katam (noto ko Kesalon) ak kochorjigei Bet-semes, ak kosiirto kobun ole negite Timna:

¹¹ ak kimanda kiwotet kwo tabandab Ekron murot ne bo katam: ak kigitil kiwotet kotorjigei Sikeron, ak kosiirto kwo tulwetab Baala, ak kwo komanda eng’ Jabneel: ak kimong’ji kiwotet nyanjet.

¹² Ak kiwotet ne bo cherongo ko ki nyanjet ne o, ak ngegunnyi. Nito ko kiwotetab lagokab Juda ne kiyiemayiem ichek ko u ortinwekwak.

¹³ Ak kiigochi Kaleb weritab Jepune kebeberta eng’ kwenutab lagokab Juda, ko u ng’atutietab Jehovah ne kimwachi Josua, noto ko Kiriat-arba, kwandab Anak (noto ko Hebron).

¹⁴ Ak kion Kaleb eng’ oloto werik somok che bo Anak, Sesai, ak Ahiman, ak Talmai, lagokab Anak.

¹⁵ Ak kitogosta eng’ oloto kwo kobargei ak che kimenyei Debir: kainetab Debir eng’ tai ko ki Kiriat-seper.

¹⁶ Ak kile Kaleb, Inendet ne barei Kiriat-seper, ak konam, agochini Aksa cheptanyu kotun.

¹⁷ Ak kinam Otniel weritab Kenas, ng’etab kametab Kaleb, nganasanato, ak kiigochi inendet Aksa cheptanyi kotun.

¹⁸ Ak ye kingoit ole mi inendet, komwachi eng’ kagiiletab ge kosom kwandanyi koret: ak kichorgei anyun eng’ sigiriennyi; ak koteebe Kaleb kolenji, Imache nee?

¹⁹ Ak kimwa kole, Kona kaberuret; amu kiindea emet ne bo Murot ne bo Tai, igona kong’ikab beek agichek. Ak kiigochi kong’ikab beek che bo meto, ak kong’ikab beek che mi ole rektoot.

²⁰ Ni ko borotetab bororietab lagokab Juda ko u ortinwekwak.

²¹ Ak nganasokab taban che bo bororietab lagokab Juda eng’ ole tokyingei kiwotetab Edom eng’ Murot ne bo Tai ko ki Kabseel, ak Eder, ak Jagur;

²² ak Kina, Dimona, ak Adada;

²³ ak Kedes, Hasor, ak Itnan;

²⁴ Sip, Telem, ak Bealot;

²⁵ ak Hasor-hadata, Keriot-hesron (noto ko Hasor);

²⁶ Amam, Sema, ak Molada;

²⁷ ak Hasar-gada, Hesmon, ak Bet-pelet;

²⁸ ak Hasar-sual, Beer-seba, ak Bisiotia;

²⁹ Bala, Iim, ak Esem;

³⁰ ak Eltolad, Chesil, ak Horma;

³¹ ak Siklag, Madmana, ak Sansana;

³² ak Lebaot, Silim, Ain, ak Rimon: nganasochoto tugul ko tiptem ak sogol, koboto nganasokwak che mengechen.

³³ Eng’ warenget, Estaol, Sora, ak Asna;

³⁴ ak Sanoa, En-ganim, Tapua, ak Enam;

³⁵ Jarmut, Adulam, Soko, ak Aseka;

³⁶ ak Saaraim, Aditaim, Gedera, ak Gederotaim; nganasok taman ak ang’wan koboto nganasokwak che mengechen.

³⁷ Senan, Hadasa, ak Migdalgad;

³⁸ ak Dilan, Mispe, ak Jokteel;

³⁹ Lakis, Boskat, ak Eglon;

⁴⁰ ak Kabon, Lamam, ak Kitlis;

⁴¹ ak Gederot, Bet-dagon, Naama, ak Makeda; nganasok taman ak lo koboto nganasokwak che mengechen.

⁴² Libna, Eter, ak Asan;

⁴³ ak Ipta, Asna, ak Nesib;

⁴⁴ ak Keila, Aksib, ak Maresa; nganasok sogol koboto nganasokwak che mengechen.

⁴⁵ Ekron, koboto nganasokyik ak nganasokyik che mengechen:

⁴⁶ koboch Ekron agoi nyanjet, tugul che kimi ole negite Asdod, koboto nganasokwak che mengechen.

⁴⁷ Asdod, nganasokyik ak nganasokyik che mengechen; Gasa, nganasokyik ak nganasokyik che mengechen; agoi ainetab Misri, ak nyanjet ne o, ak kiwotennyi.

⁴⁸ Ak eng’ emetab tulonok, Samir, Jatir, ak Soko;

⁴⁹ ak Dana ak Kiriat-sana, (noto ko Debir);

⁵⁰ ak Anab, Estemo, ak Anim;

⁵¹ ak Gosen, Holon, ak Gilo; nganasok taman ak agenge koboto nganasokwak che mengechen.

⁵² Arab, Duma, ak Esan;

⁵³ ak Janim, Bet-tapua, ak Apeka;

⁵⁴ ak Humta, Kiriat-arba (noto ko Hebron), ak Sior; nganasok sogol ak nganasokwak che mengechen.

⁵⁵ Maon, Karmel, Sip, ak Juta;

⁵⁶ ak Jesreel, Jokdeam, ak Sanoa;

⁵⁷ Kain, Gibea, ak Timna; nganasok taman koboto nganasokwak che mengechen.

⁵⁸ Halul, Bet-sur, ak Geder;

⁵⁹ Maarat, Bet-anot, ak Eltekon; nganasok lo koboto nganasokwak che mengechen.

⁶⁰ Kiriat-baal (noto ko Kiriat-jearim), ak Raba; nganasok aeng’ koboto nganasokwak che mengechen.

⁶¹ Eng’ ong’atet, Bet-araba, Midin, ak Sekaka;

⁶² ak Nibsan, ak Nganasetab Munyuk, ak En-gedi; nganasok lo koboto nganasokwak che mengechen.

⁶³ Ak kima imuch lagokab Juda koon Jebusik, che kimenyei Jerusalem: ago kimeny Jebusik ak lagokab Juda eng’ Jerusalem, agoi ra.