JOEL 3 - BUKUIT NE TILIL

Kiruokyin bororiosiek eng’ atabwet ne kitile ng’alek

¹ Amu, ogeero, tun ayumi bororiosiek tugul eng’ betusiechoto, ak eng’ betunoto, ye tun aweech kogeny che kiga keluul che bo Juda ak Jerusalem,

² ak amut ichek koba atebwetab Jeosapat; ak aruokyi ichek eng’ oloto amu bikyuk ak amu borotennyu Israel, che kigoseerji bororiosiek, ak kopchei emennyu.

³ Ak kigoser barbarek agobo bikyuk: ak kigogoito ng’etet agobo chepkugoniot, ak kialda chepto agobo divaik, si kobiit koee.

⁴ Ee Turo, ak Sidon, ak komoswek tugul che bo Pilistia, otile nee eng’ ane? Tos ogeerua kiy ne bo kageeret? Ak ngot ogeerua, aweekwok kioto konyo meting’wong’ eng’ yoto, eng’ chokyinet.

⁵ Amu ko u ye kioib fedaisiekyuk ak tahabusiekyuk, ak oib tugukyuk che kororon mising’ koba hekalusiekwok;

⁶ kioalde kogeny lagokab Juda ak lagokab Jerusalem oaldochi werikab Yunanik, si kobiit omut kolooegitu eng’ kiwotenywa:

⁷ ogeero, ang’eeti ichek komong’ eng’ ole kioaldochi, ak aweekwok konyo meting’wong’ kioto ogeerunena;

⁸ ak aalde werikwok ak tibikwok koba eutab lagokab Juda, ak koaldochi ichek bikab Sheba, bororiet ne loo: amu kagomwa Jehovah ng’olyondonito.

⁹ Omwaite ng’olyondoni eng’ bororiosiek; ochob luget: ong’eet bik che nyigonen; ingorik murenik tugul che bo luget, ingotogos.

¹⁰ Otany mogomboikwok che bo tuga koek rotokab chok, ak otany chepkesokwok koek ng’otwek: ingomwa ne nyalulat, kole, A kim.

¹¹ Ochogu, obwa, okwek bororiosiek tugul che omi komoswek tugul ak oyumge: ee Jehovah, igochi cheguk che nyigonen kochorgei kobwa yu.

¹² Ingong’eetgei bororiosiek, ak kobwa atebwetab Jeosapat: amu atebye eng’ oloto ak aruokyi bororiosiek tugul che mi komoswek tugul.

¹³ Ogese chepkeswet, amu kagorurio: obwa, otiech; amu kagonyi ole kitue divaik, ing’irtogei eng’ ole itendenjin, amu o yaitienywa.

Tun soru Jehovah Juda

¹⁴ Bik che chang’, bik che chang’ che mi atebwet ne kitile ng’alek! Amu kagorikyi betutab Jehovah atebwet ne kitile ng’alek.

¹⁵ Imenitu asista ak arawet, ama koluu kecheik,

¹⁶ ak boriseni Jehovah eng’ Sion, ak kotwek eng’ Jerusalem; ak botandos kipsengwetisiek ak ng’ony: ago egu Jehovah ole mwechin bikyik, ak koek irimet eng’ lagokab Israel.

¹⁷ Onai anyun ole a Jehovah Kamuktaindeng’wong’, amenye Sion tulwennyu ne tilil: tililitu anyun Jerusalem, ama kobunei toek kogeny.

¹⁸ Ak saune betunoto divaik che anyiny tulonok, ak rootune chego tulonok che mengechen, ak koroot beek che chang’ eng’ kererusiek tugul che bo Juda; ak komong’ kondametutab beek eng’ gotab Jehovah, ak kobis atebwetab Sitim.

¹⁹ Kuberi Misri, ak koek Edom ong’atet ne kigoguber, amu koromnatet ne kigiyachi lagokab Juda, amu kigotumda korotik che matinyei tengek eng’ emenywa.

²⁰ Ago tebyei Juda koigeny, ak kotebyei Jerusalem eng’ ibinwek tugul.

²¹ Ak aanyiny korotikwak che tom aanyiny: amu menyei Jehovah Sion.