JOHANA 6 - BUKUIT NE TILIL

Kebaei bik elfusiek mut

¹ Kingobata tuguchu kwo Jesu bitet age ne bo araraitab Galili, noto ko araraitab Tiberia.

² Ak kiisub inendet tuiyet ne o, amu kigeer kaborunoik che kiyachi che miandos.

³ Ak kitogosta Jesu tulwet, kwo koteb ng’ony eng’ oloto koboto alamalyennyi.

⁴ Ak kiga rik paska, igorta ne bo Yahudik.

⁵ Kingoyot met anyun Jesu, kogeer tuiyet ne o konyonjin inendet, kolenji Pilipu, Kiale ano makatinik si koam bichu?

⁶ Kimwaei ni kotieme inendet: amu kiingen inendet kit ne machei koyai.

⁷ Kowolji Pilipu inendet kolenji, Mayamei ichek makatinik che bo denarisiek bogol aeng’, si konyor age tugul kitigin.

⁸ Kolenji inendet age ne bo alamalyennyi, Andrea, ng’etab kametab Simon Petero,

⁹ Mi yu werit age, ne tinyei makatinik mut che bo sairi, ak njirenik aeng’: ago yamei nee anyun chuto eng’ bik che te chu?

¹⁰ Kimwa Jesu kole, Ochob bik kobuur. Ak kimi suswek che chang’ oloto. Kiibuur anyun bik; ki olo bo elfusiek mut murenjoto.

¹¹ Kinam anyun Jesu makatinik; ak kingo kagogoito kongoi, koropchi icheget che kitebyei ng’ony; ak ko u noto agichek njirenik che te che machei.

¹² Ak ye kingobiyong’so, kolenji alamalyennyi, Oyum katuganik che kang’et, si mabet kiy.

¹³ Koyum anyun katuganichato, ak konyiit kerebonik taman ak aeng’ katuganichato bo makatinik mut che bo sairi, che kang’etune icheget che kaamisiei.

¹⁴ Ye kingogeer anyun bichoto kaborunet ne kayai, kole, Ni maotiot iman ne nyonjin ng’ony.

Kowendi Jesu taban inegei, kowendote beek barak

¹⁵ Kingonai Jesu kole negit kobwa si konam inendet eng’ kimnatet, si koyai inendet koek laitoriat, kwo kogeny tulwet inegei.

¹⁶ Ak ye kingoek lagat, kochortagei alamalyennyi koba araraita;

¹⁷ ak kilany moingetab beek, kolandae araraita koba Kapernaum. Ak kiga koimenit, ak kitom koit Jesu ole mi ichek.

¹⁸ Ak kiwasegei araraita amu kiusei usonet ne o.

¹⁹ Ye kingo kagoba anyun eng’ araraita ole bo maelisiek somok anan ko somok ak kebeber, kogeer Jesu kowendoti eng’ araraita barak, ak korikyin moinget: ak kiiyweis.

²⁰ Ago kilenji ichek, Ane; amoiywei.

²¹ Kocham anyun kotaach inendet eng’ moinget: ak kiit moinget ngunoto emet ole kibendi.

Kocheng’ei bik kaborunet

²² Ki betut ne kiisubi noto kogeer tuiyet ne kitononi eng’ araraita bitonin, kole mami moinget age oloto, kobate agenge, ak kima lany Jesu moingonoto koboto alamalyennyi, ago kiba alamalyennyi ichegei

²³ (ago kibwa moingonik alage eng’ Tiberia ye negite koret ole kiame makatinik ye kingo kagogoito Kiptaiyat kongoi):

²⁴ Ye kingogeer tuiyet anyun kole mami Jesu oloto, anan alamalyennyi, kolany ichek moingonik, ak kobwa Kapernaum, kocheng’onu Jesu.

Makatiatab Sabon

²⁵ Ak ye kingonyor inendet eng’ bitet age ne bo araraita, kolenji, Rabbi, koinyone au oli?

²⁶ Kowolji Jesu ichek kolenji, Amwawok, iman, iman, ale, Ocheng’a, ma amu koogeer kaborunoik, ago amu kooam makatinik ak obiyong’se.

²⁷ Amoboisie agobo amitwogik che begu, ago oboisie agobo amitwogik che tebyei agoi sobondab koigeny, che konok Weritab chi: amu kigong’och inendet Kwanda, ne inendet ko Jehovah.

²⁸ Kilenji anyun ichek inendet, Kiyai nee, si kobiit keyai boisionik che bo Jehovah?

²⁹ Kowolji Jesu kolenji, Ni boisietab Jehovah, ale, oyan inendet ne kiiyogu Jehovah.

³⁰ Kilenji ichek inendet anyun, Nee kaborunet ne iyae, si kegeer, ak kiyanin? Iyae nee?

³¹ Kiam kwanisiekyok mana eng’ ong’atet; ko u ye kigisir kele, Kiigochi ichek makatiat ne bunu kipsengwet koam.

³² Kolenji anyun Jesu ichek, Amwawok, iman, iman, ale, Kima ko Musa ne kigonok makatiandanato kibunu kipsengwet; ago konok Baba makatiat ne bo iman ne bunu kipsengwet.

³³ Amu makatiat ne bo Jehovah ko noto chorugei eng’ kipsengwet, ak kogochi ng’ony sobondo.

³⁴ Kolenji anyun ichek inendet, Kiptaiyandani, konech makatiandanito koigeny.

