JOHANA 8 - BUKUIT NE TILIL

¹ Ago kiwa Jesus tulwetab Emitik.

² Ak kimus karon konyo hekalut, ak kibwa bik tugul ole mi inendet; ak kiteb ng’ony, konet ichek.

³ Ak kiimut sirik ak Parisaik kobogoriot ne kiginamji ibetab ge; ak ye kingo kaginde kwenut,

⁴ kelenji, Konetindoni, kaginam kobogoriondoni eng’ ibetab ge, kota komi ibetab ge.

⁵ King’atech Musa eng’ Ng’atutiet kole, kilage koik ne u nito: ara ilen nee inye?

⁶ Kimwaei ng’olyondonito kotiemei inendet, si kosich kit ne kitaame. Ago kiing’uruk Jesu, kosir ng’ony eng’ mornennyi.

⁷ Ago ye kingota koteepse inendet, kotonon, ak kolenji, Ingotoi ne matinye tengek eng’ okwek kowir eng’ koita.

⁸ Ak kiing’uruk kogeny kosir ng’ony eng’ mornennyi.

⁹ Ak ye kingogas ichek ng’olyondonoto, komanda kobee agenge agenge, koboch ne o agoi ne bo let: ak king’et Jesu inegei, ak kobogoriondonoto eng’ ole kimi, kotononi eng’ kwen.

¹⁰ Kotonon Jesu anyun, ak kolenji, Kobogoriondoni, mi ano ichek? Ma igikyin chi?

¹¹ Ak kile, Ma igikya chi, Kiptaiyandani. Ak kilenji Jesu, Magikyinin agane: ui anyun; koboch nguno, komatata iyai tengek.]

Lapkeiyet ne bo ng’ony

¹² Kimwachi Jesu anyun ichek kogeny, kolenji, A lapkeiyet ne bo ng’ony: inendet ne isuba ko mawendoti eng’ mesundeito, ago nyoru lapkeiyetab sobondo.

¹³ Kolenji anyun Parisaik inendet, Ibaorianjinige: ma bo iman baornateng’ung’.

¹⁴ Kowolji Jesu kolenji, Agot ngabaorianjinige, ko bo iman baornatennyu; amu angen ole abunu, ak ole awendi; ago mongen ole abunu, anan ole awendi.

¹⁵ Oruochi ko u magetab borto; maruokyini chi ane.

¹⁶ Ee, agot ngaruoch, ko bo iman kiruogennyu; amu mami anege, ago kimi ak Kwanda ne kiiyokwa.

¹⁷ Ee, ak kigisir eng’ Ng’atutieng’wong’ kele, bo iman baornatetab bik aeng’.

¹⁸ A inendet ne abaorianjinige, ak baorianjina Kwanda ne kiiyokwa.

¹⁹ Kolenji anyun ichek inendet, Mi ano Kwandang’ung’? Kowol Jesu kole, Mongena, anan Baba: nda kigonaa, ta kiongen Baba agine.

²⁰ Kimwa inendet ng’alechu eng’ ole kigonore siling’isiek, ye kiinetisiei eng’ hekalut: ak ma nam chi inendet; amu kitom koit sainnyi.

Kateunoik agobo betusiek che bwanei

²¹ Kimwachi anyun icheget kogeny, kolenji, Awendi, ak tun ocheng’a, ak obegu eng’ tengektang’wong’: ole awendi, ko momuchi obwa.

²² Kile anyun Yahudik, Tos bargei, amu mwaei kole, Ole awendi, ko momuchi obwa?

²³ Ak kilenji, O bo oli bo ng’ony, a bo barak: o bo ng’onyuni; ma bo ane ng’onyuni.

²⁴ Noto kaamwawok, ale, obegu eng’ tengekwogikwok: amu ngo moyuani ole a inendet, obegu eng’ tengekwogikwok.

²⁵ Kilenji anyun ichek inendet, I ng’o? Kolenji Jesu, Noto kiamwawok koboch taunet.

²⁶ Atinye tuguk che chang’ che amwae ak che aruochi agobo okwek: ago bo iman inendet ne kiiyokwa; ak amwachini ng’ony tuguk che kiagas eng’ inendet.

²⁷ Ago ma iguiyo kole mwachin agobo Kwanda.

²⁸ Kilenji Jesu anyun, Ye kaouite Weritab chi, onai anyun eng’ betunoto ole a inendet, amayae kiy anege, ago amwae tuguchu ko u ye kiineta Kwanda.

²⁹ Ak kimi tuwai ak inendet ne kiiyokwa; ma bagakta anege; amu ayae kotugul tuguchoto chamaksei eng’ inendet.

