JOHANA 1 - BUKUIT NE TILIL

Ng’alek che kindoune

¹ Eng’ taunet ko kimi Ng’olyondet, ak kimi Ng’olyondet ak Jehovah, ak ki Jehovah Ng’olyondet.

² Kimi inendet ak Jehovah eng’ taunet.

³ Kigiyai tuguk tugul eng’ inendet; ak kima kiyai kiy age tugul ne kiga keyai ne kima yai inendet.

⁴ Kimi sobondo eng’ inendet; ak ki lapkeiyetab bik sobonato.

⁵ Amu iluu lapkeiyet eng’ mesundeito; ak kima iterter mesundeito lapkeiyonoto.

⁶ Kinyo chi, ne kiiyok Jehovah, ne kigiguure Johana.

⁷ Kinyo chichoto koek baoriat, si kobaorianji lapkeiyet, si kobiit koyan bik tugul amu inendet.

⁸ Kima ko lapkeiyonoto inendet, ago kinyo si kobaorianji lapkeiyonoto.

⁹ Kimi lapkeiyet ne bo iman, ne nyonei ng’ony, ne iluuchin chi tugul.

¹⁰ Kimi ng’ony inendet, ak kigiyai ng’ony eng’ inendet, ak kima nai ng’ony inendet.

¹¹ Kinyonji chechik, ak kima taach inendet bikyik.

¹² Ago tugul che kitaach inendet, ko kiigochi kamuget koek lagokab Jehovah, ichek che iyani kainennyi:

¹³ che kigisich, ama eng’ korotik, anan eng’ magetab borto, anan eng’ magetab chi, ago eng’ Jehovah.

¹⁴ Ak kiek Ng’olyot borto, ak komeny kwenunnyo (ak kigigeer torornatennyi, torornatet ne u ne bo ne kigii inegei kobunu Kwanda), ko nyiitat mieindo ak imanit.

¹⁵ Kibaorianji inendet Johana, koititen kole, Inendet ni ne kiamwaitoi ale, Inendet ne isubwa koegu ne bo tai eng’ ane, amu ki bo tai inendet eng’ ane.

¹⁶ Amu kigitaach achek tugul che bo nyiiennyi, ak mieindo eng’ mieindo.

¹⁷ Amu kigigon Ng’atutiet eng’ Musa; kibwa mieindo ak imanit eng’ Jesu Kristo.

¹⁸ Mami chi ne kigeer Jehovah ole kigoi; kigong’ang’wech inendet Werit ne kigii inegei, ne mi tegetab Kwanda.

Baornatet ne kibaorianji Johana Kabatisanindet Jesu

¹⁹ Ak ni ko baornatetab Johana, ye kingoyok Yahudik tisiik ak Lawik eng’ Jerusalem koba koteebe kole, I ng’o inye?

²⁰ Ak king’any inendet, ama tiiyo; king’any kole, Ma a Kristo ane.

²¹ Ak kiteebe inendet kole, Nee anyun? I Elija? Ak kile, Ma a inendet. I maotiondonoto? Ak kiwol kole, Achicha.

²² Kilenji anyun inendet, I ng’o inye? Si kobiit kewolji che koiyokwech. Imwae nee agobo inyege?

²³ Kile, A kutitab chi ne ititeni eng’ surkwen, Olitit oretab Kiptaiyat, ko u ye kimwa maotiot Isaia.

²⁴ Ak icheget che kigiyok ko ki bo Parisaik.

²⁵ Ak kiteebe inendet, kolenji, Kalya anyun si ibatisanisiei, ngo ma i Kristo, anan Elija, anan maotiondonoto?

²⁶ Kowolji Johana bichoto kolenji, Abatisanisie beek: ago tononi eng’ kwenung’wong’ age ne mongen,

²⁷ inendet ne isubwa, ne manyoljina atiach anokab kweonikyik.

²⁸ Kiyaogis tuguchuto eng’ Betania Jordan komosin, ole kiibatisanisie Johana.

