JOHANA 4 - BUKUIT NE TILIL

Jesu koboto kobogoriotab Samaria

¹ Ye kingonai Kiptaiyat kole kigogas Parisaik kole kiyaei Jesu bik koek alamalyet ak kobatisani che siirei che kiibatisan Johana

² (ago ma Jesu inendet ne kiibatisanisiei, ago alamalyennyi),

³ kong’eet eng’ Judea, kwo kogeny Galili.

⁴ Ak ki kanyol kobun Samaria.

⁵ Kiit anyun nganaset ne bo Samaria, ne kiguure Sukar, ne negite koret ne kiigochi Jakobo werinnyi Josep:

⁶ ak kimi oloto keringetab beek ne bo Jakobo. Kitebyei anyun Jesu eng’ ye negite keringetab beek, amu ng’etatetab bandanyi. Ki olo bo sait lo.

⁷ Kinyo kobogoriot ne bo Samaria kosiil beek: kolenji Jesu, Inaga aee.

⁸ Amu kigaba alamalyennyi nganaset koal amitwogik.

⁹ Kilenji anyun kobogoriot ne bo Samaria, Katepto ano si isoma beek che iee, ak inye ko i Yahudiot, ak ane ko a kobogoriotab Samaria? (Amu manamegei Yahudik ak Samarik.)

¹⁰ Kowolji Jesu kolenji, Nda kengen konunetab Jehovah, ak inendet ne kalenjin, Inaga beek aee; ta kaisom inendet, ak ta kagogonin beekab sobon.

¹¹ Kolenji kobogoriot, Kiptaiyandani, metinye kit ne isiile, ak loo keringet: inyorjini ano anyun beechoto bo sobon?

¹² I o inye eng’ kwandanyo Jakobo, ne kigonech keringoni, ne kiee inendet, ak werikyik, ak tukyik?

¹³ Kowolji Jesu kolenji, Age tugul ne eei beechu ko ta koamei melel kogeny:

¹⁴ ago age tugul ne eei beek che agochini ko ma koamei melel agoi; ago egu beek che agochini kondab beek eng’ inendet, che kutu agoi sobondab koigeny.

¹⁵ Kolenji kobogoriot, Kiptaiyandani, inaga beechoto, si ma koama melel, si ma anyone asiile beek eng’ oli loo.

¹⁶ Kolenji Jesu kobogoriondonoto, Ui, iguur manong’otiondeng’ung’, ak obwa yuto.

¹⁷ Kowolji kobogoriot kolenji, Matinye manong’otiot. Kolenji Jesu, Kaimwa komie ile, Matinye manong’otiot:

¹⁸ amu kiotebi ak manong’otaik mut; ak inendet ne omi tuwai nguno ko ma manong’otiondeng’ung’: kaimwa anyun iman nito.

¹⁹ Kolenji kobogoriot, Kiptaiyandani, kaageer ale i maotio.

²⁰ Kisaei kwanisiekyok eng’ tulwoni; ak olen okwek, Jerusalem ole kanyol kosae bik.

²¹ Kolenji Jesu, Kobogoriondoni, iyana, nyonei sait, ye ma kosae Kwanda eng’ tulwoni, anan eng’ Jerusalem.

²² Osae ne mongen: kisae achek ne kingen: amu bunu yetunet Yahudik.

²³ Ago nyonei sait, ak kagoit nguno, ye saei Kwanda saik che bo iman eng’ tamirmiriet ak imanit: amu cheng’oti Kwanda che u choto koek che saei inendet.

²⁴ Jehovah ko Tamirmiriet: ak kanyol kosa inendet eng’ tamirmiriet ak iman che saei inendet.

²⁵ Kolenji kobogoriot, Angen ale nyonei Mesia (ne keguure Kristo): ye nyo inendet, komwawech tuguk tugul.

²⁶ Kolenji Jesu, A inendet ne ang’alalun.

²⁷ Kibwa anyun alamalyennyi; ak kikwong’io amu king’alali ak kobogoriot; ago ma mwachi chi kole, Icheng’e nee? Anan, Kalya si ong’alal ak inendet?

