JOHANA 2 - BUKUIT NE TILIL

Katunisiet eng’ Kana

¹ Ak kimi katunisiet eng’ betut ne bo somok eng’ Kana ne bo Galili; ak kimi oloto kametab Jesu:

² ak kiga kiguurji katunisiet Jesu agine, koboto alamalyennyi.

³ Ak ye kingorar divaik, kolenji kametab Jesu inendet, Ma kotinyei divaik.

⁴ Ak kilenji Jesu inendet, Chebiosoni, kiting’ege nee ak inye? Tom koit sainnyu.

⁵ Kolenji kamet otwogik, Kiy age tugul ne kamwawok, oyai.

⁶ Ak kimi oloto terenik lo che eechen che bo beek, che bo koik, ko u biteetab katililetab Yahudik; kiyamei age tugul debeisiek mut anan ko lo.

⁷ Kolenji Jesu ichek, Onyiit beek terenichoto. Kiinyiit anyun mising’.

⁸ Ak kilenji, Osiilu nguno, ak oipchi bounindetab igorta. Ak kiipchi anyun.

⁹ Ak ye kingochamjam bounindetab igorta beek che kagoek divaik, ama nai ole kabunu (ago kiingen otwogik che kasiilei beek), koguur bounindonoto sandet,

¹⁰ ak kolenji, Igoitoi chi tugul divaik che miach korok; ak ye kagoee bik mising’, kogon che ma miach: kaigonor divaik che miach agoi nguno.

¹¹ Taunet nito ne bo kaborunoikyik ne kiyai Jesu eng’ Kana ne bo Galili, ak kiibortoi torornatennyi; ak kiiyan inendet alamalyennyi.

¹² Kingobata nito, kochortagei Kapernaum, koboto kamet, ak che tupcho, ak alamalyennyi: ak kibeni oloto betusiek che matia.

Kitilili hekalut

¹³ Ak kiga rik paska ne bo Yahudik, ak kitogosta Jesu Jerusalem.

¹⁴ Ak kinyor kotebei eng’ hekalut che kialdoi eik ak kechirek ak cheptugenik, ak walikab siling’isiek:

¹⁵ ak kiyai kipcharitit ne bo rogoonik che kisach, ak koon tugul komanda eng’ hekalut, koboto kechirek ak eik; ak koranda siling’isiek che bo walik, ak kogabui mesosiekwak;

¹⁶ ak kilenji icheget che kialdoi cheptugenik, Oib tuguchu koba eng’ oli; amoyai gotab Baba koek ole kiyae mung’aret.

¹⁷ Kiibwat anyun alamalyennyi kole kigisir kele, Ama ng’etkonda agobo gong’ung’.

¹⁸ Kiwolji anyun Yahudik kolenji, Iboruech kaborunet ngoro, amu iyae tuguchu?

¹⁹ Kowolji Jesu kolenji, Ong’em hekaluni, si ang’eet kogeny eng’ betusiek somok.

²⁰ Kile anyun Yahudik, Kigiteech hekaluni eng’ kenyisiek artam ak lo, ak ing’eeti inye eng’ betusiek somok?

²¹ Ago king’alali inendet agobo hekalut ne noto ko bortanyi.

²² Ye kinging’eet anyun inendet komong’ eng’ che kibek, kobwat alamalyennyi kole kiga komwa ng’olyondonito; ak kiiyan sirutiet, ak ng’olyot ne kiga mwa Jesu.

²³ Ye kimi Jerusalem eng’ paska, komi igorta, koyan bik che chang’, kainennyi, kogeerei kaborunoikyik che kiyai.

²⁴ Ago kima chamdagei Jesu, amu kiingen bik tugul,

²⁵ ak amu kima komage kiy chi ne baoriani agobo chi age; amu kiingen inendet kit ne mi chi orit.