JONAH 3 - BUKUIT NE TILIL

Koamdoi Jona ng’alek eng’ Ninebe ak kisik bik

¹ Ak kinyonji ng’olyotab Jehovah Jona ne bo aeng’, kolenji,

² Ng’eet, ui Ninebe, nganasanato o, ak iamdachi ng’alek che amwaun.

³ Kong’eet anyun Jona kwo Ninebe, ko u ng’olyotab Jehovah. Ki nganaset ne o mising’ Ninebe, kibunei chito eng’ betusiek somok.

⁴ Ak kitoi Jona kochut nganaset eng’ bandab betut agenge, ak kiititen kole, Tomo betusiek artamu si keng’em Ninebe.

⁵ Ak kiiyan bikab Ninebe Kamuktaindet; ak kimwaita karugutetab ge, ak kiilaach kuniok, koboch ne o agoi ne ming’in.

⁶ Ak kiit ng’alek oldab laitoriatab Ninebe, ak king’eet eng’ ng’echerennyi ne bo laitornatet ak koreek ngoriennyi, ak kotugegei kuniok, ak kotebe orek.

⁷ Ak kimwaita ak kobarta eng’ Ninebe komugul eng’ ng’atutietab laitoriat ak bikyik che toogunotin, kole, Amat kochamjam kiy chi anan tiony, anan akwetab tuga, anan ko ne bo kechirek: amat koamis, anan koee beek:

⁸ ago ingetuge ichek tugul kuniok, chi ak tiony, ak ingorirji Kamuktaindet eng’ kimnatet: ee, ingoweek chi tugul kometo orennyi ne ya, ak kometo koromnatet ne mi eunekwak.

⁹ Ng’o ne ingen ngo tos ma week Kamuktaindet ak kowal kabwatutikyik, ak kometo neregekyik che koromen, si ma kibegu?

¹⁰ Ak kigeer Kamuktaindet boisionikwak, kole kaweek kometo orenywa ne ya; ak kiwal Kamuktaindet kabwatutikyik agobo yaitiet, ne kiga mwa kole yachin ichek; ak mata koyai.