JOHANA 21 - BUKUIT NE TILIL

Koborugei Jesu eng’ ole negite Araraita ne bo Tiberia

¹ Kingobata tuguchu koborjigei Jesu kogeny alamalyet eng’ araraita ne bo Tiberia; kiiborjigei ko u ni.

² Kimi tugul, Simon Petero ak Tomas ne kiguure Didumo, ak Natanael ne bo Kana ne bo Galili, ak werikab Sebedi, ak aeng’ alak che bo alamalyennyi.

³ Kolenji Simon Petero, Kawe aram njirenik. Kolenji chun alage, Kibendi agachek koboten. Koba anyun ak kolany moingetab beek: ak ma nam kiy kemounoto.

⁴ Ago ye kimachei koeech, kotonon Jesu eng’ ngegut: ago ma nai alamalyet kole Jesu.

⁵ Kolenji Jesu anyun, Lagochu, otinye kiy ne oame? Kowolji kolenji, Achicha.

⁶ Ak kilenji ichek, Owirji regereiywot ne kiname njirenik komostab tai ne bo moinget, si onyoru. Kowirji anyun, ak mata komuch kochuut amu chang’indab njirenik.

⁷ Komwachi age ne bo alamalyet, noto ne chamei Jesu, Petero, kolenji, Kiptaiyat nito. Ye kingogas anyun Simon Petero kole Kiptaiyat, kolaach kotit anyun (amu kimi ach ngor) ak kochorjigei araraita.

⁸ Ago kibwa chun alage che bo alamalyet kobunu moinget ne ming’in (amu kima ko looen eng’ ngegut, ago ki olo bo kakwautik che bo eut bogol aeng’), kochuutu regereiywondonoto mi njirenik.

⁹ Noto anyun, ye kingoit ngegut, kogeer eng’ yoto mat ne bo nesek, ak kiwatanat njiriot eng’ yoto, ak makatiat.

¹⁰ Kolenji Jesu, Oibu njirenik alak chu korame nguno.

¹¹ Kolany Simon Petero moinget, ak kochuut regereiywot konyo ngegut, ak ki nyiitat njirenik che eechen, bogol agenge ak konom ak somok: ak nganda ki chang’ njirenik mising’, ko kima kerer regereiywondonoto.

¹² Kolenji Jesu ichek, Obwa oamisie. Ak ma kany age tugul eng’ alamalyet koteebe kole, I ng’o? Amu kiingen kole, inendet ko Kiptaiyat.

¹³ Konyo anyun Jesu ak konam makatiat, ak kogochi, koboto njirenik agichek.

¹⁴ Nito ko ne bo somok koborjingei Jesu alamalyet, ko kagong’eet inendet komong’ eng’ che kibek.

Ng’alek che bo let che bo Jesu che kimwachi Petero

¹⁵ Ye kingo kagoamis anyun, kolenji Jesu Simon Petero, Simon, weritab Johana, tos ichama kosiir chu? Kolenji inendet, Ee, Kiptaiyandani, ingen ile achamin. Kolenji, Bai arekyuk.

¹⁶ Kolenji kogeny ne bo aeng’ Simon, weritab Johana, ichama? Kolenji, Ee, Kiptaiyandani, ingen ile achamin. Kolenji, Iyage kechirekyuk.

¹⁷ Kolenji ne bo somok, Simon, weritab Johana, ichama? Koarogen Petero amu kamwachi ne bo somok, kolenji, Ichama? Ak kolenji, Kiptaiyandani, ingen tuguk tugul; ingen ile achamin. Kolenji Jesu inendet, Bai kechirekyuk.

¹⁸ Amwaun, iman, iman, ale, Ye kita ko i ming’in, ko kiilaaksechinige, ak iwendi ole imache: ago ye tun iositu, iitoi euneguk, ak kolaakseun age, ak komutin ole memache.

¹⁹ Komwa ni, kobortoi ole teptoi meet ne konyite Jehovah. Ak ye kingo kagomwa nito, kolenji, Isubwa.

²⁰ Kowelelgei Petero, kogeer noto bo alamalyet ne chamei Jesu, kosubi; ne kitiiegei tegetab Jesu eng’ amisietab lagat, ak kolenji, Kiptaiyandani, ng’o inendet, ne ng’wektoin?

²¹ Kingogeer Petero inendet, kolenji Jesu, Kiptaiyandani, lyon chichi?

²² Kolenji Jesu, Ngot amach kotebi agoi tun anyo, image nee? Isubwa inye.

²³ Kiyom anyun ng’olyondoni tupchosiek, kole mameei chichoto age ne bo alamalyet: ago kima mwachi Jesu inendet, kolenji, mameei; ago kilenji, Ngot amach kotebi agoi tun anyo, image nee?

Ng’alek che bo let

²⁴ Nito anyun ko noto bo alamalyet ne baorianjin tuguchu, ak ne kisirei tuguchuto: ak kingen kele bo iman baornatennyi.

²⁵ Ak mi kogeny tuguk alak che chang’ che kiyai Jesu, che, nda kisirei age tugul, alen ta mayamei ng’ony bukusiek che kata kisirjin.