JOHANA 19 - BUKUIT NE TILIL

Kogasyin Pilato ng’alek Yahudik

¹ Kinam anyun Pilato Jesu, ak kobire kipcharitit.

² Ak kitaa askarik ngatiet ne bo katok, ak konde metit, ak kolaakyi inendet ngoriet ne arus ne birir;

³ ak kobwa ole mi inendet kole, Kigatin, Laitoriatab Yahudik! Ak korabach inendet.

⁴ Ak kimanda Pilato kogeny, ak kolenji ichek, Ogeero, kamutwak inendet konyo taing’wong’, si onai ole ma anyorji ane lelut inendet.

⁵ Komong’ Jesu anyun konyo sang’, ko kerat metit eng’ ngatietab katok, kolaagonu ngorionoto arus ne birir. Ak kolenji Pilato bichoto, Ogeer chichi anyun-o!

⁶ Ye kingogeer anyun inendet tisiik che eechen ak kiptainik, kobolyo, kole, Igartat, igartat. Kolenji Pilato, Omut okwek inendet ak ogartat: amu ma anyorji lelut.

⁷ Kowolji Yahudik kolenji, Kitinye ng’atutiet, ak kanyol kome amu ng’atutionoto, amu kiyaigei koek Weritab Jehovah.

⁸ Ye kingogas anyun Pilato mwaonato, koiywei mising’;

⁹ ak kiwa Praitorium orit kogeny, ak kolenji Jesu, Ibunu ano? Ago ma wolji Jesu inendet.

¹⁰ Kolenji Pilato anyun inendet, Metwekwa? Mengen ile atinye kimnatet atiachin, ak atinye kimnatet agartatin?

¹¹ Kowolji Jesu kolenji, Kama ko tetinye kimnatet iyaiywa kiy, nda kama kigonin eng’ barak; noto anyun, tinyei inendet ne koindea euneguk tengekto ne o kosiir.

¹² Koboch yoto kocheng’ Pilato kotiach inendet: ago kibolyo Yahudik, kole, Ngot itiach chichi, ko ma i choruet ne bo Kaisari: renyei Kaisari chi age tugul ne yaegei koek laitoriat.

¹³ Ye kingogas anyun Pilato ng’alechuto, komut Jesu komong’ sang’, ak koteb ng’ony eng’ ng’echeretab kiruoget eng’ ole kiguure Tetetab Koik, ago kiguure eng’ kutitab Hebranik, Gabata.

¹⁴ Ki Chobetab paska betunoto: ak ki olo bo sait lo. Ak kilenji Yahudik, Ogeero, Laitoriandeng’wong’!

¹⁵ Kobolyo bichoto, kole, Iste inendet, iste, igartat inendet. Kolenji Pilato anyun ichek, Agartat Laitroriandeng’wong’? Kowol tisiik che eechen, kole, Magitinye laitoria kobate Kaisari.

¹⁶ Kogoito anyun Pilato inendet kigartat. Konam anyun ichek Jesu ak komut:

Kigartati Jesu

¹⁷ ak komanda, koibei inegei kimurtoiyot, agoi koit ole kiguure Koretab terta, ne kiguure eng’ kutitab Hebranik, Golgota:

¹⁸ ole kiigartate ichek inendet, koboto aeng’ alak, age komosi ak age komosi, ak kimi Jesu kwen.

¹⁹ Ak kisir anyun Pilato siret, ak konde kimurtoiyot. Kigisir kele, JESU NE BO NASARET, LAITORIAT NE BO YAHUDIK.

²⁰ Kosoman anyun Yahudik che chang’ sironito: amu ki negite nganaset ole kigigartate Jesu: ak kigisir eng’ kutitab Hebranik, ak Romanik, ak Yunanik.

²¹ Kolenji anyun tisiik che eechen che bo Yahudik Pilato, Amesir ile, Laitoriat ne bo Yahudik: ago, kimwa kole, A Laitoriat ne bo Yahudik.

