JOHANA 7 - BUKUIT NE TILIL

Jesu koboto tupchosiekyik

¹ Ak kingobata tuguchu kowendot Jesu eng’ Galili: amu ma cham kowendot eng’ Judea, amu kicheng’ei Yahudik kobar inendet.

² Ak kiga rik igortab Yahudik, igorta ne bo keriosiek.

³ Kilenji anyun tupchosiekyik, Ui eng’ oli, ui agoi Judea, si kogeer alamalyeng’ung’ agichek boisioniguk che iyae.

⁴ Amu mami chi ne yaei kiy eng’ ung’ot, ak kocheng’ kobartagei. Ngiyai tuguchu, iborjige ng’ony.

⁵ Amu agot tupchosiekyik agichek, ko ma iyan inendet.

⁶ Kolenji anyun Jesu ichek, Tom koit betunnyu; ago mi betung’wong’ kotugul.

⁷ Maimuchi ng’ony kowechok; ago wecha ane, amu abaoriani agobo ng’ony, ale, yaach boisionikyik.

⁸ Otogosyi okwek igorta: tom atogosyini ane igorita; amu tom kosulda betunnyu.

⁹ Ak kingo kagomwachi tuguchuto, kota kotebi eng’ Galili.

¹⁰ Ago ye kingotogosta tupchosiekyik igorta, kotogosta agine, ago ma ibartaatgei, ago kiwa ko u ne ung’otegei.

¹¹ Kicheng’ anyun Yahudik inendet eng’ igorta, ak kole, Mi ano inendet?

¹² Ak kimi kang’unyng’unyet ne o eng’ tuiyosiek agobo inendet: amu kile alak, Mie chichi; kole alak, Achicha, ago imaasi tuiyet.

¹³ Ago ma mwa chi ng’olyo kotook agobo inendet amu kiiywei Yahudik.

Konetisiei Jesu eng’ Jerusalem kole bunu inendet Jehovah

¹⁴ Ago ye kingo kagoit kwenutab igorta kotogosta Jesu kwo hekalut, ak konetis.

¹⁵ Kokwong’io anyun Yahudik kole, Kinaita ano chichi sirutik, ago tom konetgei?

¹⁶ Kowolji anyun Jesu kolenji, Konetisiennyu ko ma nenyu, ago bo inendet ne kiiyokwa.

¹⁷ Ngo machei chi age tugul koyai magetab Jehovah, konai konetisioni, ngo bo Jehovah, anan ngamwae anege.

¹⁸ Inendet ne mwaei che chechik inegei kocheng’ei torornatennyi: ago ne cheng’ei torornatetab ne kiiyok inendet ko bo iman, ama mi kiy ne ma bo imanda eng’ inendet.

¹⁹ Tos kima konok Musa Ng’atutiet, ago mami chi eng’ okwek ne yaei Ng’atutiet? Amu nee si ocheng’e obara?

²⁰ Kowol tuiyet, kole, Itinye oindet: cheng’ei ng’o kobarin?

²¹ Kowolji Jesu kolenji, Kiayai boisiet agenge, ak okwong’ie okwek tugul.

²² Kigonok Musa kamuratanet amu noto (ago ma bo Musa, bo kwanisiek); ak omuratani chi eng’ saboto.

²³ Ngeyatitoi chi eng’ betutab sabato, si mabutok Ng’atutietab Musa, ko tos onerekyina, amu kaasoob chi komie eng’ betutab sabato?

²⁴ Amoruoch ko u ye ogeere, ago oruoch kiruoget ne bo imanda.

²⁵ Kimwa alak eng’ choto bo Jerusalem kole, Ma inendet ni ne kocheng’ei ichek kobar?

²⁶ Ak ogeero, mwaitooti kotook, ama mwachi kiy ichek inendet. Tos ingen bounik komie kole, nito ko Kristo?

²⁷ Ago kingen ole bunu chichi: ago ye nyo Kristo, ko manaei chi ole bunu.

²⁸ King’alal anyun Jesu eng’ kutit ne o eng’ hekalut, konetisiei, kole, Ongena, ak ongen ole abunu; ak kama anyo anege, ago bo iman inendet ne kiiyokwa, ne mongen okwek.

²⁹ Angen inendet; amu abunu inendet, ak kiiyokwa inendet.

³⁰ Kicheng’ anyun bichoto konam inendet: ama nam chi inendet, amu kitom koit betunnyi.

³¹ Ak kiiyan inendet che chang’ che bo tuiyet; ak kile, Ye nyo Kristo, ko tos yai kaborunoik che siirei cho koyaei chichi?

³² Kigasei Parisaik kong’unyng’ung’jin tuiyet tuguchuto agobo inendet; ak kiiyok tisiik che eechen ak Parisaik kiptainik kobwa konam inendet.

³³ Kole Jesu anyun, Ta ami kobotok ne matia, si awa ole mi inendet ne kiiyokwa.

³⁴ Tun ocheng’a, amonyorua: ak ole ami, ko momuchi obwa.

³⁵ Komwachigei anyun Yahudik kole, Wendi ano chichi si ma kinyoru inendet? Tos wendi ole mi icheget che kigoiyestochi Yunanik, si konet Yunanik?

³⁶ Nee anyun ng’olyondoni kamwa, kole, Ocheng’a, amonyorua: ak ole ami, ko momuchi obwa?

Beek che soptos

³⁷ Eng’ betut ne bo let, betunoto o bo igorta, kotonon Jesu ak komwa eng’ kutit ne o, kole, Ngo amei chi melel, ko ingonyonja, ak koee.

³⁸ Inendet ne iyana, ko u ye kigomwa sirutiet, kole, bunu moennyi ainosiekab beek che sobei.

³⁹ Ago kimwaei nito agobo Tamirmiriet, ne tun taachei ichek che iyani inendet: amu kitom kegon Tamirmiriet; amu kitom kitoror Jesu.

⁴⁰ Ye kingogas alak che bo tuiyet ng’alechuto, kole, Nito maotiot iman.

⁴¹ Kole alak, Nito ko Kristo. Ago kile alage, Tos bunu Kristo Galili?

⁴² Ma mwa sirutiet, kole, mong’une Kristo keswek che bo Daudi, ak kobun Betlehem, nganaset ole kimi Daudi?

⁴³ Kibiit anyun toiyet eng’ tuiyet agobo inendet.

⁴⁴ Ak kimach alak konam inendet; ago ma nam chi inendet.

⁴⁵ Kibwa anyun kiptainik ole mi tisiik che eechen ak Parisaik; ak kolenji, Kalya si momutu inendet?

⁴⁶ Kowol kiptainik kole, Kitom kong’alali chi ko u ni.

⁴⁷ Kowolji anyun Parisaik ichek, kolenji, Kagibeetok ak okwek?

⁴⁸ Kigoyan inendet age tugul eng’ bounik, anan eng’ Parisaik?

⁴⁹ Ago chubotin bichu che manaei Ng’atutiet.

⁵⁰ Kilenji Nikodemo (ne kigawa ole mi inendet atkinye tai, ne ki age eng’ ichek),

⁵¹ Tos iruokyin chi Ng’atutiennyo, kotom kegas ng’alekyik ak kenai kit ne yaei?

⁵² Kowolji anyun inendet kolenji, I bo Galili aginye? Cheng’, ak igeer amu mamong’une Galili maotiondo. [

⁵³ Kiwa chi ktugul anyun gonnyi: