JEREMIA 49 - BUKUIT NE TILIL

Ng’alekab maoinatet agobo Amon

¹ Ng’alekab lagokab Amon: Mwaei Jehovah ko u ni kole: Tos matinyei Israel werik? Matinyei ne namei tugukyik? Amu nee anyun si konam Malkam Gad kobunji, ak komeny bikyik nganasokyik?

² Ogeer anyun-o, bwanei betusiek, mwaei Jehovah, ne aibu waagatab luget kegas agobo Raba ne bo lagokab Amon; ak koek karatia ne irurugot, ak kebeel tibikyik: konam anyun Israel kobunji, ichek che kiga konam inendet, mwaei Jehovah.

³ Waach, ee Hesbon, amu kageluul Ai; oririe, okwek tibikab Raba, ogermenege kuniok: oteiye, ak oruaate eng’ ng’otonok; amu kiluulei Malkam, koboto tisiikyik ak bounikyik.

⁴ Amu nee anyun si itororge eng’ atebwosiek, atebweng’ung’ ne rootei, ee chepto ne ichuchuchege let? Ne kiimang’u konoraikyik, ilen, Nyonjina ng’o?

⁵ Ogeero, aibun kaiyweisiet, mwaei Kiptaiyat, Jehovah ne bo lugosiek, eng’ ichek tugul che mi tabanweguk; ak keonak, komanda chi age tugul, ama biitu chi ne iyumi inendet ne ombenoti.

⁶ Ago ye ibata aweegu kogeny che kigeluul che bo lagokab Amon, mwaei Jehovah.

Ng’alekab maoinatet agobo Edom

⁷ Ng’alekab Edom: Mwaei Jehovah ne bo lugosiek ko u ni, kole: Tos ma komi ng’omnatet eng’ Teman? Tos kigobet kiruoget eng’ che ng’omen? Tos kigobek ng’omnatenywa?

⁸ Omwei, oweege, oung’ege ole ma toogu, ee okwek che omenye Dedan; amu aipchini inendet nyalildab Esau, eng’ betut ne aityini inendet biret.

⁹ Ngot kobwanjin kayumikab sabibuk, ko tos mabagachi turonikab sabibuk? Ngot kobwanjin chorik kemoi, ko tos mabarisiei kot konyor che yamei?

¹⁰ Ago kiayai Esau koek ne matinyei kiy, kiang’any komoswekyik che bo ung’ot, ama komuchi kounygei: kigeng’em iyotennyi, ak tupchosiekyik, ak bikab kokwennyi, ama komi inendet.

¹¹ Bagakte lagoguk che matinyei kwanisiek, si arib kosopcho; ak ingomang’wa mosogiguk.

¹² Amu mwaei Jehovah ko u ni kole: Ogeero, eeisei iman che kima ko nenywa koeeise kikombet; ak tos i ne chilili si ma kibirin? Mechilili, kibirin, ago iee iman.

¹³ Amu kiayosiechige, mwaei Jehovah, ale, Egu Bosra ne kikwong’e; ne kichotei, ak karatia, ak ne kisasei; ak koek nganasokyik tugul karatwek kotugul.

¹⁴ Koagas ng’alek che bunu Jehovah, ak kagiyokto chito kwo bororiosiek, kolenji, Oyumge, ak obokyi, ak ong’eetye oyai luget.

¹⁵ Amu, keero, kiayain iegu ne ming’in eng’ bororiosiek, ak iegu ne sasei bik.

¹⁶ Ago kigoberberin menotetab muguleldang’ung’, amu kamuiseng’ung’, ee inye ne imenye ole kibetak eng’ ruandet, ne iname walitab tulwet: nganda iteeche kesweng’ung’ eng’ barak ko u kipsichit, arorogun eng’ oloto, mwaei Jehovah.

¹⁷ Ak egu Edom ne kikwong’e: kwong’ei age tugul ne siirtoi eng’ yoto, ak koreny korotwekyik tugul.

¹⁸ Ko u ye kigigabui Sodom ak Gomora ak nganasok che ki negite oloto, mwaei Jehovah, mamenyei chi oloto, ama tebe oloto lakwa ne bo chi.

¹⁹ Ogeero, togosu inendet ko u ng’etundo kobunu Jordan ko kanyi beek mising’ kobargei ak meng’otet ne kim: ago achee, aone komwei inendet; ak age tugul ne kileweni, agochini koboi inendet: amu ng’o ne kegerge? Ak ng’o ne ng’atwa betut? Ak ng’o mestowot ne tononi eng’ tainnyu?

