JEREMIA 9 - BUKUIT NE TILIL

Biret ne nyoru che maiyani

¹ Kata mie nda ka beek kityo metinnyu, kondametutab beekab kong’ konyekyuk, si kobiit arir bet ak kemoi agobo che kigibar che bo cheptab bikyuk!

² Kata mie nda katinye eng’ ong’atet ole menyei bik che rutoi; si kobiit abagakta bikyuk, ak awe! Amu icheget tugul koyaei ibetab ge, tuiyetab bik che iberberisiei.

³ Ak riichei ng’elyebwekwak ko u ye riichei kwangokwak, agobo lembechek; ak kagogimegitu eng’ emet, ago ma eng’ imanit: amu kong’eetye yaitiet koba yaitiet, amaingena, mwaei Jehovah.

⁴ Ingoribegei anyun chi tugul chitab kokwennyi, amat imang’u tupchet age tugul: amu tilei bich let tupchet age tugul, ak kochaamsoti chito age tugul ne bo kokwet.

⁵ Ak koberber age tugul, kokwennyi, ama mwaei imanit: kigonet ng’elyebwekwak komwa lembechek; birtogei koyai yaitiet.

⁶ Mi meng’oteng’ung’ kwenutab kaberberisiet; esioi konaa amu kaberberisiet, mwaei Jehovah.

⁷ Mwaei anyun Jehovah ne bo lugosiek ko u ni kole, Ogeero, abeele ichek kochootyo, ak atiem; nee kit age ne amuchi ayai, agobo cheptab bikyuk?

⁸ Kipchabet ne barisiei ng’elyebwekwak; mwaei kaberberisiet: ng’alaljin chi chitab kokwennyi eng’ kalyet, ago sapchin eng’ muguleldanyi.

⁹ Tos manyone abire ichek agobo tuguchu? Mwaei Jehovah: tos mayaaktachinige mugetut eng’ bororiet ne u ni?

¹⁰ Amu arire ak atei agobo tulonok, ak amosiseni agobo ole agete tuguk eng’ ong’atet, amu kagolalyo, kot ko ma kobunei chi; ama komuchi kogas bik kautetab tuga; kogomwei taritikab barak ak tiong’ik.

¹¹ Ak ayai Jerusalem koek karurugutik, ole menyei lelwek; ak ayai nganasokab Juda koek karatia, ole mamenyei chi.

¹² Ng’o chito ne ng’om ne imuchi koguiyo nito? Ak ng’o inendet ne king’alalji kutitab Jehovah, si kobiit komwaita? Amu nee anyun si kong’emak emet ak kolal ko u ong’atet, kot ko ma kobunei chi?

¹³ Ak mwaei Jehovah kole, Amu kigometo ng’atutiennyu ne kiande tainywa, ama kas it kutinnyu, ama bendate choto;

¹⁴ ago kibendate uuindab mugulelwekwak, ak kosub Baalik, che kiineti kwanisiekwak;

¹⁵ mwaei anyun Jehovah ne bo lugosiek, Kamuktaindetab Israel, ko u ni kole, Ogeero, abae bichuto ng’wonet, ak anage ichek beek che bo kipsegetetiet koee.

¹⁶ Ak ayestochi ichek bororiosiek, che kima nai ichek anan kwanisiekwak: ak ayokte rotwetab chok kosub ichek, kot agesu.

¹⁷ Mwaei Jehovah ne bo lugosiek ko u ni kole, Obwat, ak oguur kwonyik che rirtos, kobwa; ak oguur kwonyik che ng’omen, kobwa:

¹⁸ ak ingochok, ak koteeiyo agobo achek, si kobiit koba beekyok bo kong’, ak korong’gei beek eng’ konyekyok.

¹⁹ Amu kigasei tugetab kateeiyet kobunu Sion, kole, Kageng’emech ne tia! Kagetoptobense mising’ amu kagebagakte emet, amu kagobut ichek meng’otosiekyok.

²⁰ Ago ogas ng’olyotab Jehovah, okwek, ee kwonyichu, ak ingotaach itikwok ng’olyotab kutinnyi, ak onet tibikwok rirek, ak konet chi tugul chitab kokwennyi kateeiyet.

²¹ Amu kagonyo meet tirisiokyok, kagochut gorikyok che bo laitorinik; si koges lagok eng’ sang’, ak koges neranik eng’ ortinwek.

²² Ng’alal, ile, Mwaei Jehovah ko u ni kole, Ibutos muswek ko u ng’atatekab tuga eng’ kewanin, ak koigei turonik che yamei eutab kesindet, ama biitu chi ne iyumi.

²³ Mwaei Jehovah ko u ni kole, Amat kolosgei chito ne ng’om eng’ ng’omnatennyi, anan kolosgei chito ne kim amu kimnatennyi, amat kolosgei magoriot eng’ magornatosiekyik:

²⁴ ago ingolosgei eng’ ng’olyondoni inendet ne ilosugei, kole, ingena ak konaa, kole, a Jehovah ne boisie chamnyet ne tala, kiruoget, ak imanda eng’ ng’ony: amu aboiboitune tuguchuto, mwaei Jehovah.

²⁵ Ogeero, bwanei betusiek, mwaei Jehovah, ye tun abire tugul che kigimuratan eng’ kamuratanenywa ne ma kamuratanet;

²⁶ Misri, Juda, Edom, ak lagokab Amon, koboto Moab, ak tugul che biori metowekwak, che menyei ong’atet: amu ma imuratanotin bororiosiek tugul, ama imuratanotin mugulelwekab got tugul ne bo Israel.