JOHANA 12 - BUKUIT NE TILIL

Koiili Maria kelyekab Jesu eng’ Betania

¹ Ak kingota komi betusiek lo si koit paska konyo Jesu Bertania, ole kimi Lasaro, ne kiing’eeti Jesu komong’ eng’ che kibek.

² Kichopchi ichek eng’ oloto inendet amitwogik che bo lagat: koboisiechi Marta; ago kimi Lasaro koboto ichek che kiamisiei ak inendet.

³ Kiinem anyun Maria mwaita ne nyamdut ne bo ratilit agenge, ne bo kamanutiet ne o, ak koiile kelyekab Jesu, ak kouuse sumeekyik kelyekyik: ak kinyi got nyamdutiet ne bo mwaata.

⁴ Ago kile Judas Iskariot, ne ki agenge ne bo alamalyennyi, ne kimachei kong’wekta inendet,

⁵ Ko amu nee si ma kialdae mwai denarisiek bogol somok, si kigochi kibananok?

⁶ Kimwa ni anyun, ma amu kirire kibananok; ago amu ki chorin, ak kitinyei lolet, ak kiibei tuguk che mi orit.

⁷ Kole Jesu, Obagakte kogonorji betutab tubennyu.

⁸ Amu mi kibananok kobotok kotugul; ago mami ane ak okwek kotugul.

⁹ Kinai anyun bik che chang’ che bo Yahudik kole mi oloto: ak kibwa, ma agobo Jesu inegei, ago si kobiit kogeer Lasaro agine, ne kiga kong’eet inendet eng’ che kibek.

¹⁰ Ago kiiruoch tisiik che eechen kole kobar Lasaro agine;

¹¹ amu kiitabangei che chang’ che bo Yahudik, koba koyan Jesu amu inendet.

Kowendi Jesu Jesrusalem kilosunoti

¹² Ak eng’ betut ne kiisubi noto, ye kingogas tuiyet ne o ne bo bik che kigabwa igorta, kole nyonei Jesu Jerusalem,

¹³ konam temenik che bo sosik, ak koba kotorokta inendet, ak komwa eng’ kutit ne o kole, Hosanna: Iberurot inendet ne nyonei eng’ kainetab Kiptaiyat, noto Laitoriatab Israel.

¹⁴ Ak ye kingo kagonyor Jesu moitab sigiriet, kolany; ko u ye kigisir kele,

¹⁵ Ameiywei, inye, ee, cheptab Sion: keero, nyonei Laitoriandeng’ung’, kobunu moitab sigiriet.

¹⁶ Kima iguiyo alamalyennyi eng’ tai tuguchuto: ago kingo kagitoror Jesu, kobwat anyun ichek kole kigisir tuguchuto agobo inendet, ak kiga keyachi inendet tuguchuto.

¹⁷ Kibaorian anyun tuiyet ne kimi koboto inendet ye kiguurei Lasaro komong’ eng’ kererit, ak kiing’eet inendet eng’ che kibek.

¹⁸ Kiba anyun tuiyet amu noto kotorokta inendet, amu kigas kole kiga koyai kaborunoni.

¹⁹ Kimwachigei anyun Parisaik ichegei kole, Ogeero, ma oterter eng’ kiy: ogeero, kagosub inendet bik tugul che bo ng’ony.

Sometab Yunanik

²⁰ Ak kimi Yunanik alage eng’ che kigaba kotogosta kosa eng’ igorta.

²¹ Kibwa choto anyun ole mi Pilipu, ne bo Betsaida ne bo Galili, ak koteebe inendet kole, Kiptaiyandani, kimache kegeer Jesu.

²² Kinyo Pilipu komwachi Andrea: ak kibwa Andrea ak Pilipu komwachi Jesu.

²³ Ak kiwolji Jesu kolenji, Kait sait, ne kitorore Weritab chi.

²⁴ Amwawok, iman, iman, ale, Ngo mame baiywat ne ibutyin ng’ung’unyek, kotebyei inegei; ago ngo me, koiyiei che chang’.

²⁵ Inendet ne chamei sobondanyi kobeeti; ak inendet ne wechei sobondanyi eng’ ng’onyuni korib kot koit sobondab koigeny.

