JEREMIA 51 - BUKUIT NE TILIL

¹ Mwaei Jehovah ko u ni kole, Ogeero, ang’eetyini Babulon koboto bik che menyei Leb-kamai, usonet ne ng’emisiei.

² Ak ayokyi Babulon toek che sesei; kowong’ tugul che mi emennyi: amu baregei ichek ak inendet eng’ betutab nyalilda kobunu komoswek tugul.

³ Amat koriich kwangennyi mwogindet, amat kong’eet kolaachi ngorietab luget: amorire neranikyik; ong’em lugennyi tugul ogesu.

⁴ Ak kobutyo ko kagobek eng’ emetab Kaldeik ko kagetoor eng’ ortinwekyik.

⁵ Amu magimetoi Israel, anan Juda, mametoi ichek Kamuktaindenywa, Jehovah ne bo lugosiek; nganda nyiitat emenywa ng’ogisto ne kiyachi Inendet ne Tilil ne bo Israel.

⁶ Omwei eng’ Babulon, ingosor chi age tugul sobondanyi; amat ongobarak tengektanyi: amu betutab yaaktaetab mugetut ne bo Jehovah; yaakyin inendet mugetut.

⁷ Ki kikombetab tahabu Babulon eng’ eutab Jehovah, ne kiigochi ng’ony komugul kobogit: kigoee bororiosiek divaikyik; amei anyun iywek bororiosiek amu noto.

⁸ Kagobut Babulon kochakta, ak keng’em: oteeiye amu inendet; oipchi mwanik che kinyae ng’wanindanyi, tamangab kosob inendet.

⁹ Kata kimache kisoob Babulon, ago ma sob: omete inendet, ak ongebe, kwo chi tugul emennyi: amu itei kipsengwet kiruogennyi, ak kaginamji barak agoi koit kipsengwet.

¹⁰ Kagomoong’ Jehovah imandanyo: obwa, kibarte eng’ Sion boisionikab Jehovah Kamuktaindennyo.

¹¹ Olit kipchabonik; onam long’onik komie: kagong’eet Jehovah tamirmirikab laitorinikab Medik; amu chobennyi ko kogirinda Babulon, kong’em: amu yaaktaetab mugetut ne bo Jehovah, yaaktaetab mugetut ne bo hekalunnyi.

¹² Onamji barak songoliet, otokyi irimoikab Babulon, ogimit ripset, onde ribik, ochob bik che sapchin: amu kagochob Jehovah ak koyai kit ne kimwa agobo bik che menyei Babulon.

¹³ Ee, inye ne menyei beek che chang’, ne chang’ mising’ konoraiguk, kait kagesuneng’ung’ karogendoetab mageng’ung’.

¹⁴ Kagoyosiechigei Jehovah ne bo lugosiek, kole, Anyiitin iman bik, che te tinapchet; ak kowaagenen ichek.

¹⁵ Kiyai ng’ony eng’ kamuktaennyi, kiigimit ng’onyuni eng’ ng’omnatennyi, ak kiito kipsengwetisiek eng’ naennyi:

¹⁶ ye twek, kobiit wasetab ge ne bo beek eng’ kipsengwetisiek, ak kogochi kibungweret kotogosta eng’ tabanwekab ng’ony: yachin ropta kalyelosiek, imoong’u usonet eng’ ole kigigonore.

¹⁷ Kergeitu chito age tugul ak tiondo ne matinyei naet; ililane kitang’indet age tugul ne bo tahabu kanamwennyi ne kigiwai: amu lembeita kanamwennyi ne kigitany, ama tinyei kabuset.

¹⁸ Buch choto, boisietab ng’alset: betos eng’ betut ne ityin birenywa.

¹⁹ Ma u chuto kebebertab Jakobo; amu bo tai inendet eng’ tuguk tugul; ak Israel ko bororietab borotennyi: kainennyi ko Jehovah ne bo lugosiek.

²⁰ Inye ko i aiywennyu ne bo boriet, ak karikab luget: ak atonatoni bororiosiek eng’ inye; ak abar bounatosiek eng’ inye;

²¹ ak atonatoni eng’ inye mbartanyit koboto chito ne lanyei;

²² ak atonatoni eng’ inye karitab luget koboto chito ne lanyei; ak atonatoni eng’ inye muren ak kwony; ak atonatoni eng’ inye boiyo ak neran; ak atonatoni eng’ inye muren ak tie;

²³ ak atonatoni eng’ inye mestowot ak akwennyi; ak atonatoni eng’ inye kabatindet koboto eikyik che bo chogit; ak atonatoni eng’ inye bounik ak kiptainik.

