JOSHUA 1 - BUKUIT NE TILIL

Keleweni Joshua konam boisietab Musa

¹ Kingo kagome Musa otwogindetab Jehovah, kong’alalji Jehovah Josua weritab Nun, kiboitiotab Musa, kolenji,

² Kogome otwogindennyu Musa; ng’eet anyun nguno, landae Jordanini, inye ak bichu tugul, oba emet ne agochini ichek, choto ko lagokab Israel.

³ Komosta age tugul ole otieche eng’ kelyekwok, ko kaagonok yoto, ko u ye kiamwachi Musa.

⁴ Koboch ong’atet, ak Lebanonini, agoi ainet ne o, ainet ne kiguure Euprate, emet komugul ne bo Hitik, agoi nyanjet ne o ne tokyingei ole roroktoe asista, egu noto kiwoteng’wong’.

⁵ Mabiitu chi ne imuchi kotonon eng’ taing’ung’ betusiek tugul kote isobe: ko u ye kiami koboto Musa, ko u noto ami koboten: mametoin, anan abagakten.

⁶ Kimitu ak inyiganitu: amu igochini bichu konam emet ne kiayosiechi kwanisiekwak ale agochini.

⁷ Ago kimitu ak inyiganitu mising’, si irib iyai ko u ng’atutik tugul, che king’atin otwogindennyu Musa: amemaste iwe eutab tai anan ko katam, si kobiit kiberurin mising’ eng’ oldo tugul ole iwendi.

⁸ Amat komanda bukuini bo Ng’atutik eng’ kuting’ung’, ago ibwat bet ak kemoi, si irib iyai ko u tugul che kigisirji: si iyai oreng’ung’ kotunen, ak kiberurin mising’.

⁹ Tos ma ane ne kiang’atin? Kimitu ak inyiganitu mising’; ameiywei, anan itoptoben: amu mi Jehovah Kamuktaindeng’ung’ koboten eng’ ui tugul ole iwendi.

Chobetab ge si kolandoi eng’ Jordan

¹⁰ King’at anyun Josua kiptainikab bik kolenji,

¹¹ Obun kwenutab nganaset, ak ong’at bik olenji, Ochob amitwogik; amu kotom kogesgei betusiek somogu olandoe Jordanini si onam emet, ne konok Jehovah Kamuktaindeng’wong’ kobunjok.

¹² King’alalji Josua oretab Reuben, ak oretab Gad, ak kebebertab oretab Manase, kolenji,

¹³ Obwat ng’olyot ne king’atak Musa otwogindentab Jehovah, kole, Konok Jehova Kamuktaindeng’wong’ kamuung’et, ak konok emoni.

¹⁴ Tebe osotikwok, lagokwok, ak tukwok emet ne kigonok Musa eng’ Jordan bitoni; ago olandoi okwek ondoe tupchosiekwok ko kaolaach karik, murenik tugul che kimen, che nyigonen; obe otoret ichek.

¹⁵ Agoi kogochi Jehovah tupchosiekwok kamuung’et, ko u okwek, ak konam agichek emet ne igochin Jehovah Kamuktaindeng’wong’: oweege anyun obwa emeng’wong’, si kobunjok, ne kigonok Musa otwogindetab Jehovah eng’ Jordan bitoni ole chorune asista.

¹⁶ Kowolji ichek Josua kolenji, Kiyae choto tugul keng’atech, kibendi olda tugul ole keyoktech kebe.

¹⁷ Ko u ye kigigase it Musa eng’ tuguk tugul, kegasin it aginye ko u noto: ago ingoteb Jehovah Kamuktaindeng’ung’ koboten, ko u ye kimi koboto Musa.

¹⁸ Chi age tugul ne kabistoe ng’atutieng’ung’, ama epchi it ng’aleguk eng’ tugul che ing’ate inendet, kebarei: ago kimitu inye, ak inyiganitu mising’.