JOSHUA 10 - BUKUIT NE TILIL

Kiterteri laitorinik mut eng’ Bet-horon, ak kebarei

¹ Ak kingogas Adoni-sedek laitoriatab Jerusalem kole kigonam Josua Ai, ak kong’em koges; ko u ye kiga yachi Jeriko ak laitoriandennyi, koyachi ko u noto Ai ak laitoriandennyi; ak ko u ye kiyai kalyet bikab Gibeon ak Israel, ak komi kwenunywa;

² koiywei mising’, amu ki nganaset ne o Gibeon, ko u age eng’ nganasokab kaplaitoriat, ak amu ki o kosiir Ai, ak ki kimen murenik tugul che bo nganasanato.

³ Koyokto anyun Adoni-sedek laitoriatab Jerusalem, Hoam laitoriatab Hebron, ak Piram laitoriatab Jarmut, ak Japia laitoriatab Lakis, ak Debir laitoriatab Eglon, kolenji,

⁴ Otogosu oldanyu, obwa otoreta, kebar Gibeon: amu kigoyai kalyet ak Josua ak lagokab Israel.

⁵ Kiiyumgei anyun laitorinik mutu che bo Amorik, laitoriatab Jerusalem, ak laitoriatab Hebron, ak laitoriatab Jarmut, ak laitoriatab Lakis, ak laitoriatab Eglon ak kotogosta, ichek ak lugosiekwak tugul, ak koteech taitab Gibeon, ak kobargei ak nganasanato.

⁶ Kiiyokto bikab Gibeon Josua eng’ nganaset eng’ Gilgal, kolenji, Amebagakte otwogiguk; nyo togosu ichogu, ak isoruech, ak itoretech: amu kagoyumjeigei laitorinik tugul che bo Amorik che menyei emetab tulonok.

⁷ Kitogosta anyun Josua eng’ Gilgal, inendet ak bik tugul che bo luget, koboto murenik tugul che kimen che nyigonen.

⁸ Ak kilenji Jehovah Josua, Ameiywei ichek: amu kande ichek euneguk; mami chi eng’ ichek ne imuchi kotonon eng’ taing’ung’.

⁹ Kiche anyun Josua ichek; amu kitogosta eng’ Gilgal kemout komugul.

¹⁰ Kiiyesta Jehovah ichek eng’ taitab Israel, ak kobar ichek eng’ baret ne o eng’ Gibeon, ak koon kobun oret ne togostoi Bet-horon, ak kobarat kot koit Aseka, ak Makeda.

¹¹ Ak ye kingomwei eng’ taitab Israel, ye kichortaegei Bet-horon, kowir Jehovah ichek eng’ koik che eechen che bunu kipsengwet kot koit Aseka, ak kibek; ki chang’ che kibek eng’ koikab ropta kosiir che kibar lagokab Israel eng’ rotwetab chok.

¹² King’alalji anyun Josua Jehovah eng’ betut ne kiigoito Jehovah Amorik eng’ taitab lagokab Israel; ak kimwa eng’ taitab lagokab Israel, kole, “Ee Asisi, tonon eng’ Gibeon; Ak inye Arawet, itelel eng’ atebwetab Aijalon.”

¹³ Ak kitonon asista, ak mata kwo arawet, Kot koyaaktochigei mugetut bororiet eng’ bunikwak. Tos ma kisirji nito bukuitab Jasar? Ak kitonon, mata kwo asista eng’ kwenutab kipsengwet, mata kwo, ama chakta kororokta ne te betut komugul.

¹⁴ Ak kitom kobiitu betut ne u noto eng tai amata kobiit eng’ let, ne kigas Jehovah kutitab chi: amu kiyai Jehovah luget agobo Israel.

¹⁵ Kiweek Josua anyun, koboto Israel tugul, koba nganaset eng’ Gilgal.

¹⁶ Kimwei anyun laitorinichoto mutu, ak kounygei eng’ kebenet eng’ Makeda.

¹⁷ Ak kigimwachi Josua kelenji, Kagenyor laitorinichato mut, kounyegei eng’ kebenet eng’ Makeda.

¹⁸ Kole Josua anyun, Omilji koik che eechen kurgetab kebenet, ak onde bik yoto korib:

¹⁹ amat otebi okweget; oon bunikwok, ak obar che mi let; amat ochamji koba nganasokwak orit: amu kagonde Jehovah Kamuktaindeng’wong’ eunekwok.

²⁰ Ak kingo kagobar Josua ak lagokab Israel ichek koges eng’ baret ne o mising’, kot kogesgei, ak koba che king’et nganasok che ng’ototin,

²¹ koweek anyun bik tugul eng’ kalyet koba nganaset ole mi Josua eng’ Makeda: ma biit chi ne kitwek komwa ng’olyot ne ya agobo lagokab Israel.