²⁴ Ak ayaakyini Babulon ak bik tugul che menyei Kaldea, yaitienywa tugul ne kiyai eng’ Sion eng’ taing’wong’, mwaei Jehovah.

²⁵ Keero, aborienen, ee inye tulwet ne ing’emisiei, mwaei Jehovah, ne ng’emei ng’ony komugul: ak achuul eunnyu atokyin, ak amilden eng’ ruandosiek, ak ayain iegu tulwet ne kigolal.

²⁶ Ak maibei eng’ inye koita ne bo luita, anan koib koita ne bo lumeiywek; ago iegu karatia koigeny, mwaei Jehovah.

²⁷ Onamji barak songoliet eng’ emet, oguut iriaget eng’ bororiosiek, ochob bororiosiek kobargei ak inendet, oguur bounatosiekab Ararat, ak che bo Mini ak che bo Askenas, kobargei ak inendet: olewen kiptaiyat ne baregei ak inendet; ogetu mbartanyisiek che u tinapchet.

²⁸ Ochob bororiosiek kobargei ak inendet, laitorinikab Medik, bounikyik, ak kiptainikyik tugul, koboto emet tugul ne bo bounatennyi.

²⁹ Ak kobotan emet ak komi eng’ ng’wanindo: amu tonondos chobutikab Jehovah che kichobei agobo Babulon, si kobiit koyai emetab Babulon koek karatia, ole mamenyei chi.

³⁰ Kigometo boriet murenikab Babulon che nyigonen, tebyei eng’ irimoikwak; kigobek nyiganatenywa; kagoigei kwonyik: kagobeel komoswekwak che menyei; kagoilyo temeleiywekyik.

³¹ Labati chito ne kiyoktoi koib baronok kwo kotuiyo ak age, ak kolabati chito ne kiyoktoi koib ng’alek kwo kotuiyo ak age, si koborji laitoriatab Babulon kolenji, kagenam nganasennyi eng’ komosta age tugul:

³² kagenam tabarwek, ak kagebeel morong’iot, ak kagoarogenso murenikab luget.

³³ Amu mwaei Jehovah ne bo lugosiek, Kamuktaindetab Israel, ko u ni kole: u cheptab Babulon ruanyut ne kiborse eng’ betut ne kitiechei; tomo kitigin, si konyonji betutab kesisiet.

³⁴ Kigoama Nebukadresar laitoriatab Babulon, kigotuatua, kigoyaa aek teret ne mami kiy, kigolugua ko u maswetit, kigonyiit moennyi tugukyuk che anyiny; kigotoorja sang’.

³⁵ Mwaei chi ne menyei Sion kole, Ingotebe baragutab Babulon koromnatet ne kigiyaiywa ak ne kigiyachi bikyuk; ak komwaei Jerusalem kole, Ingotebe baragutab bik che menyei Kaldea, korotikyuk.

³⁶ Mwaei anyun Jehovah ko u ni kole, Keero, ang’alaldoun, ayaaktoun mugetut; ak ayaam nyanjennyi, ak agochi koteny kondametunnyi ne bo beek.

³⁷ Ak koek Babulon karurugutik, ole menyei lelwek, ne kikwong’e, ak ne kirenyei, ne mamenyei chi.

³⁸ Borisendos ko u ng’etunyik che barnotik; morortos ko u arekab ng’etunyik.

³⁹ Ye tinyei tawirenet ichek, ayachini igortanywa, ak agochi ichek kobogityo, si koboiboitu, ak koruiyo ruondo ne bo agoi, ama kosu, mwaei Jehovah.

⁴⁰ Amutu ichek ko u arekab kechir che bendi ole kieng’se, ko u mengichik koboto kwesik.

⁴¹ Haa, kageluul Sesak! Ak kagenam kalosunetab ng’ony komugul! Kagoek Babulon karatia eng’ bororiosiek!

⁴² Kagonyonji nyanjet Babulon: kagotuch inendet chang’indab mildaetab ge ne bo beekyik.

⁴³ Kagoek nganasokyik karatia, emet ne yaamat, ak ko surkwen, emet ne mamenyei chi, ama bunei oloto lakwa ne bo chi.

⁴⁴ Aruokyini Bel eng’ Babulon, ak amoong’u eng’ kutinnyi kit ne kigolugui; ama korootei bororiosiek ko u beek kobendi oldanyi kogeny: ee, luulei irimetab Babulon.

