JOSHUA 14 - BUKUIT NE TILIL

Kepchechin borotosiek ortinwek sogol

¹ Chu ko borotosiek che kinam lagokab Israel eng’ emetab Kanan, che kipchechi ichek Eleasar tisiindet, ak Josua weritab Nun, koboto kandoikab gorik che bo bororiosiekab lagokab Israel,

² kipchei kosube barbarekab borotenywa, ko u ye king’at Jehovah eng’ eutab Musa, agobo bororiosiechoto sogol ak kebebertab oret.

³ Amu kiga kogochi Musa borotet bororiosiechoto aeng’ ak kebebertab bororiet eng’ Jordan bitonin: ago ma igochi Lawik borotet age tugul eng’ kwenunywa.

⁴ Amu ki bororiosiek aeng’ lagokab Josep, ichek ko ki Manase ak Epraim: ama igochi Lawik kebeberta eng’ emonoto, kobate nganasok che menyei, koboto korotinwek che agete tukwak ak ole nyorjin tugukwak.

⁵ Ko u ye kiga ng’at Jehovah Musa, ko kiyai lagokab Israel ko u noto, ak kipchei emet.

Kigochin Kaleb Hebron

⁶ Kirikta anyun lagokab Juda koba ole mi Josua eng’ Gilgal: ak kimwachi Kaleb weritab Jepune Kenisindet inendet, kolenji, Ingen kit ne kimwachi Jehovah Musa chitab Kamuktaindet agobo ane ak inye eng’ Kades-barnea.

⁷ Kia bo kenyisiek artam ye kiiyokwa Musa otwogindetab Jehovah eng’ Kades-barnea anyo asegei emet; ak kiaipchi inendet ng’olyot ko u ye kimi muguleldanyu.

⁸ Ago kiigochi tupchosiekyuk che kigitogostoi tugul mugulelwekab bik komeiyo: ago kiasub Jehovah Kamuktaindennyu eng’ kagesunatetab ge.

⁹ Ak kiiyosio Musa betunoto kole, Egu boroteng’ung’ iman ak tun bunjin lagoguk koigeny emet ne kitiech kelyeguk, amu kiisub Jehovah Kamuktaindennyu eng’ kagesunatetab ge.

¹⁰ Keer anyun-o, kigoriba Jehovah asob, ko u ye kimwa, kenyisiechu artam ak mut, koboch betut ne kimwachi Jehovah Musa ng’olyondoni, ye kingota kobendoti Israel eng’ ong’atet: ak nguno, keero, koboch ra, atinye kenyisiek tamanwogik sisiit ak mut.

¹¹ Agot rani ko a kim ko u eng’ betut ne kiiyoktaa Musa: kit ne ki u kimnatennyu eng’ betunoto, ko u noto kimnatennyu nguno, eng’ luget, awo, ak aweege.

¹² Noto anyun, kona tulwoni, ne kiga mwa Jehovah eng’ betunoto; amu kiigas eng’ betunoto ile kimi Anagik oloto, ak nganasok che eechen che ng’ototin: alen mi Jehovah kobota, si aon koba, ko u ye kimwa Jehovah.

¹³ Ak kiiberur Josua inendet; ak kiigochi Kaleb weritab Jepune Hebron koek borotennyi.

¹⁴ Kiek anyun Hebron borotetab Kaleb weritab Jepune Kenisindet agoi ra; amu kiisub Jehovah Kamuktaindetab Israel eng’ kagesunatetab ge.

¹⁵ Kainetab Hebron eng’ tai ko ki Kiriat-arba; ki chito ne o Arba kosiir tugul eng’ Anagik. Ak kiimuuny emet eng’ luget.