³⁵ Kolenji Jesu ichek, A makatiat ne bo sobon: inendet ne nyonjina ko magasei rubet agoi, ak inendet ne iyana ko maamei melel agoi.

³⁶ Ago kaamwawok ale, koogeera, ama oyan.

³⁷ Bwanjina tugul che kona Kwanda; ak inendet ne nyonjina ko maone matiny.

³⁸ Amu kiachoruge eng’ kipsengwet, ma si ayai magennyu, ago magetab inendet ne kiiyokwa.

³⁹ Ak ni magetab inendet ne kiiyokwa, ale, eng’ tugul che kigona inendet, ko mabetena agot agenge, ago tatun ang’eeti eng’ betutab let.

⁴⁰ Amu ni magetab Baba, ale chi age tugul ne keerei Werit, ak koyan inendet, konyoru sobondab koigeny; ak ang’eeti inendet eng’ betutab let.

⁴¹ Kiing’unyng’ung’so anyun Yahudik, agobo inendet, amu kimwa kole, A makatiat ne kichorgei eng’ kipsengwet.

⁴² Ak kile, Tos ma Jesu nito, weritab Josep, ne kingen kwandanyi ak kamet? Lyon anyun si komwa kole, Kiachoruge eng’ kipsengwet?

⁴³ Kowolji Jesu anyun kolenji, Among’unyng’ung’se okwege eng’ okwege.

⁴⁴ Maimuchi chi konyonja, ama ichuut Kwanda ne kiiyokwa: ak ang’eeti inendet eng’ betutab let.

⁴⁵ Kigisir eng’ maotik, Ak kineti tugul eng’ Jehovah. Age tugul ne kagogas eng’ Kwanda, ak kagonetgei, konyonjina.

⁴⁶ Molen kigogeer chi age tugul Kwanda, kobate inendet ne kibunu Jehovah, kigogeer inendet Kwanda.

⁴⁷ Amwawok, iman, iman, ale, Inendet ne iyani, kotinyei sobondab koigeny.

⁴⁸ A makatiat ne bo sobon.

⁴⁹ Kiam kwanisiekwok mana eng’ ong’atet, ak kibek.

⁵⁰ Ni makatiat ne chorugei eng’ kipsengwet, ne ngo am chi, ko mameei.

⁵¹ A makatiat ne sobei ne kichorgei eng’ kipsengwet: ngo am chi age tugul makatiandani, kosobei koigeny: ee, ak bortanyu makatiat ne agoitoi agobo sobondo ne bo ng’ony.

⁵² Kiborio anyun Yahudik ichegei, kole, Imuktoi ano chichi kogonech bortanyi keam?

⁵³ Kolenji Jesu anyun ichek, Amwawok, iman, iman, ale, Ngot ko moam bortab Weritab chi ak oee korotikyik, ko motinye sobondo eng’ oring’wong’.

⁵⁴ Inendet ne amei bortanyu ak koeei korotikyuk kotinyei sobondab koigeny; ak ang’eeti inendet eng’ betutab let.

⁵⁵ Amu amdit iman bortanyu, ak korotikyuk ko che kieei iman.

⁵⁶ Inendet ne amei bortanyu ak koeei korotikyuk komenya, ak amenye inendet.

⁵⁷ Ko u ye kiiyokwa Kwanda ne sobei, ak asobe amu Kwanda; u noto inendet ne ama, sobei agine amu ane.

⁵⁸ Ni makatiandanato ne kichorgei eng’ kipsengwet: ma ko u ye kiam kwanisiek ak kobek: inendet ne amei makatiandani kosobei koigeny.

⁵⁹ Kimwa tuguchu eng’ sunagogit, kota konetisiei eng’ Kapernaum.

Alamalyet ne tinyei saget

⁶⁰ Ye kingogas ni che chang’ eng’ alamalyennyi, komwa kole, Uui ng’olyondoni: imuchi ng’o kogas?

⁶¹ Ago kinai Jesu eng’ orinnyi kole, Ing’unyng’ung’jin alamalyennyi ng’olyondonito, kolenji ichek, Tos kagonachak nito?

⁶² Teptoi ano anyun ngot ko tun ogeer Weritab chi kotogostoi ole kimi atkinye?

⁶³ Tamirmiriet ne igoitoi sobondo; matilei kiy borto: tamirmiriet ak sobondo ng’alek che kaamwawok.

⁶⁴ Ago mitei alak eng’ okwek che maiyani. Amu kinai Jesu koboch taunet icheget che maiyani, ak inendet ne kimachei kong’wekta inendet.

⁶⁵ Ak kile, Noto kamwawok, ale, magoi imuch chi konyonja, kobate ne igochin Kwanda.

Kong’anyei Petero kole Jesu ko Kristo

⁶⁶ Koboch yoto kochuchuigei che chang’ che bo alamalyennyi, amata kobendat ak inendet.

⁶⁷ Kilenji anyun Jesu choto taman ak aeng’, Obendi ak okwek?

⁶⁸ Kowolji anyun Simon Petero, kolenji, Kiptaiyandani, kibendi ole mi ng’o? Itinye ng’alek che bo sobondab koigeny.

⁶⁹ Ak kigiyan ak kingen kele i Ne Tilil ne bo Jehovah.

⁷⁰ Kowolji Jesu ichek kolenji, Kima alewenok taman ak aeng’, ak oindet age eng’ okwek?

⁷¹ Kimwaei anyun agobo Judas ne bo gab Simon Iskariot, amu ine ne kimachei kong’wekta inendet, ne ki agenge eng’ taman ak aeng’.