JOSHUA 13 - BUKUIT NE TILIL

Kebeberwekab emet che ma kiterter

¹ Ak kiga koosit Josua, kiga kotar kenyisiek che chang’; ak kimwachi Jehovah kolenji, Kaiositu ak kiitar kenyisiek che chang’, ago ta ko ng’etunot emet ne o ne nyolu kenam.

² Ni emet ne ta ko ng’etunot: komoswek tugul che bo Pilistik, ak Gesurik tugul;

³ koboch Sihor, ne mi taitab Misri, kot koit kiwotetab Ekron ne tokyingei murot ne bo katam, che kiityin Kananik: kiptainik mut che bo Pilistik; Gasaik, Asdodik, Askelonik, Gitik, Ekronik; ak Abik agichek,

⁴ eng’ murot ne bo tai: emet tugul ne bo Kananik, ak Meara ne bo Sidonik, kot koit Apek, agoi kiwotetab Amorik:

⁵ ak emetab Gebalik, ak Lebanon tugul, ne tokyingei ole chorune asista, koboch Baal-gad eng’ tulwetab Hermon kel kot koit ole kimandoe kebendi Hamat:

⁶ bik tugul che menyei emetab tulonok koboch Lebanon kot koit Misrepotmaim, agot Sidonik tugul; aone ichek koba eng’ taitab lagokab Israel: ago igochi Israel koek borotenywa, ko u ye kiang’atin.

⁷ Pchechi anyun emonito bororiosiechuto sogol ak kebebertab che bo Manase.

Emotinwekab ortinwek aeng’ che bo Israel

⁸ Kisich borotenywa bikab Reuben ak che bo Gad koboto inendet, ne kiigochi Musa ichek, eng’ Jordan bitonin ole tokyingei kong’asis, ko u ye kiigochi Musa ichek, otwogindetab Jehovah;

⁹ koboch Aroer, ne mi tabandab atebwetab Arnon, ak nganaset ne mi kwenutab atebwonoto, ak warenget tugul ne bo Medeba agoi Dibon;

¹⁰ ak nganasok tugul che bo Sihon laitoriatab Amorik, ne kilaitorani eng’ Hesbon, agoi kiwotetab lagokab Amon;

¹¹ ak Gilead, ak kiwotetab Gesurik ak Maakatik, ak tulwet tugul ne bo Hermon, ak Basan tugul agoi Saleka;

¹² bororiet tugul ne bo Og eng’ Basan, ne kilaitorani eng’ Astarot ak Edrei (inendet ko agenge eng’ Repaik che king’et); amu kibar chuto Musa ak koon.

¹³ Ago ma on lagokab Israel Gesurik, anan ko Maakatik: kimeny Gesurik ak Maakatik kwenutab Israel, agoi ra.

¹⁴ Bororietab Lawik kityo ne ma igochi borotet; borotenywa kagochinoikab Jehovah Kamuktaindetab Israel, che kigoitoi, kobun mat, ko u ye kimwachi inendet.

¹⁵ Ak kiigochi Musa bororietab lagokab Reuben ko u ortinwekwak.

¹⁶ Kiboch kiwotenywa Aroer, ne mi tabandab atebwetab Arnon, ak nganaset ne mi kwenutab atebwet, ak warenget tugul ne negite Medeba;

¹⁷ Hesbon, ak nganasokyik tugul che mi warenget; Dibon, ak Bamotbaal, ak Bet-baal-meon;

¹⁸ ak Jahas, ak Kedemot, ak Mepaat,

¹⁹ ak Kiriataim, ak Sibma, ak Seret-sahar eng’ tulwetab atebwet;

²⁰ ak Bet-peor, ak chepkeigeusiekab Pisga, ak Bet-jesimot;

²¹ ak nganasok tugul che bo warenget, ak bororiet tugul ne bo Sihon laitoriatab Amorik, ne kilaitorani eng’ Hesbon, ne kibar Musa koboto kiruogik che bo Midian, ak Ebi, ak Rekem, ak Sur, ak Hur, ak Reba, bounikab Sihon, che kimenyei emonoto.

²² Kibar lagokab Israel Balaam agine weritab Beor, orgoiyot, eng’ rotwetab chok, koboto che kigibar.

²³ Ak kiwotetab lagokab Reuben ko ki Jordan, ak kiwotennyi. Nito borotetab lagokab Reuben ko u ortinwekwak, nganasokwak che eechen ak che mengechen.

²⁴ Ak kiigochi Musa bororietab Gad, lagokab Gad, ko u ortinwekwak.

²⁵ Ak kiwotenywa ko ki Jaser, ak nganasok tugul che bo Gilead, ak kebebertab emetab lagokab Amon, agoi Aroer ne mi taitab Raba;

²⁶ ak koboch Hesbon kot koit Ramat-mispe, ak Betonim; ak koboch Maanaim kot koit kiwotetab Debir;

²⁷ ak eng’ atebwet, Bet-aram, ak Bet-nimra, ak Sukot, koboto Sapon, noto ne king’et eng’ bororietab Sihon laitoriatab Hesbon, ne ki Jordan kiwotennyi, kot koit ole boch tabandab araraita ne bo Kineret, Jordan bitonin ole tokyingei kong’asis.

²⁸ Nito ko borotetab lagokab Gad ko u ortinwekwak, nganasokwak che eechen ak che mengechen.

²⁹ Ak kiigochi Musa kebebertab bororietab Manase borotet: ak kibunji kebebertab bororietab Manase ko u ortinwekwak.

³⁰ Ak kiboch kiwotenywa Maanaim, Basan tugul, bororiet tugul ne bo Og laitoriatab Basan, ak nganasok tugul che bo Jair, che mi Basan, nganasok che eechen tamanwogik lo:

³¹ ak kebebertab Gilead, ak Astarot, ak Edrei, nganasok che eechen che bo bororietab Og eng’ Basan, kibunji chuto lagokab Makir weritab Manase, kebebertab lagokab Makir ko u ortinwekwak.

³² Chuto ko borotosiek che kipchei Musa eng’ warengosiekab Moab, Jordan bitonin, eng’ Jeriko ne tokyingei kong’asis.

³³ Ago ma igochi Musa bororietab Lawik borotet age tugul: Jehovah, Kamuktaindetab Israel, ko borotenywa, ko u ye kiga mwachi ichek.