²² Kowol Pilato kole, Kit ne kaasir ko kaasir.

²³ Ye kingo kagogartat anyun askarik Jesu, konam ngoroikyik, kopchei koek kebeberwek ang’wan, koib askarindet age tugul kebeberta age; ak ko u noto sumet agine: ak kima kotinyei sumet ole kigituiye, kiginab koek agenge kongeete barak agoi kapkelyen.

²⁴ Kolenjigei anyun ichegei, Amongegerer, ago ongeser barbarek, si kenai chito ne bunjin: si kosulda sirutiet ne mwaei kole, Kipchechigei ngoroikyuk, Ak kolotyigei ngoriennyu. Kiyai anyun askarik tuguchuto.

²⁵ Ago kitonondos eng’ ye negite kimurtoiyotab Jesu kamet, ak chepkametab kamet, Maria ne bo Klopa, ak Maria Magdalene.

²⁶ Ye kingogeer Jesu anyun kamet, ak noto ne bo alamalyet ne kichamei Jesu kotonondos eng’ yoto, kolenji kamet, Chebiosoni, keer wering’ung’!

²⁷ Kolenji anyun noto ne bo alamalyet, Keer komet! Ak koboch sainato komut inendet chebiosonato kwo gonnyi.

²⁸ Kingobata choto, ko kagonai Jesu kole kagogesgei tuguk tugul, si kobiit kosulda sirutiet, komwa kole, Ama melel.

²⁹ Kiga kinde yoto teret ne nyiitat siki: konyiit anyun sibonjit siki ak koyogochine husop, konde kutinnyi.

³⁰ Ye kingo kagotaach Jesu siki, komwa kole, Kagogesgei: ak koabuch metinnyi, ak kogoito tamirmiriennyi kwo.

Ketoore ng’otit karastab Jesu, ak Tube

³¹ Amu ki Chobet ak kima kemakyin muswek kotebe kimurtoiyot eng’ sabato (amu ki o betunoto bo sabato), kosom Yahudik Pilato kole keiri kelyekwak, si kesutei.

³² Kobwa anyun askarik, ak koiri kelyekab ne bo tai, ak ne bo age ne kiga kigartat koboto inendet.

³³ Ago ye kingobwa ye mi Jesu, ak kogeer kole kagome, ko mata koiri kelyekyik:

³⁴ ago kitoore ng’otit karastanyi age eng’ askarik, ak ngunoto komong’ korotik ak beek.

³⁵ Ak kibaorian inendet ne kigeer, ak ko bo iman baornatennyi: ak ingen inendet kole mwaei iman, si kobiit oyan ak okwek.

³⁶ Kiyaak tuguchu, si kobiit kosulda sirutiet ne kile, Magiiriei kowennyi.

³⁷ Ak kogeny mwaei sirutiet age kole, Tun keerei ichek inendet ne kitoorei.

³⁸ Ak kingobata tuguchu, kwo Josep ne bo Arimatea, ne ki age eng’ alamalyetab Jesu eng’ ung’ot, amu kiiywei Yahudik, kosom Pilato kole kosut mustab Jesu: ak kichamji Pilato. Konyo anyun koib bortanyi.

³⁹ Ak kinyo agine Nikodemo, ne kinyonji Jesu kemoi atkinye tai, koibu tuguk che u igomoik che kigiburukto nyamdutik alak, che ki olo bo ratilisiek bogol.

⁴⁰ Kisut anyun mustab Jesu, ak kotaa eng’ ngoroik che bo katanit koboto nyamdutik, ko u biteetab Yahudik ye tubisiei.

⁴¹ Kimi mbaret ole kigigartate inendet; ak kimi mbaranato kererit ne leel ne kitom ketupchi chi.

⁴² Kiinde anyun Jesu oloto amu betutab Chobetab Yahudik, amu ki negit kererit.