JOHANA 20 - BUKUIT NE TILIL

Kererit ne kima komi kiy

¹ Kinyo kererit Maria Magdalene, karon, ko kairir emet, eng’ betut ne bo tai ne bo wigit, ak kogeer koita ko kageisto eng’ kererit.

² Kolabat kot koit ole mi Simon Petero, ak noto age ne bo alamalyet, ne kichamei Jesu inendet, ak kolenji ichek, Kageib Kiptaiyat eng’ kererit, ama kingen ole kaginde.

³ Koba anyun Petero, ak nin age ne bo alamalyet, kotokyigei kererit.

⁴ Kiruai tuwai kibagenge: ak kilabat nin age ne bo alamalyet kondoe Petero, ak kosib koit kererit;

⁵ ak kingong’uruk kogeer orit, kogeer ngoroikab katanit ko itootin; ago mawa orit.

⁶ Konyo anyun Simon Petero agine, kosubu inendet, ak kwo kererit orit; ak kogeer ngoroik che bo katanit ko itootin;

⁷ ago anget ne kimitei metinnyi ko kima komi, koboto ngoroik che bo katanit, ago ki mamanat inegei eng’ oldo age.

⁸ Kiwa orit agine noto age ne bo alamalyet ne kiga sib koit kererit, ak kigeer ak kiiyan.

⁹ Amu kitom konai sirutiet ne kile, ng’eetei kogeny matiny eng’ che kibek.

¹⁰ Koba ga anyun kogeny choto bo alamalyet.

Koborjingei Jesu Maria

¹¹ Ago kitononi Maria eng’ kererit sang’, korirei: ak ye kita korirei, kong’uruk koiit kererit;

¹² ak kigeer malaikaisiek aeng’ che leelach ngoroik kotebyei ng’ony, age eng’ ole bo metit, ak age eng’ ole bo kelyek, eng’ ole kimi bortab Jesu.

¹³ Ak kilenji, Kobogoriondoni, kalya si irir? Kolenji, Amu kageib Kiptaiyandennyu, amangen ole kaginde inendet.

¹⁴ Ak ye kingo kagomwa ko u noto, kowelelgei, kogeer Jesu kotononi, ama konai kole Jesu noto.

¹⁵ Kolenji Jesu, Kobogoriondoni, kalya si irir? Icheng’e ng’o? Kiibwati kolen inendet ko ribindetab mbaret, ak kolenji, Kiptaiyandani, ngo kaiib inendet eng’ oli, imwawa ole kainde, si aib inendet.

¹⁶ Kolenji Jesu, Maria. Kowelelgei, ak kolenji eng’ kutitab Hebranik, Rabboni; ye kiweech kele, Konetindoni.

¹⁷ Kolenji Jesu, Ametwaa; amu tom atogosyi oldab Kwanda: ago ui ole mi tupchosiekyuk, ak ilenji, Atogosyini oldab Baba, ago Baba neng’wong’, Jehovah nenyu, ago Jehovah neng’wong’.

¹⁸ Konyo Maria Magdalene kolenji alamalyet, Kaageer Kiptaiyat: ak kagomwachi tuguchu inendet.

Koborjingei Jesu alamalyet

¹⁹ Ak ye kingoek lagat eng’ betunoto bo tai ne bo wigit, ye kiga keger kurgotik eng’ ole kimi alamalyet, amu kiiywei Yahudik, konyo Jesu kotonone kwenunywa ak kolenji, Ingoteb kalyet eng’ okwek.

²⁰ Ak ye kingo kagomwa nito, koborji eunekyik ak karastanyi. Koboiboitu anyun alamalyet, ye kingogeer Kiptaiyat.

²¹ Kolenji Jesu anyun kogeny, Ingoteb kalyet eng’ okwek: ko u ye kiiyokwa Kwanda, ayoktook ak okwek ko u noto.

²² Ak ye kingo kagomwa nito, kobusyi, ak kolenji, Otaach Tamirmiriet ne Tilil:

²³ bik alak tugul che onyochini kaat tengekwogikwak, kenyochin kaat; ak alak tugul che oesioi onyochi kaat, keesioi kenyochi kaat.

Koborjingei Jesu Tomas

²⁴ Ago kima komi Tomas ne kigiguure Didumo, ne ki age eng’ taman ak aeng’, koboto ichek ye kinyonei Jesu.

²⁵ Kolenji anyun chun alage che bo alamalyet, Kagegeer Kiptaiyat. Ago kilenji Tomas ichek, Ngot ko mageer eng’ eunekyik berutik che bo kipchumarisiek, ak ande mornennyu berutikab kipchumarisiek, ak ande eunnyu karastanyi, ko mayani.

²⁶ Ak kingobata betusiek sisiitu ko kimi go alamalyennyi kogeny, ak kimi Tomas koboto ichek. Kinyo anyun Jesu, ko kerotin kurgotik, ak kotonon eng’ kwenunywa, ak komwa kole, Ingoteb kalyet eng’ okwek.

²⁷ Kolenji Tomas, Iyogou morneng’ung’, ak igeer eunekyuk; ak iyogou eung’ung’ ak inde karastanyu; si meegu ne matinyei kayanet, ago iyan.

²⁸ Kowolji Tomas kolenji, Kiptaiyandennyu ak ko Jehovah nenyu.

²⁹ Kolenji Jesu inendet, Kaiyan amu kaigeera: iberurotin ichek che iyani ama keer.

Kit ne tokyingei Logoiywechu

³⁰ Kiyai Jesu kaborunoik alak che chang’ eng’ taitab alamalyet che ma sirotin eng’ bukuini:

³¹ ago kigisir chu, si kobiit oyan ole Jesu ko Kristo, Weritab Jehovah; ak si kobiit ye oyani onyoru sobondo eng’ kainennyi.