JEREMIA 6 - BUKUIT NE TILIL

Koyiemei bunik Jerusalem

¹ Omwei osoruge, okwek lagokab Benjamin, omong’u eng’ Jerusalem, ak oguut iriaget eng’ Tekoa, ak onamji barak kitab kaborunet eng’ Bet-hakerem: amu itu yaitiet eng’ murot ne bo katam, ak ng’emisiet ne o.

² Aistoi inendet, ne kararan, ak ko ng’arng’ar, cheptab Sion.

³ Bwanjin inendet mestowek ak kechirekwak; teechei emaisiekwak koyieme inendet; iyagisie age tugul komostanyi.

⁴ Ochob luget, obarge ak inendet; ong’eetye, ongetogoste bet kwen. Bwa eng’ achek! Amu kaimen, negit kororokta asista.

⁵ Ong’eetye, ongetogoste kemoi, keng’em gorikyik che bo laitorinik.

⁶ Amu kagomwa Jehovah ne bo lugosiek ko u ni kole, Oluul, oeb ketik, ak owasyi ng’ung’unyek Jerusalem: nito ko nganaset ne kibirei; sastaet inegei ne mi kwenunnyi.

⁷ Ko u ye kutune beek keringet, kutu ko u noto yaitiennyi: kigasei koromnatet ak ng’emisiet eng’ inendet; mi tainnyu kotugul miando ak ng’otobosiek.

⁸ Kas kotigonet, ee Jerusalem, si maistoenegei sobondanyu; si mayain iegu karatia, emet ne mamenyei chi.

⁹ Mwaei Jehovah ne bo lugosiek ko u ni kole, Turoti ichek komie che ng’etunotin che bo Israel ko u ketitab sabibuk: ketyi eung’ung’ kogeny kitongok ko u ne butei sabibuk.

¹⁰ Ang’alaljini ng’o, ak abaorianji, si kobiit kogas? Ogeero, ma kimuratan itikwak, amaimuchi koeb it: ogeero, kaek ng’olyotab Jehovah tewernatet eng’ ichek; maboiboitune.

¹¹ Kanyiia anyun neregek che ng’wonen che bo Jehovah; kaang’et aranye: rong’ji neregechoto lagok che mi oret, koboto tuiyetab murenik: amu kimuti manong’otiot ak osotiot, ne kigoosit koboto ne negit kolil.

¹² Ak kobunji gorikwak bik alak, koboto mbarenikwak ak osotikwak: amu achuuljini eunnyu bik che menyei emet, mwaei Jehovah.

¹³ Amu koboch ne ming’in agoi ne o eng’ ichek, kotinyei age tugul kasetab miat; ak yaei age tugul kaberberisiet koboch maotiot agoi tisiindet.

¹⁴ Kigonya kogeny mookab bikyuk kobir barak, kolenjin, Kalyet, kalyet; ye mami kalyet.

¹⁵ Tos kiililanso ye kingoyai tuguk che kiwechei? Achicha, ma ililanso agot kitigin, ama walogis togochikwak: ibutos anyun koboto icheget che ibutos: tun kiwirtoi eng’ betut ne anyonjini ichek abire, mwaei Jehovah.

Kaigai kasetab it kosiir korosiot

¹⁶ Mwaei Jehovah ko u ni kole, Otononie eng’ ortinwek ak ogeer, ak oteeb ortinwek che bo keny, ole mi oret ne mie, ak obendate noto, si osich kamuung’et eng’ sobonwekwok: ago kile, Magibendote ortinwechoto.

¹⁷ Ak kiande ribik koribok, che len, Oepchi it cheetab iriaget; ago kile, Magigase.

¹⁸ Ogas anyun, okwek bororiosiek, ak onai, ee okwek tuiyet, kit ne mi kwenunywa.

¹⁹ Ogas okwek ng’ony, ogeero, aipchini bichu yaitiet, logoekab kabwatutikwak, amu ma epchi it ng’alekyuk; ak kigoesio ng’atutikyuk.

²⁰ Tilei nee che nyamdut ngeibwa eng’ Sheba, ak tuguk che u mutwek che nyamdut che kiibune emet ne loo? Ma taachaksei kagochinoikwok che bo beelset, amachame tiseiywekwok.

²¹ Mwaei anyun Jehovah ko u ni kole, Ogeero, andoi taitab bichu kanagutik: ak konach kwanisiek koboto werik; ak kolus chitab kokwet koboto choruennyi.

²² Mwaei Jehovah ko u ni kole, Ogeero, bunu bik emet ne mi murot ne bo katam; king’eeti bororiet ne o ne bunu komoswek che looen che bo ng’ony.

²³ Tinyei kwanget ak ng’otit; koromen, ama tinyei rirenet; morori cheenywa ko u nyanjet, ak lanyei mbartanyisiek; chobot age tugul ko u chito ne wendi luget, kobokyinin, ee cheptab Sion.

²⁴ Kigegas kalosunenywa; kanyalulso eunekyok: kanamech bichiindo, ak ng’woninwek, che u che bo kwondo ne machei kosigis.

²⁵ Amemande iwe mbar, anan iwendote oret; amu mi rotwetab chok ne bo bunyot, ak kamuiset eng’ komosta age tugul.

²⁶ Ee cheptab bikyuk, igermenege kuniok, ak iburburege orek: itee, ko u ye kitechin werit ne kigii inegei, kateet ne ng’wan mising’; amu cheech ng’emindet.

²⁷ Koayain iegu ole kitobendoe ak irimet eng’ kwenutab bikyuk; si kobiit inai ak itiem orenywa.

²⁸ Ngelelik ichek tugul che yaachen, che bendi komosi ak komosi kochaamsoti; icheget ko sugunwet ak karnet: yaei tugul ng’emisiet.

²⁹ Kuutei kobanda mising’; laldos ngosielaisiek: itililisiei buch; amu magiisto kiptengeginik.

³⁰ Kuure bik ichek michikyigek che kigenendoe feda, amu kigoesio Jehovah ichek.