²⁰ Ogas anyun kiruogetab Jehovah ne kigoyachi Edom; ak chobutikyik che kigochob agobo bik che menyei Teman: ichuuti ichek iman, che mengechen che bo akwetab kechirek; yaei iman meng’otenywa koek karatia agobo ichek.

²¹ Botani ng’ony amu cheetab kabutenywa; mi waagat, ne kegasei cheennyi eng’ Nyanjet ne Birir.

²² Ogeero, togosu inendet ak kotirireni ko u kipsichit, ak kouito kebebaikyik kotokyi Bosra: ak koigei eng’ betunoto mugulelwekab bik che nyigonen che bo Edom, muguleldab kwondo ne tinyei ng’wanindo ye machei kosigis.

Ng’alekab maoinatet agobo Damasko

²³ Ng’alekab Damasko. Kagolilan Hamat, ak Arpad; amu kogogas ng’alek che yaach, kogotanuiso: mi arogenet nyanjet; maimuchi kosis.

²⁴ Kogonyalul Damasko, kawelelgei komwei, kanam inendet botanet: kanam inendet bichiindo ak arogenosiek, ko u kwondo ye machei kosigis.

²⁵ Katepto ano si ma kimeto nganasetab kalosunet, nganasetab boiboiyennyu!

²⁶ Ibutos anyun neranikyik eng’ ortinwekyik, ak kigochin kosisyo murenik tugul che bo luget eng’ betunoto, mwaei Jehovah ne bo lugosiek.

²⁷ Ak anaam mat eng’ irimetab Damasko, ak kobeel gorikab laitoriat, che bo Ben- hadad.

Ng’alekab maoinatet agobo bororioseik alak

²⁸ Ng’alekab Kedar, ak che bo bounatosiekab Hasor, che kibar Nebukadresar laitoriatab Babulon. Mwaei Jehovah ko u ni kole: Ong’eetye, otogoste Kedar, ak oluul lagokab kong’asis.

²⁹ Luulei emaisiekwak ak akwotisiekwak che bo kechirek; ak koluul angokwak kobunji, ak terenikwak tugul, ak tambesikwak: ak kowaakyi, kolenji, Mi kamuiset komosta age tugul.

³⁰ Omwei, oombenote oba ole loo, oung’ege ole ma toogu, ee okwek che omenye Hasor, mwaei Jehovah; amu kairuoch Nebukadresar laitoriatab Babulon agobo okwek, ak kagobwat ng’olyot agobo okwek.

³¹ Ong’eetye, otogoste ole mi bororiet ne tinyei kalyet, ne meng’isiei ama kereri met, mwaei Jehovah: ne matinyei ormarichok anan temeleiywek, che menyei ichegei.

³² Ak keluul tambesikwak, ak koek barunenik tukwak che chang’: ak aiyeste koba komoswek tugul icheget che biori metowekwak; ak aibu nyalildanywa eng’ komoswekwak, mwaei Jehovah.

³³ Ak koek Hasor ole menyei lelwek, ak koek karatia koigeny: mamenyei chi oloto, ama tebe oloto lakwa ne bo chi.

³⁴ Kinyonji ng’olyotab Jehovah maotiot Jeremia agobo Elam eng’ taunetab laitornatetab Sedekia laitoriatab Juda, kolenji,

³⁵ Mwaei Jehovah ne bo lugosiek ko u ni kole: Keero, airie kwangetab Elam, ne o ne bo kamugenywa.

³⁶ Ak aipchi Elam koriswek ang’wan che bunu luukwek ang’wan che bo kipsengwet, ak aiyeste ichek koba koriswechoto tugul; ama biitu bororiet ole maitei che kigion che bo Elam.

³⁷ Ak agochi Elam koarogen eng’ taitab bunikwak, ak eng’ taitab icheget che cheng’ei sobonwekwak: ak aipchi ichek yaitiet, neregekyuk che ng’wonen, mwaei Jehovah; ak ayokte rotwetab chok kosub ichek, kot agesu:

³⁸ ak alum ng’echerennyu ne bo laitornatet eng’ Elam, ak ang’em eng’ oloto laitoriat ak bounik, mwaei Jehovah.

³⁹ Ago aweechi kogeny luulenikab Elam eng’ betusiek che bo let, mwaei Jehovah.