JOHANA 9 - BUKUIT NE TILIL

Kosoobi Jesu chi ne kiga kisich ko korat

¹ Ak ye kisiirtoi, kogeer chito ne ki korat koboch ko kagisich.

² Ak kiteebe inendet alamalyennyi, kolenji, Rabbi, ng’o ne kiyai tengekto, chichi anan sigikyik, si kesich ko korat?

³ Kowol Jesu kole, Kima yai chichi tengekto, anan sigikyik; ago si kobiit kotook boisiosiekab Jehovah eng’ inendet.

⁴ Kanyol keyai boisiosiekab inendet ne kiiyokwa, ko ta ko bet: nyonei kemout, ye ma komuchi chi kobois.

⁵ Ye ta ami ng’ony, ko a lapkeiyetab ng’ony.

⁶ Ye kingo kagomwa ko u noto, kong’utyi ng’ung’unyek, ak kotangwar, ak koiile konyekyik ng’ung’unyechato,

⁷ ak kolenji, Ui iunde eng’ tamboiyotab Siloam (ye kiweech kele, Kiyokto). Kiwa anyun, ak koun, ak konyo kogeertoi.

⁸ Kimwa anyun bikab kokwet, ak che kiga kogeer inendet eng’ tai kole somindet, kole, Tos ma inendet ni ne kicham kotebyei ak kosomsei?

⁹ Kole alage, Inendet: kole alage, Achicha, ago kerge ak inendet. Kole chichoto, A inendet.

¹⁰ Kilenji anyun ichek inendet, Kagiyatita ano konyeguk?

¹¹ Kowol kole, Katangwar ng’ung’unyek chito ne keguure Jesu, ak koiile konyekyuk, ak kolenja, Ui Siloam, ak iunde: kaawe anyun ak aun, ak ageerte.

¹² Ak kilenji, Mi ano inendet? Kole, Mangen.

¹³ Kiimut ichek chichoto ki korat eng’ tai, kwo ole mi Parisaik.

¹⁴ Ki sabato betunoto ye kitangwari Jesu ng’ung’unyek, si koyate konyekab chichoto.

¹⁵ Koteebe anyun Parisaik kogeny inendet kole, Katepto ano si igeerte? Ak kilenji, Kagoiile konyekyuk ng’ung’unyek che katangwar, ak kaaun, ak kaageerte.

¹⁶ Kole alak che bo Parisaik anyun, Mabunu Jehovah chichi, amu maribei sabato. Ago kile alage, Imuktoi ano chi ne kiptengekyo koyai kaborunoik che u chu? Ak kibiit toiyet eng’ kwenunywa.

¹⁷ Kilenji anyun kogeny chito ne korat, Imwae nee agobo inendet, amu kayat konyeguk? Ak kile, Maotio.

¹⁸ Ma iyan anyun Yahudik agobo inendet, kole, ko korat, ak, kagogeerto, agoi koguur sigikab chichoto kagogeerto,

¹⁹ ak koteebe kolenji, Tos wering’wong’ ni, ne omwae ole kigisich ko korat? Katepto ano si kogeerto nguno?

²⁰ Kowol sigikyik kole, Kingen kele werinnyo nito, ak kingen kele kigisich ko korat:

²¹ ago magingen ole katepto si kogeerto nguno; ak magingen inendet ne kayatei konyekyik: oteebe inendet; kogoeet; ingomwa inegei.

²² Kimwa ng’alechu sigikyik, amu kiiywei Yahudik: amu kiga sib kochamnyechi Yahudik, kole, ngo ng’any chi age tugul kole Kristo inendet, kibeetoi eng’ sunagogit.

²³ Kimwa anyun sigikyik amu noto, kole, Oteebe, amu kogoeet inendet.

²⁴ Kiguur anyun ne bo aeng’ bichoto chichoto ki korat, ak kolenji, Igochi Jehovah kalosunet: kingen kele kiptengekyo chichi.

²⁵ Kowol anyun inendet kole, Ngo kiptengekyo chichoto, ko mangen: angen kit agenge, ale, koa korat, ago ageertoi nguno.

²⁶ Kolenji anyun ichek inendet, Kayaun nee? Kayatita ano konyeguk?

²⁷ Kowolji ichek kolenji, Kaamwawok, ama ogas: kalya si omach ogas kogeny? Omache koegu ak okwek alamalennyi?

²⁸ Ak king’emji kut inendet kole, I alamalyennyi so? Ago ki alamalyetab Musa achek.

²⁹ Kingen kele kigong’alalji Jehovah Musa: ago magingen kole bo chichi.

³⁰ Kowolji chichoto icheget kolenji, Kwong’ut nito anyun, amu mongen ole bunu, ago kagoyat konyekyuk.

³¹ Kingen kele magasei Jehovah kiptengeginik: ago ngolosu chi age tugul Jehovah, ak koyai magennyi, kogasei inendet.

³² Koboch ngetoi ng’ony ko ma kigas kele kiyat chi konyekab chito ne kigisich ko korat.

³³ Nda ma bunu Jehovah chichi ko magoi imuch koyai kiy.

³⁴ Kowolji inendet kolenji, Kigisikten iman tengekwogik, ak inetech? Ak kitoorta inendet kwo sang’.

³⁵ Kigas Jesu kole kagetoorta inendet kwo sang’; ak kingonyor inendet, kolenji, Tos iyani Weritab Jehovah?

³⁶ Ak kiwol kole, Ng’o noto, Kiptaiyandani, si kobiit ayan inendet?

³⁷ Kolenji Jesu, Kaigeer inendet, ak ko inendet ni ng’alali koboten.

³⁸ Ak kile, Kiptaiyandani, ayani. Ak kogutung’ji kolos inendet.

³⁹ Ak kile Jesu, Kianyo ng’onyuni amu kiruoget, si kobiit kogeerto che mageertoi; ak kogorio che keertoi.

⁴⁰ Kigas tuguchuto alak che bo Parisaik che kimi koboto inendet, ak kolenji, Ki koriotin agachek?

⁴¹ Kolenji Jesu, Nda o koriotin okwek, ta motinye tengek; ago nguno omwae ole, Kigeertoi: noto anyun, tebyei tengektang’wong’.