JOHANA 11 - BUKUIT NE TILIL

King’eeti Lasaro eng’ che kibek

¹ Ak kimian chito age ne kiguure Lasaro, ne bo Betania, ne bo nganasetab Maria ak chepkamet Marta.

² Ak ki Maria nito ne kiil Kiptaiyat eng’ mwaita, ak kouuse kelyekyik sumeekyik, ne kitinyei ng’etab kamet, Lasaro, ne kimian.

³ Kiiyokyi chepkametwogichato inendet ng’olyot, kolenji, Kiptaiyandani, keero, miani inendet ne ichame.

⁴ Ago ye kingogas Jesu noto, kole, Ma bo meet mianoto, ago bo torornatetab Jehovah, ak kilosune Weritab Jehovah noto.

⁵ Ak kichamei Jesu Marta, ak chepkamet, ak Lasaro.

⁶ Kingogas anyun kole miani, kota kotebi betusiek aeng’ eng’ ole kimi.

⁷ Kingobatga nito anyun, kolenji alamalyet, Ongebe Judea kogeny.

⁸ Kolenji alamalyet, Rabbi, kocheng’ei Yahudik kolachin eng’ koik; ak iwendi olindo kogeny?

⁹ Kowol Jesu kole, Tos mami saisiek tamanu ak aeng’ eng’ betut? Ngo wendot chi bet, ko maginachi, amu keerei lapkeiyetab ng’onyuni.

¹⁰ Ago ngo wendot chi kemoi, kinachi, amu mami lapkeiyet eng’ inendet.

¹¹ Komwa tuguchu: ak ye ibata kolenji ichek, Inuuchi choruennyu Lasaro; ago awendi, si ang’eet inendet eng’ ruondo.

¹² Kolenji anyun alamalyet inendet, Kiptaiyandani, ngot konuuchi, ko kaga ta kosobei.

¹³ Ago kimwaei Jesu agobo meennyi: ak kilen ichek abere mwaei agobo ruondo ne kiga konuuch.

¹⁴ Kimwachi anyun Jesu ichek komie, kolenji, Kogome Lasaro.

¹⁵ Ago abaibai agobo okwek amu kima ami olindo, si kobiit oyan; ago ongebe ole mi inendet.

¹⁶ Kolenji anyun Tomas, ne kiguure Didumo, alamalyet chun alak, Ongebe ak achek, si kobiit kebegu ak inendet.

¹⁷ Ye kingoit Jesu anyun, konyor kole kiga kotebe kererit betusiek ang’wan.

¹⁸ Ki negite Betania Jerusalem, ki bo olo bo maelisiek aeng’;

¹⁹ ak kigabwanji che chang’ che bo Yahudik Marta ak Maria si kogaigai ichek agobo ng’etab kamet.

²⁰ Kingogas anyun Marta kole, nyonei Jesu, kwo kotorokta inendet; ago kita kotebi Maria eng’ go.

²¹ Kolenji Marta anyun Jesu, Kiptaiyandani, nda kiimi yu, ta kima komeei werit ne kitupche.

²² Ago angen agot nguno ale, kit age tugul ne isome Jehovah, kogonin Jehovah.

²³ Kolenji Jesu inendet, Ta kong’eetei ng’etab komet.

²⁴ Kolenji Marta inendet, Angen ale ng’eetei eng’ ng’eetyet ne bo betutab let.

²⁵ Kolenji Jesu, A ng’eetyet, ak sobondo: inendet ne iyana, agot ngo me, ko ta kosobei:

²⁶ ak chi age tugul ne sobei ak koyanan ko mameei matiny. Tos iyani inye nito?

²⁷ Kolenji, We, Kiptaiyandani; kaayan ale i Kristo, Weritab Jehovah, ne nyonei ng’ony.

²⁸ Ak ye kingo kagomwa nito cheboto, kwo, ak koguur Maria, chepkamet, eng’ ung’ot, kole, Mitei yu Konetindet; kuurin.

²⁹ Ak ye kingogas noto, kong’eet kochakta kwo ole mi inendet.

³⁰ (Ago kitomo koit Jesu nganasanato, ago kita komi ole kiga tuiyechi ak Marta.)

³¹ Kiisub anyun Yahudik cheboto, icheget che kimi koboto inendet eng’ go kogoigoi, ye kingogeer kong’eet Maria, ak kochakta komanda sang’, kolen wendi kererit korirei eng’ oloto.

