JONAH 2 - BUKUIT NE TILIL

Saetab Jona ak sorunennyi

¹ Kisa anyun Jona Jehovah Kamuktaindennyi komi moetab njiriot,

² Ak kile, Kiaguur Jehovah eng’ nyalildanyu, Ak kiwolwa; Kiaguurse ami oldab che kigobek, Ak kiigas kutinnyu.

³ Amu kiiwirja riret, eng’ kwenutab nyanjosiek, Ak kiyiema maranet; Kigomaluucha beeguk tugul che mildogei ak che somotitogei.

⁴ Ak kiamwa ale, Kagewirta si ma igeera; Ago ta atokyinige hekalung’ung’ ne tilil.

⁵ Kiyiema beek, agoi sobondanyu; Kiyiema riret; Kirat metinnyu cherungusiek.

⁶ Kiachortege agoi kelusiekab tulonok; Kirata ng’ony koboto temeleiywekyik agoi: Ago kiimutu kora sobondanyu komong’ eng’ keringet, ee Jehovah Kamuktaindennyu.

⁷ Ye kitanui sobondanyu, abwat anyun Jehovah: Ak kiit ole imi saennyu, agoi hekalung’ung’ ne tilil.

⁸ Istoegei rirenenywa bo ge Ichek che isubi atebosiek che ma nyolu che bo lembech.

⁹ Ago aeng’un tiseiywot ne amwae kongoi; Ayaagun che kiaarorun. Bo Jehovah yetunet.

¹⁰ Ak king’alalji Jehovah njiriot, ak kiing’ung’ Jona konyo emet.