²⁹ Eng’ betut ne bo aeng’ kogeer Johana Jesu konyonjin, ak kole, Ogeero, Aruet ne bo Jehovah, ne ibei tengektab ng’ony!

³⁰ Inendet ni ne kiamwa ale, Isubwa chito ne egu ne tai eng’ ane: amu ki bo tai eng’ ane.

³¹ Ak kima angen ane inendet; ago si kobiit kibarta inendet eng’ Israel, kianyo anyun amu noto abatisane beek.

³² Ak kibaorian Johana, kole, Kiageer Tamirmiriet kochorugei eng’ kipsengwet ko u cheptuget; ak kotebe inendet.

³³ Ak kima angen inendet: ago inendet ne kiiyokwa abatisane beek, ko inendet ne kimwawa kolenja, Chichoto igeere kochorjingei Tamirmiriet, ak kotebe inendet, ko noto ne ibatisane Tamirmiriet ne Tilil.

³⁴ Ak kiageer, ak kiabaorian ale nito ko Weritab Jehovah.

Alamalyetab Kabatisanindet, ak Jesu

³⁵ Kogeny eng’ betut ne kiisubu betunoto, ko kitononi Johana, ak aeng’ che bo alamalyennyi;

³⁶ ak kigeerot inendet Jesu kowendoti, ak kole, Ogeero, Aruet ne bo Jehovah!

³⁷ Ak kigas choto aeng’ che bo alamalyennyi kong’alali inendet, ak kosub Jesu.

³⁸ Ak kiwelelgei Jesu, ak kogeer ichek kosubu, ak kolenji, Ocheng’e nee? Ak kilenji inendet, Rabbi (ye kiweech kele, Konetindet), imenye ano?

³⁹ Kolenji ichek, Obwa si ogeer. Kibwa anyun kogeer ole menyei, ak kitebi koboto inendet betunoto; ki olo bo sait taman.

⁴⁰ Ki Andrea, ne tupcho ak Simon Petero, age eng’ choto aeng’ che kigasei kong’alali Johana, ak kiisub inendet.

⁴¹ Kisib konyor Simon ne tupcho, ak kolenji, Kagenyoru Mesia (ye kiweech, ko Kristo).

⁴² Kiimutyi inendet Jesu. Kigeer Jesu inendet, ak kole, I Simon weritab Johana: ta keguurenen Kepa (ye kiweech, ko Petero).

⁴³ Kimach anyun kwo Galili eng’ betut ne kiisubi betunoto, ak kinyor Pilipu: ak kilenji Jesu inendet, Isubwa.

⁴⁴ Ak ki bo Pilipu Betsaida, nganaset ne bo Andrea ak Petero.

⁴⁵ Kinyor Pilipu Natanael, ak kolenji, Kagenyoru inendet, ne kisir Musa eng’ Ng’atutiet, ak maotik, Jesu ne bo Nasaret, weritab Josep.

⁴⁶ Ak kilenji Natanael, Tos imuchi kobun Nasaret kiy age tugul ne mie? Kolenji Pilipu inendet, Nyo si igeer.

⁴⁷ Kigeer Jesu Natanael konyonei ole mi inendet, ak kole agobo inendet, Ogeero, Israelindet iman, ne matinyei ng’alset!

⁴⁸ Kolenji Natanael inendet, Kenaena nee? Kowolji Jesu kolenji, Kageerin, ye kemi mogoiywet kel, kotom koguurin Pilipu.

⁴⁹ Kowolji Natanael kole, Rabbi, i Weritab Jehovah; i Laitoriatab Israel.

⁵⁰ Kowolji Jesu kolenji, Iyani amu kamwaun ale, kaagerin ye kemi mogoiywet kel? Tatun igeere tuguk che eechen che siirei chu.

⁵¹ Ak kilenji, Amwawok, iman, iman, ale, Tatun ogeere kipsengwet koyatoksei, ak kotogostoi malaikaisiek che bo Jehovah ak kochorjigei Weritab chi.