³⁰ Ak ye kita komwaei tuguchu, koyan inendet che chang’.

Ng’alek che kiting’e Jesu Yahudik

³¹ Kilenji Jesu anyun Yahudichoto kiga koyan inendet, Ngot otebye okwek eng’ ng’olyondennyu, ko o alamalyennyu iman;

³² ak onai imanda, ak kotiachak imanda.

³³ Kowolji ichek inendet kolenji, Ki keswekab Abraham, ak tom keegu otwogikab chi age tugul ole kinye kora: imwaitoi ano anyun ile, Kitiachok?

³⁴ Kowolji Jesu kolenji, Amwawok, iman, iman, ale, Age tugul ne yaei tengek ko otwogindetab tengek.

³⁵ Ak matebyei otwogindet eng’ got koigeny: tebyei werit koigeny.

³⁶ Ngotiachak anyun Werit, ko otiagotin iman.

³⁷ Angen ale o keswekab Abraham; ago ocheng’e obara, amu matinyei ng’olyondennyu ole tebe eng’ okwek.

³⁸ Amwae tuguk che kiageer eng’ Baba: ak oyae tuguchoto kiogas eng’ kwandang’wong’.

³⁹ Kowolji kolenji, Kwandanyo ko Abraham. Kolenji Jesu, Nda kio lagokab Abraham, ta kioyae boisiosiekab Abraham.

⁴⁰ Ago ngo ocheng’e obara, chito ne kamwawok ng’alek che bo iman, che kiagas eng’ Jehovah: kima yai ko u noto Abraham.

⁴¹ Oyae boisionik che bo kwandang’wong’. Kilenji anyun inendet, Kima kisichech eng’ sokset; kitinye Kwanda agenge, noto ko Jehovah.

⁴² Komwachi Jesu ichek kolenji, Nda ka Kwandang’wong’ Jehovah, ta kaochama: amu kianyo abunu Jehovah; kima anyo anege, ago kiiyokwa inendet.

⁴³ Amu nee si monai choto amwae? Amu momuchi ogas ng’olyondennyu.

⁴⁴ O bo kwandang’wong’ oindet, ak ochame oyai magutikab kwandang’wong’. Ki rumindet koboch taunet, ama tononi eng’ imanit, amu mami imanit eng’ inendet. Ye mwaei lembech, komwaei agobo tugukyik: amu kiplembechwa inendet, ak kwanda ne bo noto.

⁴⁵ Ago moyana amu amwae imanit.

⁴⁶ Ng’o eng’ okwek ne igikyina kole atinye tengek? Ngot amwae imanit, ko amu nee anyun si moyana?

⁴⁷ Inendet ne bo Jehovah kogasei ng’alekab Jehovah: noto anyun mogase okwek, amu mobo Jehovah.

⁴⁸ Kowolji anyun Yahudik kolenji, Magimwae achek iman kele, I Samarindet, ak itinye oindet?

⁴⁹ Kowol Jesu kole, Matinye oindet; ago agonyiti Baba, ak otewera.

⁵⁰ Ago macheng’e torornatennyu: mitei agenge ne cheng’ei ak koruochi.

⁵¹ Amwawok, iman, iman, ale, Ngo rib chi ng’olyondennyu ko mageerei meet agoi.

⁵² Kolenji anyun Yahudik, Kingen nguno kele itinye oindet. Kigome Abraham, ak kigobek maotik; ak imwae ile, Ngo rib chi ng’olyondennyu, ko machamjami meet agoi.

⁵³ Tos i o isiir kwandanyo Abraham, ne kigome? Ak kigobek maotik: iyaege iegu ng’o?

⁵⁴ Kowol Jesu kole, Ngot atororige, ko buch torornatannyu: Kwandanyu ne itorora; ne omwae ole, inendet ko Jehovah neng’wong’;

⁵⁵ ak tom onai inendet: ago angen inendet; ak ngot amwa ale, mangen inendet, aegu kiplembechwa, ko u okwek: ago angen inendet, ak aribe ng’olyondennyi.

⁵⁶ Kibaibai kwandang’wong’ Abraham kogeer betunnyu; ak kigeer, ak kogasgei.

⁵⁷ Kolenji Yahudik anyun, Tom iit kenyisiek konom, ak kiigeer Abraham?

⁵⁸ Kolenji Jesu, Amwawok, iman, iman, ale, Kingotom kobiit Abraham, ami.

⁵⁹ Kiinem anyun koik komachei kowire inendet: ago kiung’gei Jesu, ak komanda eng’ hekalut.