JOHANA 3 - BUKUIT NE TILIL

Ng’alalet kaboto Nikodemo

¹ Kimi chi ne bo Parisaik, ne kigiguure Nikodemo, ki bounindet ne bo Yahudik:

² kinyo chichoto ole mi inendet kemoi, ak kolenji, Rabbi, kingen kele i konetindet ne bunu Jehovah: amu mami chi ne imuchi koyai kaborunoichu iyae inye, ngo mami Jehovah koboto inendet.

³ Kowolji Jesu kolenji, Amwaun, iman, iman, ale, Ngot ko ma kisich chi eng’ siget ne leel, ko magoi imuch kogeer bounatetab Jehovah.

⁴ Kolenji Nikodemo inendet, Kisiktoi ano chi ye kagoosit? Imuchi kogetyigei moetab kamet kogeny, ak kesich?

⁵ Kowolji Jesu kolenji, Amwaun, iman, iman, ale, Ngot ko ma kisich chi eng’ beek ak Tamirmiriet, ko magoi imuch komong’ji bounatetab Jehovah.

⁶ Ne kigisich eng’ borto ko borto; ak ne kigisich eng’ Tamirmiriet ko tamirmiriet.

⁷ Amekwong’ amu kamwaun ale, Kanyol kesichok eng’ siget ne leel.

⁸ Usyin koristo ole machei, ak igase cheennyi, ago mengen ole bunu, anan ole wendi: ko u noto chi age tugul ne kagisich eng’ Tamirmiriet.

⁹ Kowolji Nikodemo kolenji, Imuchi kobiitunda ano tuguchu?

¹⁰ Kowolji Jesu kolenji, I konetindetab Israel, ameguitosi tuguchu?

¹¹ Amwaun, iman, iman, ale, Kimwae ne kingen, ak kebaorianjini ne kagegeer; amotaache baornatennyo.

¹² Ngamwawok tuguk che bo ng’ony, amoyani, omuktoi ano ogan ngamwawok tuguk che bo kipsengwet?

¹³ Mami chi ne kitogosta kipsengwet, kobate inendet ne kichorgei eng’ kipsengwet, inendet ko Weritab chi ne mi kipsengwet.

¹⁴ Ak ko u ye kiigartat Musa erenet eng’ ong’atet, kigartoti ko u noto Weritab chi matiny:

¹⁵ si konyor sobondab koigeny eng’ inendet age tugul ne iyani.

¹⁶ Amu kicham Jehovah ng’ony mising, kot kogoito Werinnyi ne kigii inegei, si malus age tugul ne iyani inendet, ago si konyor sobondab koigeny.

¹⁷ Amu kima iyokyi Jehovah Werit ng’ony koruokyi ng’ony; ago si kesor ng’ony eng’ inendet.

¹⁸ Magiruokyin chi ne iyani inendet: ago inendet ne maiyani, ko kagiruokyi, amu ma iyan eng’ kainetab Weritab Jehovah ne kigii inegei.

¹⁹ Ak ni kiruoget, amu kinyonji ng’ony lapkeiyet, ak kicham bik mesundeito kosiir lapkeiyet; amu ki yaach boisionikwak.

²⁰ Amu wechei lapkeiyet chi tugul ne yaei yaitio, ama nyonei inendet ole mi lapkeiyet, si mang’ang’ogis boisionikyik.

²¹ Ago nyonei ole mi lapkeiyet inendet ne yaei imanda, si kobiit kibarta boisionikyik, kele kigiyai eng’ Jehovah.

Baornatet ne bo aeng’ ne kibaorian Kabatisanindet agobo Jesu

²² Kingobata tuguchu konyo Jesu ak alamalyennyi emet ne kiguure Judea; ak kibeni oloto koboto ichek, ak kobatisanis.

²³ Ak kibatisanisiei Johana agine eng’ Aenon ne negite Salim, amu kimi beek che chang’ oloto: ak kibwa bik, ak kigibatisan.

²⁴ Amu kitom ketoorji Johana korgoret.

²⁵ Kibiit anyun teebutiet eng’ alak che bo alamalyetab Johana ak Yahudiot agobo katililet.

²⁶ Ak kibwanji Johana, ak kolenji, Rabbi, ibatisanisiei inendet ne kimi koboten eng’ Jordan komosin, ne kiibaorian agobo inendet, ak bwanjin inendet bik tugul.

²⁷ Kowol Johana kole, Magoi imuch chi kotaach kiy, ngo ma kigochi eng’ kipsengwet.

²⁸ Kiobaorianja okweget kole, kiamwa ale, Ma a Kristo, ago olen kigiyokwa andoune inendet.

²⁹ Sandet inendet ne tinyei mureret: ago baibai mising’ choruetab sandet, ne tononi koepchin it inendet, amu kutitab sandet: isuldaat anyun boiboiyoninyu.

³⁰ Nyoljin inendet koeet ne matiny, ago aming’initu.

³¹ O inendet ne bunu barak kosiir tugul: inendet ne bo ng’ony ko bo ng’ony, ak ng’alali che bo ng’ony: inendet ne bunu kipsengwet ko o kosiir tugul.

³² Baorianjin inendet kit ne kigogeer ak ne kigogas; ama mi chi ne taachei baornatennyi.

³³ Inendet ne kagotaach baornatennyi ko kagonde ng’oksennyi, kole bo iman Jehovah.

³⁴ Amu ng’alali ng’alekab Jehovah inendet ne kiiyogu Jehovah; amu magonu inendet Tamirmiriet eng’ karogendoet.

³⁵ Chamei Kwanda Werit, ak kigonde tuguk tugul eunnyi.

³⁶ Tinyei sobondab koigeny ne iyani Werit; ama keerei sobondo ne magase it Werit, ago tebe neregekab Jehovah baragunnyi.