JEREMIA 50 - BUKUIT NE TILIL

Ng’alekab maoinatet agobo Babulon

¹ Ni ng’olyot ne kimwa Jehovah eng’ maotiot Jeremia agobo Babulon, agobo emetab Kaldeik.

² Omwaite eng’ bororiosiek ak obarte, ak onamji barak songoliet; obarte, amouny: ole, Kageluul Babulon, kagigochi Bel kolilan, kagoarogen Merodak; kagigochi kanamonikyik kolilanso, kagoarogenso kanamonikyik.

³ Amu nyonei bororiet eng’ murot ne bo katam kobokyin, ne yaei emennyi koek karatia, ama menyei chi oloto: kagomwei, kagoba tugul, chi ak tiony.

⁴ Bwanei eng’ betusiechoto ak eng’ betunoto, lagokab Israel, icheget ak lagokab Juda, mwaei Jehovah; bendi koririoti, ak kocheng’oti Jehovah Kamuktaindenywa.

⁵ Teeboti agobo ole teptoi Sion kotokyigei oloto, kolen, Obwa, ak onamge ak Jehovah eng’ kayomiset ne bo koigeny ne magiutie.

⁶ U bikyuk kechirek che betyotin: kiibeet mestowekwak ichek, kiimaas eng’ tulonok: kigoombeniot kong’eete tulwet ne o agoi ne ming’in, kigoutie oldanywa ole imuung’e.

⁷ Kigoam ichek bik tugul che kinyor ichek: ak kimwa bunikwak kole, Ma kilel, amu kigoyachi ichek tengekto Jehovah, meng’otetab imanda, Jehovah ne kamang’unetab kwanisiekwak.

⁸ Omwei eng’ Babulon, ak omande eng’ emetab Kaldeik, ak oige kwesik eng’ taitab akwotisiekab kechirek.

⁹ Amu, ogeero, ang’eeti tuiyetab bororiosiek che eechen che bunu emetab murot ne bo katam kobokyi Babulon: ak kotet luget kotokyigei emonoto; kiluulei eng’ oloto: u kipchabonikwak che bo chito ne nyigan, ne mwogindet; mami ne weeksei buch.

¹⁰ Ak keluul Kaldea: biyong’dos tugul che luulei, mwaei Jehovah.

¹¹ Amu ogasige, amu oboiboi, ee okwek che obokyini borotennyu, amu ourerendosi ko u roriat ne tiechei bek, ak oteei ko u mbartanyisiek che kimen;

¹² ililani komet mising’: toptoben inendet ne kisichok: ogeero, egu inendet ne letu eng’ tugul che bo bororiosiek, ong’atet, emet ne yaamat, ak surkwen.

¹³ Magimenyei amu neregekab Jehovah, ago egu karatia mising’: kwong’ei age tugul ne siirei ole negite Babulon, ak koreny korotwekyik tugul.

¹⁴ Otetge eng’ luget obar Babulon, eng’ komoswek tugul, okwek tugul che oriiche kwanget; omwok, amotuuch kipchabonik: amu kigoyachi tengekto Jehovah.

¹⁵ Owaage eng’ komoswek tugul; kagochamdagei; kagolulyo irimoikyik, kagolulyo inatusiekyik: amu nito yaaktaetab mugetut ne bo Jehovah; oyaakyi mugetut; ko u ye kiyai, oyachi inendet ko u noto.

¹⁶ Oiste letaindet eng’ Babulon, ak inendet ne kesisie chepkeswet eng’ betusiekab kesisiet: wendi chi age tugul eng’ ichek oldab bikyik, ak komwechi chi age tugul emennyi, amu kaiyweisietab rotwetab chok ne usisiei.

¹⁷ U Israel kechirek che kigoiyesta; kigoon ng’etunyik inendet: kisib koam inendet laitoriatab Asuria; ak eng’ let koiri kowekyik Nebukadresar, nito laitoriatab Babulon.

¹⁸ Mwaei anyun Jehovah ne bo lugosiek, Kamuktaindetab Israel, ko u ni kole: Ogeero, abire laitoriatab Babulon ak emennyi, ko u ye kiabir laitoriatab Asuria.

¹⁹ Ak aweech Israel kogeny konyo ole agetye, ak koyagisie Karmel ak Basan, ak kobiyo sobondanyi eng’ tulonokab Epraim ak eng’ Gilead.

²⁰ Kicheng’ei tengektab Israel eng’ betusiechoto ak eng’ kenyisiechoto, mwaei Jehovah, ama kinyoru; ak kicheng’ei tengekwogikab Juda, ama kinyoru: amu anyochini kaat ichek che abagaktoi kong’et.

²¹ Togoste emetab Merataim, obarge, obarge ak nganasanato, ak bik che menyei Pekod: bar ak ing’em igesu iyotenywa, mwaei Jehovah, ak iyai ko u tugul che kaang’atin.

²² Mitei emet bolatetab boriet, ak ne bo ng’emisiet ne o.

²³ Kibetita ano ak koildo ano kiriswetab ng’ony komugul! Kiegundo ano Babulon karatia eng’ bororiosiek!

²⁴ Kaariich mestet agobo inye, ak kageluulin kogeny, ee Babulon, ak kima inai: kogenyorun, kogenamin kogeny, amu kioborie ak Jehovah.

