JOHANA 10 - BUKUIT NE TILIL

Mestowot ne Mie

¹ Amwawok, iman, iman, ale, Chorin ak ko rebin inendet ne mabunei kurgetab biutab kechirek, ne lanyei oldo age.

² Ago mestowotab kechirek inendet ne bunei kurget.

³ Yatyin inendet ribindetab kurget; ak kasei kechirek kutinnyi: ak kuurei kechirekyik eng’ kainaikwak, ak kondoe ichek.

⁴ Ak ye kagomaanda inendet chechiget tugul koba sang’, kondoe, ak kosub kechirek inendet: amu ingen kutinnyi.

⁵ Ak machamei kosub toondet, ago mwee: amu manaei kutuswekab toek.

⁶ Komwachi Jesu ichek kalewenoni: ago ma iguiyo ichek kole nee tuguchoto kiga mwachi.

⁷ Kolenji anyun Jesu ichek kogeny, Amwawok, iman, iman, ale, A kurgetab kechirek.

⁸ Chorik ak ko rebik tugul che kiindounena: ago ma kas kechirek ichek.

⁹ A kurget: ngwo chi age tugul go ne buna ane, kesoru, ak kwo go, ak komanda sang’, ak konyor ole kiyage.

¹⁰ Nyonei chorindet si kochor, ak kobar, ak kong’em kityo: kianyo si kobiit konyor sobondo, ak kotepto sobonato inne.

¹¹ A mestowot ne mie: igoitoi mestowot ne mie sobondanyi agobo kechirek.

¹² Ago inendet ne otwogin, ne ma mestowot, ne ma chitab kobo kechirek, kogeerei konyonei suiyot, ak kobagakta kechirek, ak komwei, ak konam anyun suiyot ichek, ak koiyesta:

¹³ komwei inendet amu otwogin, ak mamage kiy kechirek.

¹⁴ A mestowot ne mie; ak angen chechuk, ak kongena chechuk,

¹⁵ ko u ye ingena Kwanda, ak angen Kwanda; ak agoitoi sobondanyu agobo kechirek.

¹⁶ Ak atinye kechirek alak, che ma bo biuni: kanyol aget choto agichek, si kogas kutinnyu: ak koek akwet agenge, ak mestowot agenge.

¹⁷ Chama anyun Kwanda amu noto, amu agoitoi sobondanyu, si kobiit anam kogeny.

¹⁸ Marebena chi, ago agoitoi anege. Atinye kimnatet agoito, ak atinye kimnatet anam kogeny. Kiataach ng’atutioni eng’ Baba.

¹⁹ Kibiit toiyet kogeny eng’ Yahudik agobo ng’alechuto.

²⁰ Ak kile che chang’ eng’ ichek, Tinyei oindet, ak koamei iywek; kalya si ogas inendet?

²¹ Kole alage, Ma bo ng’alechu chi ne tinyei oindet. Tos imuchi oindet koyat konyekab chito ne korat?

Jesu eng’ igortab katabanet

²² Ak kimi igortab katabanet eng’ Jerusalem: ak ki betusiekab kaititindo;

²³ ak kiwendot Jesu eng’ hekalut eng’ keterut ne bo Solomon.

²⁴ Kibwa anyun Yahudik koyiem inendet, kolenji, Igonech kigenisie eng’ saget kot kotianit? Ngo i Kristo, imwawech komie.

²⁵ Kowolji Jesu kolenji, Kiamwawok, amoyani: boisiosiek che ayae eng’ kainetab Baba ko choto che baorianjina.

²⁶ Ago moyani, amu mobo kechirekyuk.

²⁷ Kasei kutinnyu kechirekyuk, ak angen ichek, ak kosuba:

²⁸ ak agochini ichek sobondab koigeny; ak magoi lusyo, ama rebena chi ichek eng’ eunnyu.

²⁹ O Baba, ne kigona ichek, kosiir tugul; ama mi chi ne imuchi koreb ichek eng’ eutab Baba.

³⁰ Ane ak Kwanda, ko ki agenge.

Koromnatetab Yahudik

³¹ Kinam anyun Yahudik koik kogeny kolen kolach inendet.

³² Kowolji Jesu kolenji, Koaboruok boisiosiek che chang’ che miach che bunu Kwanda; olacha agobo boisio nee eng’ choto?

³³ Kowolji Yahudik inendet kolenji, Magilachin amu boisiet ne mie, ago amu chotisiet; ak amu inye ne i chi, iyaege iegu Jehovah.

³⁴ Kowolji Jesu bichoto, kolenji, Tos ma sirat eng’ Ng’atutieng’wong’ kele, Kiamwa ale, O cheptalelisiek?

³⁵ Ngo kigoguure inendet ichek cheptalelisiek, icheget che kinyonji ng’olyotab Jehovah (ama imugaksei kebut sirutiet),

³⁶ tos omwae agobo inendet, ne kiitaban Kwanda ak koyokto kwo ng’ony, olenjini, Ichotisiei; amu kiale, A Weritab Jehovah?

³⁷ Ngot ko mayai boisiosiekab Kwandanyu, ko mat oyana.

³⁸ Ago ngayai, ko agot ngo moyana, oyan boisiosiek: si kobiit onai ak oyan ole mi Kwanda eng’ ane, ak ane eng’ Kwanda.

³⁹ Kicheng’ anyun kogeny konam inendet: ago kibetito eng’ eunekwak.

⁴⁰ Ak kiwa kogeny Jordan komosin ole kiibatisanisie Johana eng’ tai; ak kitebi eng’ oloto.

⁴¹ Ak kibwanji che chang’ inendet; ak kole, Kima yai Johana kaborunet; ago tuguk alak tugul che kimwa Johana agobo chichi ko bo iman.

⁴² Ak kiiyan inendet che chang’ eng’ oloto.