JOHANA 5 - BUKUIT NE TILIL

Chi ne miani ne kimi tamboiyotab Betesda

¹ Kingobata tuguchu kobiit igorta ne bo Yahudik; ak kotogosta Jesu Jerusalem.

² Ak mitei Jerusalem tamboiyot, ne kainennyi ko Betesda eng’ kutitab Hebranik, ye negite ormarichetab kechirek; kitinyei keterusiek mut.

³ Kiruitos eng’ oloto bik che chang’ che kimiandos, che koriotin, che ing’waldos, che meiyotin, [kogeni wasetab beek:

⁴ amu kichorjingei malaikaiyat ne bo Kiptaiyat tamboiyot betusiek alak, kowendi kowasei beek: si kisoob chi age tugul ne sib kochutei ko kawasgei beek, eng’ miando age tugul ne kitinyei.]

⁵ Ak kimi yoto chito age, ne kiga komian kenyisiek sosom ak sisiit.

⁶ Ak ye kingogeer Jesu chichoto koruei, ak konai kole ki u noto eng’ betusiek che chang’, kolenji, Imache kisoobin?

⁷ Kowolji chito ne miani kolenji, Kiptaiyandani, matinye chi, ne indea tamboiyot, ko kawasgei beek: amu ye ta anyone, kosib kochortagei age.

⁸ Kolenji Jesu anyun, Ng’eet, ib itogung’ung’, ak iwe.

⁹ Ak kisob chichoto ngunoto, ak koib itogunnyi ak kwo. Ak ki sabato betunoto.

¹⁰ Kilenji anyun Yahudik inendet ne kagisoob, Betutab sabato nito, ma chamdaat eng’ ng’atutik iib itogung’ung’.

¹¹ Ago kiwolji ichek kolenji, Kamwawa inendet ne kagosooba, kolenja, Ib itogung’ung’, ak iwe.

¹² Koteebe anyun bichoto inendet kole, Ng’o chichoto kamwaun kole, Ib itogung’ung’ ak iwe?

¹³ Ago kima nai inendet ne kagisoobi kole ka ng’o: amu kiga kwo Jesu, amu kimi bik che chang’ oloto.

¹⁴ Kingobata noto konyorji Jesu inendet hekalut, ak kolenji, Keero, kagisoobin: amatata iyai tengek, si manyonjin kit age ne ya ne siirei ni.

¹⁵ Kiwa anyun chichoto, ak komwachi Yahudik kole Jesu ne kagosoob inendet.

¹⁶ Kius anyun Yahudik Jesu amu ng’olyondonito, amu kiyai tuguchu eng’ betutab sabato.

¹⁷ Ak kiwolji Jesu kolenji, Boisiei Baba agoi kora, ak aboisiei agane.

¹⁸ Kicheng’ anyun Yahudik mising’ kole kobar inendet amu nito, amu kima bistoe sabato kityo, ago mwaei kole Jehovah Kwandanyi, koyaegei kogergeit ak Jehovah.

Komwaei Jesu kole tiiegei inendet kwanda

¹⁹ Kiwolji anyun Jesu ichek kolenji, Amwawok, iman, iman, ale, Mayaei kiy Werit inegei, ago ne keerei koyaei Kwanda: amu tuguk tugul che yaei inendet, koyaei choto agine Werit ko u noto.

²⁰ Amu chamei Kwanda Werit, ak koborjin tuguk tugul che yaei inendet: ak ta koborjin boisionik che eechen che siirei chu, si kobiit okwong’ie.

²¹ Amu ko u ye ing’eeti Kwanda che kigobek ak kosoobi, isoobi Werit ko u noto agine che machei.

²² Amu ma iruokyin Kwanda chi age tugul, ago kigogochi Werit kiruoget tugul;

²³ si kobiit koteech tugul Werit, ko u ye teechei Kwanda. Inendet ne mateechei Werit ko mateechei Kwanda ne kiiyok inendet.

²⁴ Amwawok, iman, iman, ale, Inendet ne kasei ng’olyondennyu, ak koyani inendet ne kiiyokwa, kotinyei sobondab koigeny, ama wendi ole mi kiruoget, ago kagomong’ eng’ meet komong’ji sobondo.

²⁵ Amwawok, iman, iman, ale, Nyonei sait, ak kagoit, ye kas che kigobek kutitab Weritab Jehovah; ak soptos icheget che kasei.

²⁶ Amu ko u ye tinyei Kwanda sobondo inegei, u noto kigogochi Werit kotepto sobondo:

²⁷ ak kiigochi kimnatet koyai kiruoget, amu Weritab chi inendet.

²⁸ Amokwong’e nito: amu nyonei sait, ne tun kasei kutinnyi tugul che mi kererisiek,

²⁹ ak komong’; ng’eetyin sobondo che kiyaei ne mie; ak kong’eetyi kiruoget icheget che kiyaei ne ya.

Baornatet ne kibaoriani agobo Jesu

³⁰ Mamuchi ayai kiy anege: aruochi ko u ye agase, ak bo iman kiruogennyu; amu macheng’e ayai magennyu, ago magetab inendet ne kiiyokwa.

³¹ Ngabaorianjinige, ko ma bo iman baornatennyu.

³² Mi age ne baorianjina; ak angen ale bo iman baornatet ne baorianjina.

³³ Kioyokyi ng’olyot Johana, ak kibaorianji imanda.

³⁴ Ago baornatet ne ataache ko mabunu chi: ago amwae tuguchu, si kobiit kesoruok.

³⁵ Ki tait inendet ne kilalei kokweng’sei: ak kiocham oboiboitune lapkeiyennyi eng’ betusiek che matia.

³⁶ Ago baornatet ne atinye ko o kosiir ne bo Johana: amu boisionik che kigona Kwanda ages, choto che ayae, ko che baorianjina, kole kiiyokwa Kwanda.

³⁷ Ak kibaorianja Kwanda inendet ne kiiyokwa. Tom ogas kutinnyi ole kinye kora, ak tom ogeer itondanyi.

³⁸ Ama tebyei eng’ okwek ng’olyondennyi: amu moyani inendet ne kiiyogu Jehovah.

³⁹ Cham osiachi eng’ sirutik, amu olen otinye sobondab koigeny eng’ choto; ago choto che baorianjina;

⁴⁰ ago mochame obwanja, si kobiit konyoru sobondo.

⁴¹ Mataache kalosunet eng’ bik.

⁴² Ago angenok ale motinye chamnyetab Jehovah eng’ oring’wong’.

⁴³ Kianyo eng’ kainetab Baba, ama otaacha: ngo nyo age eng’ kainennyi otaache inendet.

⁴⁴ Omuchi eng’ nee oyan, che otaagege kalosunet, amocheng’e kalosunet ne bunu Jehovah ne mi inegei?

⁴⁵ Molen ang’andook eng’ Kwanda: mitei age ne ng’andook, Musa noto, ne omang’u.

⁴⁶ Amu nda kigoyan Musa, toyana; amu kisir agobo ane.

⁴⁷ Ago ngo moyani sirutikyik, omuktoi ano oyan ng’alekyuk?