³² Ye kingoit anyun Maria ole mi Jesu, ak kogeer inendet, kobutyi kelyekyik, ak kolenji, Kiptaiyandani, nda kiimi yu, ta kima komeei werit ne kitupche.

³³ Ye kingogeer Jesu anyun inendet korirei, ak korirtos agichek Yahudik che kigabwa koboto inendet, kogas king’wan eng’ tamirmiriet, koarogen,

³⁴ ak kole, Kionde ano? Kolenji, Nyo, Kiptaiyandani, keer.

³⁵ Korir Jesu.

³⁶ Kole anyun Yahudik, Ogeer anyun-o ole kichamdoi inendet!

³⁷ Ago kile alak eng’ ichek, Kiga temene chichi, ne kiyatei konyekab chito ne ki korat, koger si mame agine chichi?

³⁸ Kogas anyun Jesu king’wan kogeny eng’ orinnyi konyonei kererit. Ki kebenet, ak kigegere koita kurget.

³⁹ Kole Jesu, Oiste koita. Kolenji Marta, chepkametab inendet ne kime, Kiptaiyandani, kogobul: amu koboch ngome ko betusiek ang’wan.

⁴⁰ Kolenji Jesu inendet, Kama amwaun, ale, ngiyani, igeere torornatetab Jehovah?

⁴¹ Koisto anyun koita. Ak kiyot met Jesu ak kole, Baba, amwaun kongoi ale kaigasa.

⁴² Ak kaanai ale igasa eng’ ui tugul: ago kaamwa ni amu tuiyoni tononi eng’ yuto, si kobiit koyan kole kiiyokwa.

⁴³ Ak ye kingo kagomwa ko u noto, komwa eng’ kutit ne o, kole, Lasaro, mong’u.

⁴⁴ Komong’ anyun inendet ne kiga me, ko ratotin eunek ak kelyek eng’ ngoroik che bo kererit; ak kiga kirate togennyi anget. Kolenji Jesu bichoto, Otiach, ak ounde kwo.

⁴⁵ Kiiyan anyun inendet che chang’ che bo Yahudik che kigabwa ole mi Maria, ak kogeer tuguk che kayai Jesu.

⁴⁶ Ago kiba alak ole mi Parisaik, ak komwachi ichek tuguk che kagoyai Jesu.

Kochobei tisiik che eechen kobar

⁴⁷ Kiguur anyun kiruoget tisiik che eechen ak Parisaik, ak kole, Kiyai nee? Amu yaei chichi kaborunoik che chang’.

⁴⁸ Ngot kebagakte inendet ko u ni, koyani inendet bik tugul: asi kobwa Romanik korebenech emennyo ak bororiennyo.

⁴⁹ Ak kilenji age eng’ ichek, ne inendet ko Kaiapa ne ki tisiindet ne o kenyinoto, Mongen okwek kiy age tugul,

⁵⁰ mongen ole mieitu eng’ okwek ngo mechi bik chito agenge, si ma bet bororiet komugul.

⁵¹ Kima komwaei inegei noto: ago kimaoten amu ki tisiindet ne o kenyinoto, kole, komechi Jesu bororiet;

⁵² ma agobo bororiet inegei, ago si kobiit koyum lagokab Jehovah che yestootin si kobiit koek agenge.

⁵³ Koboch betunoto anyun ak kwo tai, koruogot agobo ole bartoi inendet.

⁵⁴ Mata kowendot Jesu anyun eng’ ole toogu eng’ ole mi Yahudik, ago kiwa eng’ oloto kwo emet ne negite surkwen, agoi nganaset ne kiguure Epraim; ak kitebi eng’ oloto koboto alamalyet.

⁵⁵ Kiga korik paska ne bo Yahudik: ak kiba che chang’ eng’ emet kotogosta Jerusalem kotom koit paska, koba koanyinygei.

⁵⁶ Kicheng’ anyun Jesu, ak kolenjigei, kotonondos eng’ hekalut, Obwati nee okwek? Tos olen manyonei inendet igorta?

⁵⁷ Kiga ng’at tisiik che eechen ak Parisaik, kole, ngo nai chi age tugul ole mitei, kobor, si kobiit konam ichek inendet.