JOHANA 16 - BUKUIT NE TILIL

¹ Kaamwawok tuguchu, si ma kinachak.

² Onok eng’ sunagogisiek: ee, nyonei sait, ne ibwati chi tugul ne barok kole, Ayachini Jehovah boisiet.

³ Ak yaei tuguchu, amu ma nai Kwanda, anan ane.

⁴ Ago kaamwawok tuguchu, si ye nyo sainywa, omuchi obwat ole kiamwawok agobo chuto. Ago kima amwawok tuguchu eng’ taunet, amu kiami kobotok.

⁵ Ago kawe nguno ole mi inendet ne kiiyokwa; ama mi age eng’ okwek ne teebena kole, Iwendi ano?

⁶ Amu kaamwawok tuguchu, ko kanyi mugulelwekwok arogenet.

⁷ Ago amwawok ne bo iman: mie eng’ okwek ngawe: amu ngo mawe, ko manyonjinok Kagaigaindet; ago ngot awe, ayokwok inendet.

⁸ Ak ye kagonyo inendet, kogikyi ng’ony agobo tengekto, ak imanda, ak kiruoget:

⁹ agobo tengekto, amu ma iyana;

¹⁰ agobo imanda, amu awendi ole mi Kwanda, ama ogeero kogeny;

¹¹ agobo kiruoget, amu kigiruokyi ne o ne bo ng’onyuni.

¹² Ta atinye tuguk che chang’ che kata ta amwawok, ago ma omuchi omuite nguno.

¹³ Ago ye tun kagonyo inendet, Tamirmiriet ne bo imanit, kondoiywok agoi oit imanda tugul: amu mamwaei inegei; ago mwaei tuguk tugul che kasei: ak kong’ang’wok tuguk che bwanei.

¹⁴ Itorora: amu namei chechuk, ak kong’ang’wok.

¹⁵ Chechuk tuguk tugul che tinyei Kwanda: noto kaamwa, ale, namei chechuk, ak koboruok.

Ng’alek che bo saisere

¹⁶ Tomo kitigin, si ma ogeera kogeny; ak mi kitigin kogeny, si ogeero.

¹⁷ Kong’alaljigei anyun alak eng’ alamalyennyi kole, Nee ni kamwawech kole, Mi kitigin, si ma ogeera; ak mi kitigin kogeny, si ogeera: ak, Amu awendi ole mi Kwanda?

¹⁸ Kole anyun, Nee ni kamwa kole, Mi kitigin? Magingen kit ne mwaei.

¹⁹ Kinai Jesu anyun kole, machei koteebe bichoto inendet, ak kilenji, Tos oteebege okwege agobo ng’olyondoni kaamwa ale, Mi kitigin, si ma ogeera, ak mi kitigin kogeny, si ogeera?

²⁰ Amwawok, iman, iman, ale, Orirtosi ak oteitosi, ago baibai ng’ony: oarogendosi, ago kiweechi arogeneng’wong’ koek boiboiyet.

²¹ Arogeni tamonet ye machei kosigis, amu kait sainnyi: ago ye kagosich lakwet, ko ma kobwati ng’wanindo kogeny, eng’ boiboiyet amu kagesikyi chi ng’ony.

²² Noto anyun otinye arogenet nguno: ago ta ageerok kogeny, ak boiboi mugulelwekwok, ama rebenok chi boiboiyeng’wong’.

²³ Ama oteebena kiy eng’ betunoto. Amwawok, iman, iman, ale, Ngot osom Kwanda kiy age tugul, kogonok eng’ kainennyu.

²⁴ Tom osom kiy eng’ kainennyu: osom, si onyoru, si kobiit kosulda boiboiyeng’wong’.

²⁵ Kaamwawok tuguchu eng’ kalewenaik: ago nyonei sait, ye ma ang’alalwok eng’ kalewenaik, ago aboruok komie agobo Kwanda.

²⁶ Osome betunoto eng’ kainennyu: amamwawok, ale ateebe Kwanda kiy agobo okwek;

²⁷ amu chamok inendet Kwanda, amu kiochama, ak kioyan ole kiabunu Kwanda.

²⁸ Kiabunu Kwanda, anyonji ng’ony: abagaktoi ng’ony kogeny, ak agetitege ole mi Kwanda.

²⁹ Kolenji alamalyennyi, Keero, ing’alali nguno komie kotook, ama imwae kalewenet.

³⁰ Kingen nguno kele ingen tuguk tugul, ama nyoljin chi koteebenen kiy: kiyani eng’ nito kele kiibunu Jehovah.

³¹ Kowolji Jesu kolenji, Oyani nguno?

³² Ogeero, nyonei sait, ee, kagonyo nguno, ye kiyestook, kwo chi tugul oldanyi, ak obagakta anege: ago mami anege, amu mi Kwanda kobota.

³³ Kaamwawok tuguchu, si kobiit onyorunena kalyet. Otinye nyalilda eng’ ng’ony: ago onyiganitu; amu kaaterter ng’ony.