JOHANA 15 - BUKUIT NE TILIL

Ketit ne bo sabibuk, ak temenik

¹ A ketit ne bo iman ne bo sabibuk, ak semberindet Baba.

² Tilei temet age tugul ne mi eng’ ane ne maiyiei logoek, ak kotilili temet age tugul ne yiei logoek si koi logoek alak.

³ O tililen nguno amu ng’alek che kaamwawok.

⁴ Omenya, ak amenyok. Ko u ye maimuchi temet koi logoek inegei, ngot ko mamenyei ketit; ko momuchi ak okwek, ngot ko momenya.

⁵ A ketitab sabibuk, ko o temenik: inendet ne menya, ak amenye inendet, ko noto ne yiei logoek che chang’: amu momuchi oyai kiy okwege ngo mami ane kobotok.

⁶ Ngo mamenya chi, kewirtoi inendet ko u temetab ketit, si koyaam; ak koyum bik, ak kowirji ma, ak kolalyo.

⁷ Ngot omenya, ak komenyok ng’alekyuk, osom anyun kiy age tugul ne omache, si keyaiywok.

⁸ Kigonyiti Baba eng’ nito, ye oiyie logoek che chang’; si oegu alamalyennyu.

⁹ Ko u ye kichama Kwanda, ko u noto kiachamak agane: otebi eng’ chamnyennyu.

¹⁰ Ngot oribe ng’atutikyuk, otebye anyun eng’ chamnyennyu; ko u ye kiarib ng’atutik che bo Baba, ak atebye eng’ chamnyennyi.

¹¹ Kaamwawok tuguchu, si kotebi eng’ okwek boiboiyennyu, si kobiit kosulda boiboiyeng’wong’.

¹² Ng’atutiennyu ni, ale ochamnye, ko u ye kiachamak.

¹³ Matinyei chi chamnyet ne siirei ni, ale kogoito chi sobondanyi agobo choronokyik.

¹⁴ O choronokyuk, ngot oyai tuguk che ang’atok.

¹⁵ Ma aguurenok otwogik; amu manaei otwogindet kit ne yaei kiptaiyandennyi: ago kaaguurenok choronok; amu kaang’ang’wok tuguk tugul che kiagase Baba.

¹⁶ Kima olewena, ago kialewenok, ak kiandeak, ale obe ak oii logoek, si kobiit kotebi logoekwok: si kobiit kogonok Kwanda kit age tugul ne osome eng’ kainennyu.

¹⁷ Ang’atwok tuguchu, ale ochamnye.

Ng’ony, ak Tamirmiriet ne bo Imanit

¹⁸ Ngo wechok ng’ony, onai ole kigowecha kotom kowechok.

¹⁹ Nda o bo ng’ony, ta chamei ng’ony chechik: ago amu mobo ng’ony, ago kialewenok eng’ ng’ony, kowechok ng’ony anyun amu noto.

²⁰ Obwat ng’olyot ne kiamwawok, Masiirei otwogindet kiptaiyandennyi. Ngot ko kiusa ane, kousok ak okwek; ngot ko kinam ng’olyondennyu, konami neng’wong’ agine.

²¹ Ago yaiywok tuguchu tugul agobo kainennyu, amu ma nai inendet ne kiiyokwa.

²² Nda kima anyo ang’alalji ichek, ta matinyei tengek: ago nguno ko matinyei kit ne itiagegei agobo tengektanywa.

²³ Inendet ne wecha ko kawech Baba agine.

²⁴ Nda kima ayai eng’ kwenunywa boisionik che kima yai chito age, ta kima kotinyei tengek: ago nguno ko kagogeerech ak kagowechech ane ak Baba.

²⁵ Ago, si kosulda ng’olyot ne kigisir eng’ Ng’atutikwak, kele, Kigowecha buch.

²⁶ Ago ye kagoit Kagaigaindet, ne tun ayokwok kobunu Kwanda, Tamirmiriet ne bo imanit, ne bunu Kwanda, konyo kobaorianja:

²⁷ ak obaoriani ak okwek, amu kiomi kobota koboch taunet.