JEREMIA 7 - BUKUIT NE TILIL

Amdaet eng’ kurgetab gotab Jehovah

¹ Kinyonji Jeremia ng’olyot ne kibunu Jehovah kolenji,

² Tonone kurgetab gotab Jehovah, ak imwaite eng’ yoto ng’olyondoni, ile, Ogas ng’olyotab Jehovah, okwek tugul che o bo Juda, che omandoe ormarichochu, obendi olosu Jehovah.

³ Mwaei Jehovah ne bo lugosiek, Kamuktaindetab Israel, ko u ni kole, Olitit ortinwekwok ak boisionikwok, si agonok omeny yuto.

⁴ Amomang’u ng’alekab lembech ole, Hekalutab Jehovah, hekalutab Jehovah, hekalutab Jehovah chuto.

⁵ Amu ngot olitit komie ortinwekwok ak boisionikwok; ak ngot oruoksechi komie chi ak chitab kokwennyi;

⁶ ngot ko mosastoe toondet, ak ne matinyei kwanda, ak mosoget, ak amotumde korotik che matinyei tengek eng’ olito, anan osubote chjeptalelisiek che ter ogochinege nyalilda:

⁷ agonok anyun omeny olito, emet ne kiagochi kwanisiekwok, koboch keny agoi koigeny.

⁸ Ogeero, omang’u ng’alekab lembech, che maimuchi kogon kelunet.

⁹ Tos ochorsei, orumisiei, ak oyae ibetab ge, ak oyostosi eng’ lembech, ak obeeljini nyamdutik Baal, ak osuboti cheptalelisiek che ter che mongen,

¹⁰ yeityo obwa otonone tainnyu eng’ goi, ne kimwaitoe kainennyu, ak ole, Kagesoruech; si kobiit oyai tuguchuto tugul kiwechei?

¹¹ Tos kaek goi kemwaitoe kainennyu kebenetab rebik eng’ taing’wong’? Ogeero ane, anendet ne kaageer, mwaei Jehovah.

¹² Ago oba nguno oldanyu ne kimi Silo, ole kiande kainennyu eng’ tai, ak ogeer kit ne kiayachi amu tengekwogikab bikyuk Israel.

¹³ Ara anyun, amu kioyai boisionichuto tugul, mwaei Jehovah, ak kiang’alalwok, ang’eete karon mising’ ak ang’alali, ago ma ogas; ak kiaguurok, ago ma owolu:

¹⁴ ayachini anyun goyoto, noto kimwaitoe kainennyu, ne omang’u, koboto komosta ne kiagonok ak kwanisiekwok, ko u ye kiayachi Silo.

¹⁵ Ak atimdak eng’ tainnyu, ko u ye kiatimde tupchosiekwok tugul, iyotet komugul ne bo Epraim.

Yaitietab saetab kanamonik

¹⁶ Amat isa anyun agobo bichu, anan irirji anan isachi, anan isaa: amu magasun.

¹⁷ Tos megeere tuguk che yaei eng’ nganasokab Juda ak eng’ ortinwekab Jerusalem?

¹⁸ Iyumi lagok kwenik, ak ilali mat kwanisiek, ak kokwonykwonyi makatinik kwonyik, si kobeelji laitoriatab kipsengwet, ne kwondo, ak korong’ji kagochinoik che kieei, cheptalelisiek, si kobiit kotacha anerech.

¹⁹ Tos tacha bichoto anerech? Mwaei Jehovah. Tos matachegei ichegei, si kogochigei kalilanet eng’ togochikwak?

²⁰ Mwaei anyun Kiptaiyat Jehovah ko u ni kole: Ogeero, kirong’jin olito neregekyuk ak neregekyuk che ng’wonen, kirong’jin bik ak tuga, ak ketikab timin, ak eng’ logoekab mbar; ak laldos, ama kimisi.

Kit ne kimachei ko kasetab it; ma korosiot

²¹ Mwaei Jehovah ne bo lugosiek, Kamuktaindetab Israel, ko u ni kole, Otesyi kagochinoikwok che kibeelei tiseiywek, ak oam banyek.

²² Amu kima ang’alalji kwanisiekwok anan ang’at ichek eng’ betut ne kiamutu komong’une emetab Misri, agobo kagochinoik che kibeelei ak tiseiywek.

²³ Ago kiang’at ichek agobo ng’olyondoni, alenji, Ogas kutinnyu, si aek Kamuktaindeng’wong’, ak oegu bikyuk: ak obendate oret tugul ne ang’atok, si kobiit komieit eng’ okwek.

²⁴ Ago ma kas, ama eb it, ago kibendate kiruogutikwak ak uuindab mugulelwekwak che yaachen, ak kituitui koba let, ma ba tai.

²⁵ Koboch betut ne kimong’ kwanisiekwok eng’ emetab Misri agoi rani, ko kiayokwok otwogikyuk tugul che maotik ang’eete kotugul karon ak ayogu ichek:

²⁶ ago ma kasa, ama eb it, ago kiiuuiit kaatinywa: kiyai ne ya kosiir kwanisiekwak.

²⁷ Ak mwachi ichek ng’alechuto tugul; ago magasin: iguure ichek kogeny, ago mawolun.

²⁸ Ak ilenji ichek, Nito bororiet ne ma epchi it kutitab Jehovah Kamuktaindenywa, ama taach kotigonet: kigobet imanda, ak kigeisto eng’ kutuswekwak.

Rirek agobo meetab bikab Juda

²⁹ Icheru sumeeguk anyun, ak iwirte, ak irirate eng’ tulonok che churiotin; amu kigoesio Jehovah ak kometo ibinda ne bo neregekyik.

³⁰ Amu kigoyai lagokab Juda kit ne ya eng’ tainnyu, mwaei Jehovah: kigonde tugukwak che kiwechei got ne kimwaitoe kainennyu, komuruon.

³¹ Ak kigoteech komoswek che tororen che bo Topet, ne mi atebwetab weritab Hinom, si kobeel werikwak ak tibikwak eng’ mat; ne kima ang’at, ne ma kuura met.

³² Keero, bwanei anyun betusiek, mwaei Jehovah, che ma keguure yoto Topet, anan keguure weritab Hinom, ago kiguure Atebwetab Barisiet; amu tun tubisiei ichek eng’ Topet, amu ma komi ole ketupchin.

³³ Ak koek muswekab bichu amitwogikab taritik che bo barak, ak che bo tiong’ikab ng’ony; ama biitu chi ne iyestoi.

³⁴ Agochini anyun kosis tugetab boiboiyet ak ne bo kagasetab ge, ne bo sandet ak ne bo mureret, eng’ nganasokab Juda, ak ortinwekab Jerusalem, amu egu emet karatia.