²² Komwa Josua anyun, kole, Oyat kurgetab kebenet, yeityo omoong’u laitorinichoto mut eng’ kebenet, ak omutwa.

²³ Ak kiyai ko u noto, ak kiimutyi inendet laitorinichato mut, laitoriatab Jerusalem, laitoriatab Hebron, laitoriatab Jarmut, laitoriatab Lakis, ak laitoriatab Eglon.

²⁴ Ak kingo kagomutyi Josua laitorinichato, koguur Josua murenik tugul che bo Israel, ak komwachi bounikab luget che kiga ba koboto inendet, kolenji, Obwa origu, onde kelyekwok kaatwekab laitorinichu. Kobwa anyun korik, ak konde kelyekwak kaatwekab bichoto.

²⁵ Ak kilenji Josua ichek, Amoiywei, anan otoptoben; ogimegitu ak onyiganitu: amu yachin ko u noto Jehovah bunikwok tugul che obarege.

²⁶ Ye ibata, kokwerot Josua ichek ak kobar, ak kosonginine ketik mut: ak kitebe ketik kosonginindos agoi koimen.

²⁷ Ak ye kimachei kororokta asista, kogon Josua ng’atutiet, kechoor anyun eng’ ketik kobwa ng’ony, ak kowirji kebenet ole kiga ung’egei, ak konde koik che eechen kurgetab kebenet, mi agoi ra.

Kiterteri murot ne bo tai ne bo Kanan

²⁸ Ak kinam Josua Makeda betunoto, ak kobar koboto laitoriandennyi eng’ rotwetab chok; kibar ichek ak bik tugul che kimi orit kogesgei, ma bagakta agot agenge: ak kiyachi laitoriatab Makeda ko u ye kiga yachi laitoriatab Jeriko.

²⁹ Ak kisiirto Josua eng’ Makeda, koboto Israel tugul, koba Libna, ak kobargei ak Libna:

³⁰ ak kiigoito Jehovah nganasanato agine, koboto laitoriandennyi, konde eunekab Israel; ak kibar nganasanato koboto bik tugul che kimi orit eng’ rotwetab chok; ma bagakta agot agenge eng’ orit; ak kiyachi laitoriandennyi ko u ye kiga yachi laitoriatab Jeriko.

³¹ Ak kisiirto Josua eng’ Libna, koboto Israel tugul, koba Lakis, ak koteech taitab nganasanato, ak kobargei:

³² ak kiinde Jehovah Lakis eunekab Israel, ak kinam eng’ betut ne bo aeng’, ak kobar koboto bik tugul che kimi orit, eng’ rotwetab chok, ko u tugul che kiga yachi Libna.

³³ Kitogos anyun Horam laitoriatab Geser kolen kotoret Lakis; ak kibar Josua inendet koboto bikyik, kot ko ma bagakyi agot agenge.

³⁴ Ak kisiirto Josua eng’ Lakis, koboto Israel tugul, koba Eglon, ak koteech taitab nganasanato, ak kobargei;

³⁵ ak kinam eng’ betunoto, ak kobar eng’ rotwetab chok bik tugul che kimi orit, ak kibar kogesgei eng’ betunoto ko u tugul che kiga yachi Lakis.

³⁶ Ak kitogosta Josua eng’ Eglon, koboto Israel tugul, koba Hebron; ak kobargei:

³⁷ ak kinam, ak kobar eng’ rotwetab chok, bik tugul che kimi orit; koboto laitoriandennyi, ak nganasokyik tugul, ma bagakta agot agenge, ko u tugul che kiga yachi Eglon; king’em koges, koboto bik tugul che kimi orit.

³⁸ Ak kiweek Josua, koboto Israel tugul, koba Debir; ak kobargei:

³⁹ ak kinam, koboto laitoriandennyi, ak nganasokyik tugul; ak kobar ichek eng’ rotwetab chok, ak kobar bik tugul che kimi orit kogesgei; ma bagakta agot agenge: ko u ye kiga yachi Hebron, koyachi Debir ko u noto, koboto laitoriandennyi; ko u ye kiga yachi Libna agine ak laitoriandennyi.

⁴⁰ Kibar anyun Josua emet tugul, emetab tulonok, ak komostab Murot ne bo Tai, ak warenget, ak chepkeigeusiek, koboto laitorinikwak tugul; ma bagakta kong’et agot agenge: kibar koges tugul che kitinyei kabuset, ko u ye king’at Jehovah Kamuktaindetab Israel.

⁴¹ Ak kibar Josua ichek koboch Kades-barnea agoi Gasa, ak emet komugul ne bo Gosen, agoi Gibeon.

⁴² Ak kinam Josua laitorinichoto tugul, ak emotinwekwak eng’ betusiechoto, amu kiyai Jehovah, Kamuktaindetab Israel, luget agobo Israel.

⁴³ Ak kiweek Josua, koboto Israel tugul, koba nganaset eng’ Gilgal.