JEREMIA 5 - BUKUIT NE TILIL

Tengekwogikab Jerusalem ak kit ne biityin

¹ Oruaate ortinwekab Jerusalem si ogeer, ak onai, ak ocheng’ eng’ komoswekyik che baraen, ngot omuchi onyoru chi, ngot komi ne yaei imanda, ne cheng’ei imanit; si kobiit anyochi kaat nganasanato.

² Agot ngo mwaei ichek kole, Ko u ye sobei Jehovah; koyostos iman eng’ lembechek.

³ Ee Jehovah, tos mageerei konyeguk imanit? Kiibir ichek, ago ma arogenso; kiigesu ichek, ago kiesio kotaach kotigonet: kiiuuiit ichek togochikwak kosiir ruandet; kiesio koweek.

⁴ Yeityo amwa ale, Nyalulyotin iman bichuto; berberen; amu manaei oretab Jehovah, anan kiruogetab Kamuktaindenywa:

⁵ awendi oldab bik che eechen, ak ang’alalji ichek; amu ingen icheget oretab Jehovah, ak kiruogetab Kamuktaindenywa. Ago kigoiri chu ka bo tai chogit kibagenge, ak kong’eti ratutik.

⁶ Barei anyun ichek ng’etundo ne mong’une osnet, barei ichek suiyot ne bo ong’atet, sapchin cheblanget nganasokwak, kitonatoni age tugul ne mong’u eng’ oloto: amu chang’ bistaosiekwak, ak kigotesak kachuchugenywa bo ge.

⁷ Amuktoi ano anyoun kaat? Kigometa lagoguk, ak kigiyosio agobo kanamonik che ma cheptalelisiek: kingo kaabai kobiyong’so, koyai ibetab ge, ak koyumjinotgei gorikab chepkugonik.

⁸ Kiu ichek mbartanyisiek che kagobiyong’so karon: kiitei age tugul eng’ maget agobo osotiotab chitab kokwennyi.

⁹ Tos manyone abire agobo tuguchuto? Mwaei Jehovah; ak tos mayaaktochinige mugetut eng’ bororiet ne u ni?

¹⁰ Otogoste irimoikyik, ak ong’em; ago mong’em ogesu: oiste temenikyik: amu ma bo choto Jehovah.

¹¹ Amu kigoberbera mising’ gotab Israel ak gotab Juda, mwaei Jehovah.

¹² Kigotiiyo bichoto Jehovah, ak kole, Ma inendet; ama ityinech yaitiet; ama kigeere rotwetab chok anan rubet:

¹³ ak koek maotik usonet, ama mi ng’olyot eng’ orinywa: kiyachin ko u noto.

¹⁴ Mwaei anyun Jehovah, Kamuktaindet ne bo lugosiek, ko u ni, kole, Amu omwae ng’olyondoni, ogeero, ayae ng’alekyuk eng’ kuting’ung’ koek mat, ak koek bichu kwenik, si kobeel maata ichek.

¹⁵ Ogeero, amutwok bororiet ne bunu ole loo, ee gotab Israel, mwaei Jehovah: bororiet ne kim, bororiet ne bo keny mising’, bororiet ne mengen kutinnyi, ameguitosi kit ne mwaei.

¹⁶ Kererit ne yatat motienywa, kimen bichoto tugul.

¹⁷ Ak koam beguk, ak amitwogiguk, che kita nyoljin koam weriguk ak tibiguk: ak koam ichek kechireguk ak akwotisieguk: amei ketiguk che bo sabibuk ak mogooniguk: ak kobut eng’ rotwetab chok nganasoguk che ng’ototin, che imang’u.

¹⁸ Ago mwaei Jehovah kole, Agot eng’ betusiechoto, ko mageswok.

¹⁹ Ak ye tun omwae ole, Amu nee si koyaiywech Jehovah Kamuktaindennyo tuguchuto tugul? Ilenji anyun, Ko u ye kiometa, ak oot kanamonik che ter eng’ emeng’wong’, oote ko u noto toek eng’ emet ne ma neng’wong’.

²⁰ Omwaite nito eng’ gotab Jakobo, ak obarte eng’ Juda, ole,

²¹ Ogas ni anyun, ee okwek bik che berber, che motinye kaguiyet; che otinye konyek, amogeertoe; che otinye itik, amogastoe:

²² Tos moiywea? Mwaei Jehovah: tos mobotandosi eng’ tainnyu, ane ne kiande ng’aniek koek kiwotetab nyanjet, eng’ ng’atutiet ne tebyei agoi, ne maimuchi nyanjet kosiir? Ak agot ngo mildoegei beek mising’, ko maimuchi kotil kiy; agot ngo moror, ko maimuchi kosiir.

²³ Ago tinyei bichu muguleldo ne bo bistoet ak ngelelnatet; kigobistoe ak koba.

²⁴ Ama mwaei eng’ mugulelwekwak kole, Ongiywei anyun Jehovah Kamuktaindennyo, ne konu ropta, ne bo tai ak ne bo let, eng’ betusiekyik; ne ribwech wigisiek che kiging’at che bo kesisiet.

²⁵ Kigowal tengekwogikwok tuguchuto, ak kigoetenak tengekwogikwok mieindo.

²⁶ Amu kinyorjin bikyuk bik che yaachen: ripsei ko u ye ripsei namikab taritik; richei mestet, namei bik.

²⁷ Ko u ye nyiie taritik kirogoret, ko u noto nyiitotin gorikwak ng’alset: kieegitu anyun amu noto, ak koek magorek.

²⁸ Kigonerio mising’, iluu: ee, siirtootin ichek eng’ boisionikab sogornatet: mairuochi, maibesiechin ne matinyei kwanda, si kobiit kiberur; ama iruoksechin komie che bonondos.

²⁹ Tos manyone abire agobo tuguchuto? Mwaei Jehovah; tos mayaaktochinige mugetut eng’ bororiet ne u ni?

³⁰ Kogobiit kit ne bo kwong’et ak ko samis kot eng’ emet:

³¹ Maoteni maotik lembeita, ak bou tisiik ko u magetab maotik; ak chamei bikyuk koteeb ko u noto: oyae nee anyun eng’ kagesunetab tuguchuto?