JEREMIA 8 - BUKUIT NE TILIL

¹ Mwaei anyun Jehovah kole, Tun ibu ichek eng’ betunoto kowekab laitorinikab Juda, ak che bo bounikyik, ak che bo tisiik, ak che bo maotik, ak che bo che menyei Jerusalem, komong’une kererisiekwak:

² ak koma eng’ asista, ak eng’ arawet, ak eng’ taitab tuguk tugul che bo kipsengwet, che kiga kocham, ak kiga koot, ak che kiga kosubot, che kiga kocheng’at, ak che kiga kolos: magiyumi, anan ketub; egu keturek eng’ emet.

³ Ak kolewen meet kosiir sobet bik tugul che ng’etu, che ng’etune goito ya, che ng’etu eng’ komoswek tugul che kiaonji, mwaei Jehovah ne bo lugosiek.

Uuindab Israel eng’ tengkto

⁴ Imwachini kogeny ilenjini, Mwaei Jehovah ko u ni kole, Tos ibutos bik ama ng’eetos kogeny? Tos wa chi ama weeksei?

⁵ Amu nee anyun si kochuchuigei bichu bo Jerusalem eng’ kachuchuget ne bo agoi? Namei mising’ ng’alset, esioi koweek.

⁶ Kiaeb it agas, ago ma ng’alal ichek che bo iman: mami chi ne sigu eng’ yaitiennyi, kole, Koyai nee? Isubi chi tugul orennyi, ko u mbartanyit ye labati kochutei luget.

⁷ Ee, ingen kong’onyot eng’ soet betusiekyik; ak ribei cheptuget ak kibiswet ak cheptalamiat betusiekwak che bwanune; ago maingen bikyuk ng’atutietab Jehovah.

⁸ Omuktoi ano anyun omwa ole, Ki ng’omen, ak olen, kitinye ng’atutietab Jehovah? Ago, ogeero, kigoyai ng’alset kalamitab kaberberisiet ne bo sirik.

⁹ Ililandos bik che ng’omen, arogendos ak kenam: ogeero, kigoesio ng’olyotab Jehovah; ara anyun tinyei ng’omnatet ne u nee?

¹⁰ Agochini anyun bik alak osotikwak, ak agochi mbarenikwak bik che namei kobunji: amu koboch ne ming’in agoi ne o, kotinyei age tugul kasetab miat, ak yaei age tugul kaberberisiet koboch maotiot agoi tisiindet.

¹¹ Ak kigonya mookab cheptab bikyuk kobir barak, kolenjin, Kalyet, kalyet; ye mami kalyet.

¹² Tos kiililanso ye kingoyai tuguk che kiwechei? Achicha, ma ililanso agot kitigin, ama walogis togochikwak: ibutos anyun koboto icheget chek ibutos: tun kiwirtoi ichek eng’ betut ne kibirei, mwaei Jehovah.

¹³ Agesu ichek, mwaei Jehovah: mang’etu sabibuk eng’ ketik, ama ng’etu logoek eng’ mogoonik ak koresyo sogek; ak kobetyo eng’ ichek tuguk che kigagochi.

¹⁴ Amu nee si ketebi ak kesistosi? Oyumge, ak ongebe nganasok che ribotin, ak kesisye eng’ oloto: amu kagonech Jehovah Kamuktaindennyo kesisye, ak kogonech beekab kipsegetetiet kee, amu kigeyachi Jehovah tengekto.

¹⁵ Kigigen kalyet, ago ma nyo kiy ne mie; kigigen betutab kasoobet, ak keero, kibiit arogenet!

¹⁶ Kigasei eng’ Dan waagatab serunekab mbartanyisiekyik: botani emet komugul amu cheetab kateetab chechik che kimen; amu kagobwa, ak kagoam emet koboto tuguk tugul che kami; nganaset koboto che menyei orit.

¹⁷ Ogeer anyun-o, ayogu ndarok, erenok kobwa kwenung’wong’, che magigoigoi; ak kosusak, mwaei Jehovah.

Arogenetab maotiot agobo tengektab bikyik

¹⁸ Kata mie agaigaige si magase arogenet, tanui muguleldanyu.

¹⁹ Ogaso, kutitab rirekab cheptab bikyuk eng’ emet ne loo mising’; tos mami Jehovah Sion? Tos mami Laitoriatab nganasanato oloto? Amu nee anyun si kotacha kot anerech eng’ kanamonikwak che kiwaei, ak tuguk che ter che bo buch?

²⁰ Kagosiirto kesisiet, kagogesgei kemeut, ago tomo kesoruech.

²¹ Kigiguotena amu kaguotenetab cheptab bikyuk: a tuui; kaakwong’ mising’.

²² Tos mami mwanik che kinyaise Gilead? Tos mami chepkerichot oloto? Amu nee anyun si ma sob cheptab bikyuk?