JONAH 1 - BUKUIT NE TILIL

Koyoktoi Jehovah Jona kwo Ninebe

¹ Kinyonji ng’olyotab Jehovah Jona weritab Amitai, kolenji,

² Ng’eet, ui Ninebe, nganasanato o, ak ititenji; amu kagotogos yaitienywa tainnyu.

³ Ago king’eet Jona kolen komwechi Tarsis komwee Jehovah; ak kichortagei kwo Jopa, ak konyor melit ne wendi Tarsis: kiigoito anyun tuguk che yamegei ak banda, ak kolany melinoto, kole koba tugul Tarsis komwee Jehovah.

Komwei Jana ak kotoortoi beek melit ne kimi

⁴ Ago kiiyokyi Jehovah nyanjet usonet ne o, ak kibiit kipchurjuriet ne o mising’ eng’ nyanjet, kot komach kobutok melit,

⁵ kiiyweis anyun kiboitinikab melit, ak korirji chi age tugul cheptalelinnyi; ak kiwirji nyanjet tuguk che kimi melit, kole kowisisit. Ago kiga kwo Jona komoswek che bo orit mising’ che bo melit; ak kiru, konuuch.

⁶ Kiwa anyun kiptaiyatab melit ole mi inendet, ak kolenji, I lyon inye chichi irue? Ng’eet, kuur Kamuktaindeng’ung’, tamangab kobwatech Kamuktaindet si ma kibegu.

⁷ Ak kilenji age tugul choruennyi, Nyo, ak ongeser barbarek, si kobiit kenai kele kanyonjech yaitioni amu ng’o. Kiser anyun barbarek, ak kobutyi barbariat Jona.

⁸ Kimwachi anyun inendet kolenji, Kisomin kele mwawech, bo ng’o yaitioni kanyonjech; nee boisieng’ung’? Ak ibunu ano? Ano emeng’ung’? Ak ano bororieng’ung’?

⁹ Ak kilenji ichek, A Hebranindet, ak aiywei Jehovah, Kamuktaindetab kipsengwet, ne kiyai nyanjet ak emet.

¹⁰ Kiiyweis anyun bik mising’, ak kolenji inendet, Nee kiito koiyai? Amu kinai bik kole kamwee Jehovah; amu kiga komwachi ichek.

Kigitoorta Jona kwo nyanjet, ak kolugui njiriot inendet

¹¹ Koteebe anyun bichoto inendet kolenji, Kiiten nee, si kosis nyanjet? Amu kitesak mising’ wasetab ge ne bo nyanjet.

¹² Ak kilenji ichek, Oganaba, ak owirja nyanjet; si kosis nyanjet: amu angen ale kanyonjok usononi o mising’ amu ane.

¹³ Ago kiwaas bichoto beek eng’ kimnatet kolen kokweri melit koweek kwo ngegut; ago ma imuch: amu kitesak mising’ wasetab ge ne bo nyanjet kogirinda ichek.

¹⁴ Kirirji anyun Jehovah kolenji, Kisomin mising’, ee Jehovah, kisomin mising’ kele, amengebegu agobo sobondab chichi, ameityech korotik che matinyei tengek: ee Jehovah, amu kaiyai inye ko u ye kecham.

¹⁵ Koganab anyun Jona, ak kowirji nyanjet: kosis anyun nyanjet eng’ wasetab ge.

¹⁶ Koiywei anyun bichoto Jehovah mising’; ak koeng’ji Jehovah tiseiywot, ak koyosio.

¹⁷ Ak kichob Jehovah njiriot ne o si kobiit kolugui Jona; ak kitebe Jona moetab njiriot betusiek somok ak kemousiek somok.