JONAH 4 - BUKUIT NE TILIL

Ma baibait Jona eng’ Jehovah amu rirenennyi bo ge

¹ Ago kima ibaibai Jona ng’olyondonoto agot kitigin, ak kinerech.

² Ak kisa Jehovah kole, Asain, ee Jehovah, tos ma ng’olyondonito ne kigamwa ye kingota ami emennyu? Kiamwei anyun achakte awe Tarsis: amu kiangen ale i Kamuktaindet ne bo mieindo, ak ne nyiitat rirenet, ne ma sib konerechi, ak kotinyei chang’indab rirenet, ak iwale kabwatutiguk agobo yaitiet.

³ Ara anyun, ee Jehovah, asomin mising’ ale, istoena sobondanyu; amu kaigai eng’ ane ame kosiir asob.

⁴ Ak kile Jehovah, Tos iyae ne mie nginerech?

⁵ Kiwa anyun Jona sang’utab nganaset, ak koteb ng’ony eng’ komostab kong’asis ne bo nganaset, ak koteekyigei keriet eng’ oloto, ak koteb ng’ony kouure, kot kogeer kit ne biitu eng’ nganaset.

⁶ Ak kichob Jehovah Kamuktaindet silangwet, ak kogochi kobit kotuch Jona, si kobiit kouur inendet ak kosor inendet eng’ kaiimennyi bo ge. Kibaibaitune anyun Jona silangwanato mising’.

⁷ Ago kingoeech eng’ betut ne bo aeng’, kochob Kamuktaindet kutiet, ak kisus silangwanato, ak kires.

⁸ Ak kingochor asista kochob Kamuktaindet usonet ne bunu kong’asis ne imelisiei; ak kibeel asista metitab Jona, kot kotanui, ak kisomjigei kole kome, ak kile, Kaigai eng’ ane ame kosiir asob.

⁹ Kilenji Kamuktaindet Jona, Tos iyae ne mie nginerech agobo silangwet? Ak kile, Kayai ne mie nganerechi agoi meet.

¹⁰ Ak kile Jehovah, Kerire silangwet, ne koma iyae, ak ko ma ibiiti; ne kobit kemout agenge, ak kong’emak kemout agenge:

¹¹ tos manyoljina arire Ninebe, nganasanato o; ole mi bik che siirei elfusiek bogol ak tiptem che maibestos eunywa ne bo tai ak eunywa ne bo katam; ak komi kogeny tuga che chang’?