JOEL 1 - BUKUIT NE TILIL

Ng’emisietab chereng’endet ne king’em emet

¹ Kinyonji ng’olyotab Jehovah Joel weritab Petuel, kole,

² Ogas ng’olyondoni, okwek boisiek, ak oeb it, okwek tugul che omenye emet. Tos kibiit nito eng’ betusiekwok, anan eng’ betusiekab kwanisiekwok?

³ Omwachi lagokwok agobo nito, ak ingomwachi lagokwok lagokwak, ak komwachi lagokwak ibinda age.

⁴ Kiam chereng’endet che kiituuch munene; ak kiam tinapchet che kiituuch chereng’endet; ak kiam masaek che kiituuch tinapchet.

⁵ Ong’eetye okwek kibogitinik, ak oririe; ak owaach, okwek tugul eeikab maiyek, amu maiyek che anyiny; amu kiistoi eng’ kutuswekwok.

⁶ Amu kagotogos emennyu bororiet ne kim, ne maiitoksei; kelekyik ko kelekab ng’etundo, ak kotinyei kipkermetok che bo ng’etundo ne o.

⁷ Kagong’em ketinnyu ne bo sabibuk, ak kobach mogoiywennyu: kigobony, ak kowirta; kagoleelagitu temenikyik.

⁸ Oteeiye ko u bergeiyat ne iyuegei kuniet agobo manong’otiotab ming’inatennyi.

⁹ Kageisto kagochinetab busiek ak kagochinet ne kieei eng’ gotab Jehovah; rirtos tisiik, kiboitinikab Jehovah.

¹⁰ Kagong’emak mbaret, rirei emet; amu kageng’em bek, kagoyaamnyo divaik che leelach, kagorarta mwanik.

¹¹ Olilanse, ee okwek kabatik, oteiye, ee okwek saborikab ketikab sabibuk, agobo nganok ak sairik; amu kagong’emak kesisiet.

¹² Kagoyaam ketitab sabibuk, ak kagores mogoiywet, kagoyaam ketitab logoek, koboto tiret agine, ak ketit age ne bo logoek, agot ketik tugul che bo mbar: amu kagores boiboiyet eng’ werikab bik.

¹³ Ogermenege kuniok, ak oteeiye, okwek tisiik; owaach, okwek kiboitinikab kaptisisiet; obwa, osieb kuniok kemout komugul, okwek kiboitinikab Kamuktaindennyu: amu kagiet kagochinetab busiek ak kagochinet ne kieei eng’ gotab Kamuktaindeng’wong’.

¹⁴ Otaban karugutetab ge, oguur tuiyet ne bo kaming’inetab ge, oyum boisiek koboto bik tugul che menyei emet kobwa gotab Jehovah Kamuktaindeng’wong’, ak orirji Jehovah.

¹⁵ Bwa amu betunoto! Amu kagorik betutab Jehovah, ak nyonei ko u ng’emisiet ne bunu Inendet ne bo Kamuktaet.

¹⁶ Tos ma kiisto amitwogik kegeerei, ee, koboto boiboiyet, ak kagasetab ge eng’ gotab Kamuktaindennyo?

¹⁷ Nundos keswek eng’ ng’ung’unyekwak; kagong’emogis chogenik, kagebut chogenik; amu kagoyaamnyo bek.

¹⁸ Tigendos tiong’ik ne tia! Kaiimgei akwotisiekab tuga, amu mami ole agete; ee, nyalildos akwotisiekab kechirek.

¹⁹ Ee Jehovah, arirjinin: amu kagoges mat suswekab ong’atet, ak kagolalyo ketik tugul che bo timin.

²⁰ Ee, isieng’jinin tiong’ikab timin: amu kagotenyo kererusiek ak kagoges mat suswekab ong’atet.