JOHANA 14 - BUKUIT NE TILIL

Oret ne itei ole mi kwanda

¹ Amogochi mugulelwekwok koiimgei: oyani Jehovah, oyana agane.

² Mitei gorik che chang’ eng’ gotab Baba; nda kima ko u noto, ta kiamwawok; awendi achobwok koret.

³ Ak ye awe achobwok koret, anyone kogeny amutok; si ole ami omite ak okwek.

⁴ Ak ole awendi, ongen oret.

⁵ Kolenji Tomas, Kiptaiyandani, magingen ole iwendi; kinaitoi ano anyun oret?

⁶ Kolenji Jesu, A oret, ak iman, ak sobondo: manyonjin chi Kwanda, ama eng’ ane.

⁷ Nda kionaa, ta kionai Baba agine: ak kaonai inendet anyun koboch nguno, ak kaogeer inendet.

⁸ Kolenji Pilipu, Kiptaiyandani, iboruech Kwanda, si koyamech.

⁹ Kolenji Jesu, Kigitebi tugul ak okwek betusiek che chang’, ak tom inaa, Pilipu? Inendet ne kigogeera ko kigogeer Kwanda: imwae eng’ nee anyun, ile, Iboruech Kwanda?

¹⁰ Tos meyani ile ami eng’ Kwanda, ak Kwanda eng’ ane? Ng’alek che amwawok ko mamwae anege: ago Kwanda ne menya ne yaei boisionikyik.

¹¹ Iyana amu ami eng’ Kwanda, ak Kwanda eng’ ane: anan oyana agobo boisionik icheget.

¹² Amwawok, iman, iman, ale, Inendet ne iyana, koyaei agine boisionik che ayae; ak koyaei boisionik che eech eng’ chuto; amu awendi ole mi Kwanda.

¹³ Ak kit age tugul ne osome eng’ kainennyu, ayae, si kegonyit Kwanda eng’ Werit.

¹⁴ Ngot osom kiy age tugul eng’ kainennyu, ayae kioto.

Kiaroru kele kiyogu Tamirmiriet

¹⁵ Ngot ochama, oribe ng’atutikyuk.

¹⁶ Ak asom Kwanda, ak kogonok Kagaigaindet age, si kotebi kobotok koigeny,

¹⁷ noto Tamirmiriet ne bo imanit: ne maimuchi ng’ony kotaach; amu mageerei inendet, ama naei inendet: ago ongen inendet: amu tebyei kobotok, ak tun tebyei eng’ oring’wong’.

¹⁸ Mabagaktook ko u kibananok: anyonjinok.

¹⁹ Ta ko mi kitigin, si ma kogeera ng’ony; ago ogeera: amu asobe, osoptosi ak okwek.

²⁰ Eng’ betunoto onai ole ami eng’ Baba, ak okwek eng’ ane, ak ane eng’ okwek.

²¹ Inendet ne tinyei ng’atutikyuk, ak koribei, ko noto ne chama: ak inendet ne chama ko chamat eng’ Baba, ak achame inendet, ak ang’ang’jige inendet.

²² Kolenji Judas (ma Iskariot), Kiptaiyandani, kalya si ing’ang’weige, ama ing’ang’jige ng’ony?

²³ Kowolji Jesu kolenji, Ngo chama chi, korib ng’olyondennyu: ak kocham Baba inendet, ak kebwanji inendet, ak kemeny koboto inendet.

²⁴ Inendet ne machama ko maribei ng’alekyuk: ak ma nenyu ng’olyot ne ogase, ago bo Kwanda ne kiiyokwa.

²⁵ Kaamwawok tuguchu, kota ami kobotok.

²⁶ Ago inetok tuguk tugul Kagaigaindet, Tamirmiriet ne Tilil, ne iyogu Kwanda eng’ kainennyu, ak kobwatwok tugul che kaamwawok.

²⁷ Abagakwok kalyet; agonok kalyennyu: magonok ko u ye konu ng’ony. Amongoiimgei mugulelwekwok, anan koiyweis.

²⁸ Kaogas ko u ye kaamwawok ale, Awendi, ak anyone ole omi. Ngot ochama, ko oboiboi, amu awendi ole mi Kwanda: amu o Kwanda eng’ ane.

²⁹ Ak kaamwawok nguno kotom koyaak, si ye kagoyaak, oyan.

³⁰ Mang’alalwok mising’, amu nyonei ne o ne bo ng’ony: ama tinyei kiy eng’ ane;

³¹ ago si konai ng’ony kole achame Kwanda, ak ko u ye kigona Kwanda ng’atutiet, ayae ko u noto. Ong’eetye, kebe.