JOSHUA 11 - BUKUIT NE TILIL

Keterteri Jabin ak laitorinik alak

¹ Ak kingogas Jabin laitoriatab Hasor, koyokto ng’olyo kwo oldab Jobab laitoriatab Madon, ak laitoriatab Simron, ak laitoriatab Aksap,

² ak laitorinik che kimi murot ne bo katam, eng’ emetab tulonok, ak eng’ Araba, murot ne bo tai eng’ Kinerot, ak eng’ warenget, ak eng’ baragusiekab Dor eng’ cherongo,

³ agoi oldab Kananik eng’ kong’asis, ak eng’ cherongo, koboto Amorik, ak Hitik, ak Perisik, ak Jebusik eng’ emetab tulonok, ak Hibik eng’ Hermon kel eng’ emetab Mispa.

⁴ Ak kimanda icheget ak lugosiekwak tugul, bik ng’isiat, che te ng’aniek che mi ngegutab nyanjet eng’ chang’indo, ak mbartanyisiek ak karisiek ng’isiat.

⁵ Ak kituiyo laitorinichuto tugul; ak kibwa ak koteech komosta agenge eng’ ye negite beekab Merom, si kobargei ak Israel.

⁶ Ak kilenji Jehovah Josua, Ameiyweisie amu ichek; agoitoi ichek tugul kebar eng’ taitab Israel mutai ko te ni asis: iebe kwarinikab mbartanyisiekwak, ak ibeel karisiekwak eng’ mat.

⁷ Konyo anyun Josua, koboto bik tugul che bo luget, koborio ak ichek eng’ ye negite beekab Merom koche, ak kobar.

⁸ Ak kiinde Jehovah ichek eunekab Israel, ak kibar, koon agoi Sidon ne o, kot koit Misrepot-maim, agoi atebwetab Mispe ole tokyingei kong’asis; ak kibar ichek kot ko ma bagakta agot agenge.

⁹ Ak kiyachi Josua ichek ko u ye king’at Jehovah: kieb kwarinikab mbartanyisiekwak, ak kobeel karisiekwak eng’ mat.

¹⁰ Ak kiweek Josua eng’ betunoto, ak konam Hasor, ak kobar laitoriandennyi eng’ rotwetab chok: amu ki ne o Hasor eng’ tai eng’ laitorinichato tugul.

¹¹ Ak kibar bik tugul che kimi nganasanato eng’ rotwetab chok, kobar koges: ma ng’et agot agenge ne kitinyei kabuset: ak kibeel Hasor eng’ mat.

¹² Ak kinam Josua nganasok tugul che bo laitorinichato, ak laitorinikwak tugul, ak kibar ichek eng’ rotwetab chok, kobar koges; ko u ye kiga ng’at Musa otwogindetab Jehovah.

¹³ Ago kima beel Israel nganasok che kitonondos eng’ tulonokwak, kobate Hasor kityo; kibeel noto Josua.

¹⁴ Ak kiib Israel tuguk tugul che bo nganasochuto, ak kokweri tuga koek chechuak; ago kibar chi age tugul eng’ rotwetab chok, kot koges, ama bagakta agot agenge ne kitinyei kabuset.

¹⁵ Ko u ye kiga ng’at Jehovah Musa otwogindennyi, ko king’at Musa Josua ko u noto: ak kiyai Josua ko u noto; ma bagakta kiy age tugul ne ma yai, eng’ tuguk tugul che king’at Jehovah Musa.

¹⁶ Kinam anyun Josua emonoto tugul, emetab tulonok, ak Murot tugul ne bo Tai, ak emet tugul ne bo Gosen, ak warenget, ak Araba, ak emetab tulonok, ne bo Israel, ak warengetab emonoto;

¹⁷ koboch tulwetab Halak, ne togostoi Seir, agoi Baal-gad eng’ atebwetab Lebanon tulwetab Hermon kel: ak kinam laitorinikwak tugul, ak kokwerot kobar.

¹⁸ Kiyai Josua luget eng’ betusiek che chang’ koboto laitorinichato.

¹⁹ Ma biit nganaset agot agenge ne kiyai kalyet ak lagokab Israel, kobate Hibichoto kimenyei Gibeon: kinam tugul eng’ luget.

²⁰ Amu ng’olyotab Jehovah ne kiiuuiit mugulelwekwak, si kobargei ak Israel eng’ luget, si kobiit kong’em ichek koges, si ma kirire ichek, ago si kobiit kobar, ko u ye kiga ng’at Jehovah Musa.

²¹ Ak kinyo Josua eng’ betusiechoto kobar Anagik kobetyo eng’ emetab tulonok, eng’ Hebron, ak Debir, ak Anab, ak eng’ emet tugul ne bo tulonok ne bo Juda, ak eng’ emet tugul ne bo tulonok ne bo Israel: kibar Josua ichek kogesgei koboto nganasokwak.

²² Ma ng’et agot agenge eng’ Anagichato eng’ emetab lagokab Israel: kobate eng’ Gasa kityo, ak eng’ Gat, ak eng’ Asdod, che king’etune bichoto.

²³ Kinam anyun Josua emet komugul, ko u tugul che kiga mwachi Jehovah Musa; ak kiigochi Josua emonoto Israel koek borotenywa ko u pcheutikwak eng’ bororiosiekwak. Kiimuuny anyun emet eng’ luget.