JOHANA 18 - BUKUIT NE TILIL

Kenamei Jesu

¹ Ye kingo kagomwa Jesu ng’alechu, koba ak alamalyennyi kolanda eng’ kererut ne kiguure Kedron, ole kimi mbaret, ole kiwa inendet, koboto alamalyennyi.

² Ak kiingen koronoto Judas agine, ne king’wektoi inendet: amu kicham kowendi Jesu yoto koboto alamalyennyi.

³ Ak kingo kagonyor Judas lugetab askarik, ak kiptainik che bunu tisiik che eechen ak Parisaik, kobwa kotinyei taisiek ak kegenganik ak karik che bo luget.

⁴ Kwo anyun Jesu, ko kagonai tuguk tugul che bwanjin inendet, ak kolenji, Ocheng’e ng’o?

⁵ Kowolji kolenji, Jesu ne bo Nasaret. Kolenji Jesu, A inendet. Ak kitononi koboto ichek Judas agine, ne king’wektoi inendet.

⁶ Ye kingomwachi anyun kole, A inendet, kobee batai, ak kobutyo.

⁷ Kiteebe anyun ichek kogeny, kole, Ocheng’e ng’o? Ak kole, Jesu ne bo Nasaret.

⁸ Kowol Jesu, kole, Kaamwawok ale a inendet; noto anyun ngocheng’a ounde chu koba;

⁹ si kosulda ng’olyot ne kimwa kole, Ma betena agot agenge eng’ choto kiigona.

¹⁰ King’us anyun Simon Petero rotwetab chok ne kitinyei, ak koeb otwogindetab tisiindet ne o, koeb itinnyi ne bo tai. Kigiguure otwogindonoto Malko.

¹¹ Kolenji Jesu anyun Petero, Weekyi rotwet choget: tos maee kikombet ne kagona Kwanda?

¹² Konam anyun luget ak kiptaiyat ne o, ak kiptainik che bo Yahudik, Jesu ak korat inendet,

¹³ ak komutyi Anas korok; amu ki kabyugoit ne bo Kaiapa, ne ki tisiindet ne o kenyinoto.

¹⁴ Kaiapa noto ne kiiborji Yahudik kole, nyolu komechi chito agenge bik.

Kotiitos Petero Jesu

¹⁵ Kiisub anyun Simon Petero Jesu, ak age ne bo alamalyet. Ak kiingengei tisiindet ne o ak noto ne bo alamalyet, ak kiba got orit koboto Jesu agoi kapkiruogetab tisiindet ne o;

¹⁶ ago kitononi Petero eng’ sang’ ye negit kurget. Kimanda anyun chichoto, age ne bo alamalyet, ne kiingengei ak tisiindet ne o, ak kong’alalji chepto ne kiribei kurget, ak kiimut Petero konyo go.

¹⁷ Kolenji anyun chepto ne kiribei kurget Petero, Ma i age eng’ alamalyetab chichi? Kole, Ma ane.

¹⁸ Ak kitonondos eng’ yoto otwogik ak kiptainik, che kiga kolaal mat ne bo nesek, amu ki kaitit; ak kiyue mat: ak kitononi Petero agine koboto ichek, koyue mat.

¹⁹ Kiteebe anyun tisiindet ne o Jesu agobo alamalyennyi ak konetisiennyi.

²⁰ Kowolji Jesu kolenji, Kiang’alalji ng’ony, amauny ng’olyo; kianetisie kotugul eng’ sunagogisiek, ak eng’ hekalut, ole tuiyechin Yahudik tugul; amamwa kiy eng’ ung’ot.

²¹ Amu nee si iteebena? Teebe ichek che kigas kit ne kiamwachi ichek: keero, ingen chu tuguk che kiamwa.

²² Ak ye kingo kagomwa ko u nito, korabach Jesu age eng’ kiptainik che kitonondos eng’ yoto, kole, Iwoljini tisiindet ne o ko u noto?

²³ Kowolji Jesu kolenji, Ngot ko kaamwa ne ya, ibaorian agobo noto ya: ago ngot ko mie, ko amu nee si irabacha?

²⁴ Kiiyokto anyun Anas inendet ko ratat kwo oldab Kaiapa, tisiindet ne o.

²⁵ Ak kitononi Simon Petero koyue mat. Kolenji anyun ichek inendet, Ma i age aginye ne bo alamalyennyi? Kotiiyo kole, Ma a inendet.

²⁶ Kole otwogindet age ne bo tisiindet ne o ne ki tilionut ak chichoto kiebei Petero itinnyi, Koma ageerin eng’ mbar omi ak inendet.

²⁷ Kotiiyo anyun Petero kogeny; ak eng’ sainato kote kipsoiywet.

Komi Jesu taitab Pilato, bounindet ne bo Rom

²⁸ Kiimut Jesu anyun kong’eete gab Kaiapa kwo Praitorium: ak kita ko karon mising’; ak maba icheget Praitorium orit, si ma ng’wonegitu, ago si kobiit koam paska.

²⁹ Kimanda Pilato anyun kwo ole mi ichek, ak kole, Nee ng’olyo ne oruokyine chichi?

³⁰ Kowolji kolenji, Nda ko ma ko chalwogin chichi, ta ko ma kimutu inendet konyo taing’ung’.

³¹ Kolenji Pilato ichek anyun, Onam inendet okwek, ak oruokyi ko u ng’atutieng’wong’. Kolenji anyun Yahudik, Ma chamdaat eng’ achek kebar chi age tugul:

³² si kobiit kosulda ng’olyotab Jesu, ne kimwa, koboru meet ole meitoi inendet.

³³ Kiwa anyun kogeny Pilato Praitorium orit, ak koguur Jesu, kolenji, Tos i Laitoriatab Yahudik?

³⁴ Kowolji Jesu kolenji, Imwae ng’olyondoni inyege anan komwaun alak agobo ane?

³⁵ Kowol Pilato kole, A Yahudiot? Kagomutun tainnyu bororieng’ung’ ak tisiik che eechen: kiiyai nee?

³⁶ Kowol Jesu, kole, Ma bo ng’onyuni laitornatennyu: nda bo ng’onyuni laitornatennyu, ko kata yaei boriet kiboitinikyuk, si ma kindea eunekab Yahudik: ago nguno ko ma bo laitornatennyu oli.

³⁷ Kolenji anyun Pilato inendet, Ara, i laitoriat so? Kowol Jesu kole, Imwae ile a laitoriat. Kigisicha amu nito, ak kianyo ng’ony amu nito, si kobiit abaorianji imanit. Kasei kutinnyu chi age tugul ne bo imanit.

³⁸ Kolenji Pilato, Nee imanit? Ak ye kingo kagomwa ko u ni, komanda kogeny ole mi Yahudik, ak kolenji, Ma anyorji ane lelut inendet.

³⁹ Ago otinye biteet, ole atiakwok age eng’ paska: ara omache atiakwok Laitoriatab Yahudik?

⁴⁰ Kobolyo anyun kogeny, kole, Ma chichi, ago Baraba. Ago anyun, ki rebindet Baraba.