²⁵ Kogoyat Jehovah ole konore karikyik che bo luget, ak kogonem karikab neregekyik: amu tinyei Kiptaiyat, Jehovah ne bo lugosiek, boisiet ne yaei eng’ emetab Kaldeik.

²⁶ Obwa obarge ak inendet che obunu kiwotosiek che looen, oyat chogenikyik: oyum inendet ko u karurugutik ak ong’em ogesu: amat kong’et kiy nenyi.

²⁷ Obar kirugikyik tugul; ochoorte koba ole kieng’se: bwa ichek! Amu kagoit betunywa, betut ne ityin ichek biret.

²⁸ Kutitab ichek che mweei ak kochililyo komong’ eng’ emetab Babulon, si kobiit kibarta eng’ Sion yaaktaetab mugetut ne bo Jehovah Kamuktaindennyo, yaaktaetab mugetut ne bo hekalunnyi.

²⁹ Kuur mwogik tugul kobargei ak Babulon, ichek tugul che riichei kwangok koyiem komoswekyik; amengochilil agot agenge eng’ oloto: yaakyi mugetut ko u boisionikyik; oyachi ko u tugul che kigoyai: amu kigomenji Jehovah, kigomenji Inendet ne Tilil ne bo Israel.

³⁰ Ibutos anyun nerenikyik eng’ ortinwekyik, ak kigochin kosisyo murenikyik tugul che bo luget eng’ betunoto, mwaei Jehovah.

³¹ Keero, aborienen, inyendet ne i menotio, mwaei Kiptaiyat, Jehovah ne bo lugosiek: amu kait betung’ung’, betut ne aityinin biret.

³² Ak koriichgei kobut menotiot, ama mi chi ne ing’eeti inendet: ak anaam mat eng’ nganasokyik, ak kobeel tuguk che mitei komoswekyik.

³³ Mwaei Jehovah ne bo lugosiek ko u ni kole: Kiusei lagokab Israel koboto lagokab Juda: ak kogiich bik tugul che kiluulei ichek; esioi kochunda ichek koba.

³⁴ Kim Katiagindenywa; kainennyi ko Jehovah ne bo lugosiek: ng’alaldochin inendet ichek komie, si kobiit kogochi kamuung’et ng’ony, ak koiim bik che menyei Babulon.

³⁵ Mi rotwetab chok baragutab Kaldeik, mwaei Jehovah, ak eng’ bik che menyei Babulon, ak eng’ bounikyik, ak eng’ bikyik che ng’omen.

³⁶ Mi rotwetab chok baragutab bik che ichaugei, si koberberitu: mi rotwetab chok baragutab bikyik che nyigonen, ak koarogenso ichek.

³⁷ Mi rotwetab chok baragutab mbartanyisiekwak, ak eng’ karisiekwak che bo luget, ak eng’ baragutab bik tugul che kiburuigei che mi koboto inendet, ak koigei ichek kwonyik: mi rotwetab chok baragutab konoraikyik, ak kereb choto.

³⁸ Tebe kemeut baragutab ainosiekyik, ak kotenyo: amu emonito ko emetab kanamonik che kigiwai, ak kigoyai kanamonikwak ichek koek kibion.

³⁹ Menyei anyun oloto tiong’ikab ong’atet koboto suik, ak komeny tiong’ikab songolik oloto: ama kimenyei oloto koigeny; ama kimenyei koboch ibinda age agoi ibinda age.

⁴⁰ Ko u ye kigabui Kamuktaindet Sodom ak Gomora ak nganasok che ki negite oloto, mwaei Jehovah; u noto anyun mamenyei chi oloto, ama tebe oloto lakwa ne bo chi.

⁴¹ Ogeero, bunu bik murot ne bo katam; koboto bororiet ne o, ak king’eeti laitorinik che chang’ che bunu komoswek che looen che bo ng’ony.

⁴² Tinyei kwangok ak ng’otwek; kolgolen, ama tinyei rirenet; morori ko u nyanjet, ak lanyei mbartanyisiek; chobot age tugul ko u chito ne wendi luget, kobokyinin, ee cheptab Babulon.

⁴³ Kigogas laitoriatab Babulon kalosunenywa, ak nyaluldos eunekyik: kanam inendet bichiindo, ak ng’wanindo ko u ne bo kwondo ne machei kosigis.

⁴⁴ Ogeero, togosu inendet ko u ng’etundo kobunu Jordan ko kanyi beek mising’ kobargei ak meng’otet ne kim: ago achee aone komwei inendet: ak age tugul ne kileweni, agochini koboi inendet: amu ng’o ne kegerge, ak ko ng’o ne ng’atwa betut? Ak ko ng’o mestowot ne tononi eng’ tainnyu?

⁴⁵ Ogas anyun kiruogetab Jehovah, ne kigoyachi Babulon; ak chobutikyik che kigochob agobo emetab Kaldeik: ichuuti ichek iman, agot che mengechen che bo akwetab kechirek; yaei iman meng’otenywa koek karatia agobo ichek.

⁴⁶ Botani ng’ony eng’ cheetab luget ne kiluule Babulon, ak kigasei waagandenywa eng’ bororiosiek.