JOHANA 17 - BUKUIT NE TILIL

Saet ne bo Jesu

¹ Kimwa Jesu ng’alechu; ak konyal kipsengwet, ak kole, Baba, kagonyo sait; itoror Wering’ung’, si kotororin Werit;

² ko u ye kiigochi inendet kimnatet koboi bik tugul, si kobiit kogochi sobondab koigeny tugul che kiigochi inendet.

³ Ak ni sobondab koigeny, ale konain Jehovah ne inyendet inyege ne bo iman, ak Jesu Kristo, ne kiiyogu.

⁴ Kiatororin eng’ ng’ony, amu kaagesu boisiet ne kiigona ayai.

⁵ Ak nguno, ee Baba, itorora eng’ inyendet inyege eng’ torornatet ne kiatinye kemi tuwai kotom kobiit ng’ony.

⁶ Kiaborji kaineng’ung’ bik che kiigona eng’ ng’ony: ki cheguk, ak kiigona; ak kigorib ng’olyondeng’ung’.

⁷ Kagonai nguno kole bunun tuguk tugul che kiigona;

⁸ amu kiagochi ichek ng’alek che kiigona ak kigotaach, ak kigonai iman kole kiabunu ole imi, ak kigoyan kole kiiyokwa.

⁹ Asae agobo ichek: masae agobo ng’ony, ago agobo ichek che kiigona; amu cheguk:

¹⁰ ak tuguk tugul chechuk ko cheguk, ak cheguk ko chechuk: ak kiitorora eng’ ichek.

¹¹ Ak ma amite ng’ony, ago mi ng’ony chu, ak anyone ole imi. Baba ne Tilil, rib eng’ kaineng’ung’ ichek che kiigona, si kobiit koek agenge, ko u achek.

¹² Kiarib eng’ kaineng’ung’ ichek che kiigona, ye kota kemi ak ichek: kiarib ichek, ama bet agot agenge eng’ ichek, kobate weritab luset; si kobiit kosulda sirutiet.

¹³ Ak kanyonjin nguno; ak amwae tuguchu eng’ ng’ony, si kobiit kosulda boiboiyennyu eng’ ichek.

¹⁴ Kiagochi ng’olyondeng’ung’; ak kawech ng’ony ichek, amu ma bo ng’ony, ko u ye ma bo ng’ony ane.

¹⁵ Masae ale imut ichek eng’ ng’ony, ago ale irib ichek eng’ inendet ne ya.

¹⁶ Ma bo ng’ony ichek, ko u ye ma bo ng’ony ane.

¹⁷ Itilil ichek eng’ imanit: imanit ng’olyondeng’ung’.

¹⁸ Ko u ye kiiyokwa anyo ng’ony, ko u noto kaayokte ichek koba ng’ony.

¹⁹ Ak atabanige agobo ichek si kobiit kitaban ichek eng’ imanit.

²⁰ Amasae agobo chu kityo, ago asae agobo ichek che tun iyana amu ng’olyondenywa;

²¹ si kobiit koek ichek tugul agenge; ko u ye imi inye Baba, eng’ ane, ak ane eng’ inye, si kobiit koteb ichek eng’ achek: si kobiit koyan ng’ony kole kiiyokwa.

²² Ak kaagochi ichek torornatet ne kiigona; si kobiit koek agenge ko u ye ki agenge achek;

²³ ane eng’ ichek, ak inye eng’ ane, si kobiit koek ichek che igesunotingei eng’ agenge; si kobiit konai ng’ony kole kiiyokwa, ak ichame ichek, ko u ye ichama.

²⁴ Baba, amache ale kotebi kobota eng’ ole ami, ichek che kiigona; si kobiit kogeer torornatennyu ne kiigona; amu kiichama kotom kelumda ng’ony.

²⁵ Ee Baba ne bo imanda, kima kongenin ng’ony, ago kiangenin; ak kigonai chu kole, kiiyokwa;

²⁶ ak kiang’ang’ji ichek kaineng’ung’, ak ta ang’ang’jini; si kobiit kotebe ichek chamnyet ne kiichamena, ak ane eng’ ichek.