⁴⁵ Omong’une bikyuk, kwenunnyi, ak osoruge chi tugul oistoege neregek che ng’wonen che bo Jehovah.

⁴⁶ Amongotanuiso mugulelwekwok, anan oiywei ng’alekab bik che kigasei eng’ emet; amu bwanei ng’alek eng’ kenyit age, ak ye ibata kobwa ng’alechato eng’ kenyit age, ak koromnatet eng’ emet, koborio bounindet age ak bounindet age.

⁴⁷ Ogeero, bwanei anyun betusiek che tun aruokyini kanamonik che kigiwai che bo Babulon, ak kolilan emonoto komugul; ak kobutyo eng’ kwenunnyi bikyik tugul che kigibar.

⁴⁸ Yeityo kotien eng’ boiboiyet kipsengwet ak ng’ony, ak tugul che mi oloto, agobo Babulon; amu bwanei bik che luulei inendet kobunu murot ne bo katam, mwaei Jehovah.

⁴⁹ Ko u ye kibarei Babulon Israel kobutyo, ko u noto ibutos eng’ Babulon bik che tun kibarei che bo emet tugul.

⁵⁰ Oba okwek, che kiochilile rotwetab chok, amotonon; obwat Jehovah omi ole loo, ak obwat Jerusalem.

⁵¹ Kililandosi, amu kigegas chotisiet; kigotuch togochikyok kalilanet; amu kagobwa toek komoswek che tililen che bo gotab Jehovah.

⁵² Ogeero, bwanei anyun betusiek, mwaei Jehovah, che karuokyini kanamonikyik che kigiwai; ak kotigendos eng’ emennyi tugul bik che kigiguoten.

⁵³ Agot nda togosta Babulon agoi kipsengwet, ak agot nda ng’ot tororindab kimnatennyi, ko ui tugul kobunwa bik che luulei inendet, mwaei Jehovah.

⁵⁴ Waagatab rirek ne bunu Babulon, ak ne bo ng’emisiet ne o ne bunu emetab Kaldeik!

⁵⁵ Amu luulei Jehovah Babulon, ak kong’em kutit ne bunu oloto; morortos beekwak che mildogei ko u beek che chang’, kagemwa bolatetab twegunenywa:

⁵⁶ amu kagonyonji inendet luulindet, kagonyonji Babulon, ak kagenam murenikyik che nyigonen, kagetonaton kwangokwak: amu Jehovah ko Kamuktaindet ne bo yaaktaetab mugetut, yaaktoi iman mugetut.

⁵⁷ Ak agochini kobogityo bounikyik ak murenikyik che ng’omen, koboto kiruogikyik ak kiptainikyik, ak murenikyik che nyigonen; ak koruiyo ruondo ne bo agoi, ama kogosu, mwaei Laitoriat, ne kainennyi ko Jehovah ne bo lugosiek.

⁵⁸ Mwaei Jehovah ne bo lugosiek ko u ni kole: Kigabui irimoik che tebeesen che bo Babulon kigesu, ak kebeel ormarichokyik che koen; ak kobirtogei bik buch, ak kobirtogei bororiosiek amu mat; ak kong’eetyo.

Ng’olyot ne kigiyoktoe Seraia

⁵⁹ Ni ng’olyot ne king’atyi maotiot Jeremia Seraia weritab Neria, weritab Maseia, ye kibendi Babulon koboto Sedekia, laitoriatab Juda eng’ kenyitab ang’wan ne bo laitornatennyi. Ki ribindet ne o Seraia eng’ gotab laitoriat.

⁶⁰ Ak kisirji Jeremia bukuit yaitiet tugul ne tun nyonjin Babulon, ng’alechuto tugul che kigisir agobo Babulon.

⁶¹ Ak kilenji Jeremia Seraia, Ye tun iit Babulon, ko kanyol isoman ng’alechuto tugul,

⁶² ak ile, Ee Jehovah, kiimwa agobo olito, ile iistoi, si mameny chi age tugul olito, chi anan ko tiony, ago egu karatia koigeny.

⁶³ Ak ye kaisoman bukuini igesu, iratyi koita, ak iwirji ainetab Euprate:

⁶⁴ ak imwa ile, Imaluuchi anyun beek Babulon ko u noto, ama kong’eetei kogeny amu yaitiet ne tun aipchini; ak kong’etyo. Igesunegei yuto ng’alekab Jeremia.