JOHANA 13 - BUKUIT NE TILIL

Kouni Jesu kelyekab alamlyet

¹ Ak ye kingo tom koit igortab paska, konai Jesu kole kagoit sainnyi ne wendi eng’ ng’ony kwo ole mi Kwanda, ko kagocham chechik che mi ng’ony, kocham anyun agoi betutab let.

² Ak eng’ saitab amitwogikab lagat, koga konde oindet ng’wektaet muguleldab Judas Iskariot, ne bo gab Simon,

³ ko kagonai Jesu kole kagonde Kwanda tuguk tugul eunekyik, ak kole kibunu Jehovah, ak wendi ole mi Jehovah,

⁴ kong’eet eng’ amitwogik, ak konde taban ngoroikyik, ak konam anget ne kiuusegei, kogermenegei.

⁵ Ak korong’ji beek sanit, ak kotoi koun kelyekab alamalyet, ak kouuse anganato kiga kermenegei.

⁶ Konyo anyun ole mi Simon Petero. Yeityo kolenji Petero, Kiptaiyandani, tos iuni inye kelyekyuk?

⁷ Kowolji Jesu inendet kolenji, Kit ne ayae, ko mengen nguno; ago tatun inae.

⁸ Kolenji Petero, Magoi iun kelyekyuk. Kowolji Jesu kolenji, Ngo maunin, ko magiting’ege kiy.

⁹ Kolenji Simon Petero inendet, Kiptaiyandani, ma kelyekyuk kityo, ago eunekyuk agichek ak metinnyu.

¹⁰ Kolenji Jesu inendet, Inendet ne kagoungei ko ma komachei koungei kogeny, kobate kelyekyik, amu iunot inne: ak ounotin okwek, ago ma okwek tugul.

¹¹ Amu kiingen ne kimachei kong’wekta inendet; kimwa amu noto kole, Ma ounotin tugul.

¹² Ak ye kingo kagoun anyun kelyekwak, ak konem ngoroikyik, ak koteb ng’ony kogeny, kolenji, Tos ongen ne kayaiywok?

¹³ Oguurena Konetindet, ak Kiptaiyat: ak omwae komie; amu a inendet.

¹⁴ Ngo ane anyun ne a Kiptaiyat ak Konetindet, ne kaun kelyekwok, ko kanyoljok ak okwek ounjige kelyek.

¹⁵ Amu kaboruok, si oyai ak okwek ko u ne kayaiywok.

¹⁶ Amwawok, iman, iman, ale, Ma o otwogindet kosiir kiptaiyandannyi; ama o inendet ne kigiyok kosiir inendet ne kiiyogu.

¹⁷ Ngonai tuguchu, ko oboiboi ngoyai.

¹⁸ Mamwae agobo okwek tugul: angen che kialewen: ago si kobiit kosulda sirutiet, ne kile, Inendet ne amei makatiandennyu, ko kagong’eet kwariandennyi koyaiywa ne ya.

¹⁹ Kasib amwawok koboch nguno kotom kosulda, si ye isulda, oyan ole a inendet.

²⁰ Amwawok, iman, iman, ale, Inendet ne taachei age tugul ne ayogu ko kataacha; ak inendet ne taacha ko kataach kinendet ne kiiyokwa.

Koboru Jesu ng’wektaindet

²¹ Kingo kagomwa Jesu ko u noto, konyor nyalilda eng’ tamirmiriennyi, ak kobaorian, kole, Amwawok, iman, iman, ale, Ng’wektaa age eng’ okwek.

²² Kogeergei anyun alamalyet, ama naei kole, ngo mwaei agobo ng’o.

²³ Ak kimi meset agenge ne bo alamalyennyi ne kitiiegei tegetab Jesu ne ki chamat eng’ Jesu.

²⁴ Kong’wech anyun Simon Petero inendet, kolenji, Mwawech, tos mwaei inendet agobo ng’o?

²⁵ Kolenji anyun ne kitiiegei tegetab Jesu, Kiptaiyandani, ng’o noto?

²⁶ Kowol Jesu anyun kole, Inendet ne agochini kererutiet, ye kaaburburte. Ak ye kingo kagoburburto kererutiet, kogochi Judas, ne bo gab Simon Iskariot.

²⁷ Ak kingo kagotaach kererutiet, kochut Setani inendet. Kolenji Jesu inendet anyun, Yai chokyi ne imache iyai.

²⁸ Koma konai chi eng’ che kimi amisiet kole kamwachi inendet agobo nee.

²⁹ Amu kilen alak eng’ ichek kalenji Jesu, Ial tuguk che kimachei eng’ igorta, amu kiting’oti Judas lolet; anan ko kalenji kogochi kiy kibanaok.

³⁰ Kingo kagotaach anyun inendet kererutiet, komanda ngunoto: ak ki kemoi.

Ng’atutiet ne leel ne bo chamnyet

³¹ Ye kingo kagomanda sang’, komwa Jesu kole, Kagitoror nguno Weritab chi, ak kagitoror Jehovah eng’ inendet;

³² ak tun itorori Jehovah inendet eng’ orinnyi; ak kotorori inendet eng’ sainato.

³³ Lagochu mengech, ta atebye kobotok ne matia. Tun ocheng’a: ak ko u ye kiamwachi Yahudik, alenji, Ole awendi, ko momuchi obwa; amwawok nguno ak okwek ko u noto.

³⁴ Agonok ng’atutiet ne leel, ale, ochamnye; ko u ye kiachamak, ochamnye ak okwek.

³⁵ Naei bik tugul kole o alamalyennyu, ngochamdosi.

Sib kemwaei kele machei Petero kotiiyo

³⁶ Kilenji anyun Simon Petero, Kiptaiyandani, iwendi ano? Kowolji Jesu kolenji, Ole awendi, ko memuchi isubwa nguno; ago tatun isubwa.

³⁷ Kolenji Petero, Kiptaiyandani, kalya si mamuchi asubun agot nguno? Agoitoi sobondanyu agobo inye.

³⁸ Kowolji Jesu kolenji, Igoitoi sobondang’ung’ agobo ane? Amwaun, iman, iman, ale, Kotom kote kipsoiywet, iesioa konyil somok.