²⁶ Ngo boisiewa chi age tugul, ko nyolu kosubota; ak si ole ami, komi oloto agine kiboitiondennyu: ngo boisiewa chi, koteechei inendet Kwanda.

²⁷ Nyalili nguno sobondanyu; amwae nee anyun? Baba we, sorua eng’ saini? Ago kianyonji saini amu ng’olyondito.

²⁸ Baba, itoror kaineng’ung’. Kimong’ anyun kutit eng’ kipsengwet, kole, Kiatoror ak ta atorori kogeny.

²⁹ Kimwa anyun tuiyet ne kitononi eng’ oloto kogasei, kole, Katul: kole alak, Kang’alalji malaikaiyat.

³⁰ Kowolji Jesu kolenji, Kama nyo kutini agobo ane, ago agobo okwek.

³¹ Kabiit nguno kiruogetab ng’onyuni: ak kagitoorta anyun nguno ne o ne bo ng’ony komanda.

³² Ak ye kiuita eng’ ng’ony, amutyige bik tugul.

³³ Ago kimwa ni, kobortoi meet ole meitoi.

³⁴ Kiwolji anyun tuiyet inendet, kolenji, Kigegas eng’ Ng’atutik kele tebyei Kristo koigeny: teptoi ano anyun si imwa ile, Kanyol keuito Weritab chi? Ng’o Weroto bo chi?

³⁵ Kolenji Jesu anyun, Ta komi lapkeiyet eng’ kwenung’wong’ eng’ betusiek che matia. Obendoti ye ta otinye lapkeiyet, si ma namak mesundeito: ak inendet ne wendoti eng’ mesundeito ko manaei ole wendi.

³⁶ Ye ta otinye lapkeiyet, oyan lapkeiyet, si kobiit oegu werikab lapkeiyet. Kimwa Jesu tuguchu, ak kwo koung’egei ichek.

Maiyani bik alak eng’ Judea, koyani alak eng’ ung’ot

³⁷ Ago nga kiga koyai kaborunoik che chang’ che te cho eng’ tainywa, ko ma iyan inendet:

³⁸ si kobiit kosulda ng’olyotab maotiot Isaia, ne kimwa, kole, Kiptaiyandani, kiiyan ng’o ng’alekyok? Ak kigeng’ang’ji ng’o eutab Kiptaiyat?

³⁹ Ma imuch anyun koyan amu ng’olyondonito, amu kimwa Isaia kogeny, kole,

⁴⁰ Kigotuch inendet konyekwak, ak kigogochi inendet mugulelwekwak kouuegitu; Si ma keere konyekwak, anan konai eng’ mugulelwekwak, Ak koweek, Ak asoob ichek.

⁴¹ Kimwa tuguchu Isaia, amu kigeer torornatennyi; ak king’alal agobo inendet.

⁴² Ago kiiyan inendet che chang’ agot eng’ bounik; ago ma ng’any inendet amu Parisaik, si ma kion ichek eng’ sunagogit:

⁴³ amu kichamei kalosunetab bik kosiir kalosunetab Jehovah.

Koboru eng’ nwagindo konetisiennyi tugul

⁴⁴ Ak kimwa Jesu eng’ kutit ne o, kole, Inendet ne iyana, ko maiyana ane, ago iyani inendet ne kiiyokwa.

⁴⁵ Ak inendet ne keera kogeerei inendet ne kiiyokwa.

⁴⁶ Kianyo aegu lapkeiyet eng’ ng’ony, si ma kotebyei eng’ mesundeito chi age tugul ne iyana.

⁴⁷ Ak ngo kas chi age tugul ng’alekyuk, ama rib, ko maruokyini inendet: amu kima anyo aruokyi ng’ony, ago kianyo asoru ng’ony.

⁴⁸ Inendet ne esioa, ama taachei ng’alekyuk, kotinyei ne iruokyin: ng’olyot ne kiamwa, noto ne iruokyin inendet eng’ betutab let.

⁴⁹ Amu kima amwae anege; ago kigona Kwanda ne kiiyokwa, ng’atutiet, ne kanyol amwa, ak ne kanyol aamda.

⁵⁰ Ak angen ale sobondab koigeny ng’atutiennyi: tuguk che amwae anyun, ko ko u ye kimwawa Kwanda, amwae ko u noto.