²⁸ Kibagakta anyun kobogoriot terennyi bo bei, ak kwo nganaset, ak komwachi bik kolenji,

²⁹ Obwa ogeer chito ne kamwawa tuguk tugul che kiayai atkinye kora: tos Kristo nito?

³⁰ Kimong’ anyun eng’ nganaset kobwa ole mi inendet.

³¹ Kingota kobwanei, kosom alamalyennyi, kole, Rabbi, amisie.

³² Ago kilenji ichek, Atinye amitwogik che aame che mongen.

³³ Kolenjigei anyun alamalyennyi, Tos kagoipchi chi kiy ne amei?

³⁴ Kolenji Jesu, Amitwogikyuk ko ayai magetab inendet ne kiiyokwa, ak agesu boisiennyi.

³⁵ Momwae okwek ole, Ta komi arawek ang’wanu, si koit kesisiet? Ogeero, amwawok ale, Oyot met, ak ogeer mbarenik, ole kagoleelagitu, kagoyam keges.

³⁶ Inendet ne kesei kotaachei melekto, ak koyumi logoek che bo sobondab koigeny; si koboiboitu tuwai ne kolei ak ne kesei.

³⁷ Amu bo iman mwaoni eng’ ni, Kolei age, kogesei age.

³⁸ Kiayoktok oges che kima onyalilji: kigonyalilji alage, ak kaonam okwek uuindab boisienywa.

³⁹ Kiiyan anyun inendet Samarik che chang’ che bo nganasanato amu ng’olyotab kobogoriot, ne kibaorian kole, Kamwawa tuguk tugul che kiayai atkinye kora.

⁴⁰ Noto anyun, ye kingobwanji inendet Samarik, kosom kole kotebi koboto ichek: ak kibeni oloto betusiek aeng’.

⁴¹ Ak kiiyan alak che chang’ amu ng’olyondennyi;

⁴² ak kilenji kobogoriot, Kiyani nguno, ma amu ng’aleleng’ung’: amu kagegasyige; ak kingen iman kele nito ko Yetindetab ng’ony.

Kosoobi Jesu weritab kiboitiotab kaplaitoriat

⁴³ Ak kingobata betusiechoto aeng’u kong’eet eng’ oloto kwo Galili.

⁴⁴ Amu kibaorian Jesu inendet kole, matinyei maotiondo teegisto eng’ emennyi.

⁴⁵ Ak kingonyo anyun Galili, kotaach inendet Galilik, ko kagogeer tuguk tugul che kiyai inendet eng’ Jerusalem eng’ igorta: amu kigaba agichek igorta.

⁴⁶ Kinyo anyun inendet kogeny Kana ne bo Galili, ole kiyae beek koek divaik. Ak kimi kiboitiot age ne bo kaplaitoriat, ne kimiani werinnyi eng’ Kapernaum.

⁴⁷ Ye kingogas kole kagomong’ Jesu eng’ Judea konyo Galili, kwo ole mi inendet, ak kisom kochorgei, kosoob werinnyi; amu ki negit kome.

⁴⁸ Kolenji anyun Jesu inendet, Ngot ko mogeer kaborunoik ak kwong’utik, ko magoi oyan matiny.

⁴⁹ Kolenji kiboitiondonoto, Kiptaiyandani, choruge kotom kome lakwennyu.

⁵⁰ Kolenji Jesu inendet, Ui inye; sobei wering’ung’. Koyan anyun chichoto ng’olyot ne kamwachi Jesu, ak kwo.

⁵¹ Ak ye kita kochortagei, kotuiyo ak otwogikyik, ak kolenji, Sobei wering’ung’.

⁵² Koteebe anyun kole kogaigaitu ko tia. Kolenji anyun bichoto inendet, Kobagakta eset inendet amut sait tisab.

⁵³ Konai anyun kwanda kole ko sainato ne komwachin Jesu kolenjin, Sobei wering’ung’: ak kiiyan inendet, ak gonnyi komugul.

⁵⁴ Noto kaborunet ne bo aeng’ ne kiyai Jesu koboch ng’omong’ eng’ Judea konyo Galili.