JEREMIA 48 - BUKUIT NE TILIL

Ng’alekab maoinatet agobo Moab

¹ Ng’alekab Moab: Mwaei Jehovah ne bo lugosiek, Kamuktaindetab Israel, ko u ni kole: Bwa eng’ Nebo! Amu kagoek karatia; kagitewer Kiriataim, kageluul: kagitewer Misgab, kagebut.

² Ma komi kalosunetab Moab; kigochob yaitiet eng’ Hesbon agobo emonoto, ne mwaei kolen, Nyo kigesu si ma koegu bororiet kogeny. Agot inye, ee Madmen, kigonin isis; onin rotwetab chok.

³ Kutitab rirek ne bunu Horonaim, luulet ak ng’emisiet ne o!

⁴ Kageng’em Moab; kagoririo lagokyik kot kegas.

⁵ Amu togostoi ole kitogostoe ne bo Luhit koririoti kotugul; amu kigogas bichiindab rirekab ng’emisiet eng’ ole kichortoege ne bo Horonaim.

⁶ Omwei, osoru sobonwekwok, ak oige sondit eng’ ong’atet.

⁷ Amu-i, kiluulin aginye, amu kaimang’u boisioniguk ak konoraiguk: ak keluul Kemos, koboto tisiikyik ak bounikyik.

⁸ Ak nyonjin luulindet nganaset age tugul, ama mi nganaset ne chilili; lusei kogeny atebwet, ak keng’emei warenget; ko u ye kagomwa Jehovah.

⁹ Igochi Moab kebebaik, si kobiit kotiriren komwei: ak koek nganasokyik karatwek, ne mami chi ne menyei.

¹⁰ Chubot inendet ne machuuljingei boisietab Jehovah, ak chubot inendet ne ete rotwennyi bo chok korotik.

¹¹ Kigotebe Moab kalyet koboch ming’inagtennyi, kigotepto kimnatennyi ko u divaik che mi ak misigikyik, che tom kerong’ eng’ teret age koba teret age: ak tomo keluul: ta kotinyei anyun amu noto anyinyindanyi, ak tom kowalak ng’uunennyi.

¹² Ogeer anyun-o, bwanei betusiek, mwaei Jehovah, che ayokyini inendet bik che rong’u, ak koranda inendet; ak korong’ kogesgei eng’ terenikyik, ak kotui sotonikwak.

¹³ Ak kolilan Moab amu Kemos, ko u ye kiililan gotab Israel agobo Bet-el, ne kiimang’u.

¹⁴ Omuktoi ano omwa ole, ki murenik che nyigonen, ak ko ki murenik che kimen eng’ luget?

¹⁵ Kigong’emak Moab, kigotogosta ichek nganasokyik, kigoba barisiet murenikyik che kigilewen, mwaei Laitoriat, ne kainennyi ko Jehovah ne bo lugosiek.

¹⁶ Karikyi Moab nyalildanywa, ak chogu usisiennyi.

¹⁷ Orirji inendet okwek tugul che omi ole negite inendet, ak okwek tugul che ongen kainennyi; omwa ole, Katepto ano si koil siarit ne kim, kirokto ne kararan!

¹⁸ Ee inye chepto ne itebe Dibon, choruge eng’ torornateng’ung’, ak itebi eng’ melelda; amu kagobokyin ng’emindetab Moab, kagong’em irimoiguk.

¹⁹ Ee inye ne imenye Aroer, tonon eng’ oret taban, ak itoben: tebe ne mweei, ak chepto ne chilili; ilenji, Kageyai nee?

²⁰ Kagitewer Moab; amu kagebut: owaach ak oririe; omwaite eng’ Arnon, ole, Kageng’em Moab.

²¹ Ak kagonyonji kiruoget warenget; kanyonji Holon, Jasa, ak Mepaat;

²² ak Dibon, Nebo, ak Bet-diblataim;

²³ ak Kiriataim, Bet-gamul, ak Bet-meon;

²⁴ ak Keriot, Bosra, ak ngnasok tugul che bo emetab Moab, che looen ak che negit.

²⁵ Kageisto kuinetab Moab, ak kagoil eunnyi, mwaei Jehovah.

²⁶ Ogochi inendet kobogit; amu kigotororgei kogirinda Jehovah; ak mildoegei Moab kang’undaekyik, ak kerorechin.

²⁷ Tos maek Israel eng’ inye ne kirorechin? Tos kiginyor komi ak chorik? Amu kotugul ye ing’alali agobo inendet, ilelechi metit.

²⁸ Ee okwek che omenye kebenonik; ak oige cheptuget ne teechei keswennyi eng’ tabanwekab kurgetab kebenet.

²⁹ Kigegas menotetab Moab, kele, menot mising’; kaetetab ge, ak menotennyi, ak kachaunennyi bo ge, ak losennyi bo ge.

³⁰ Angen neregekyik, mwaei Jehovah, ale buch; ma yai kiy kachaunaikyik bo ge.

³¹ Awaache anyun agobo Moab; ee, arirjini mising’ Moab tugul: amu iteeitos ichek agobo bikab Kir-heres.

³² Arirjinin eng’ rirek che siirei che bo Jaser, ee ketitab sabibuk ne bo Sibma: kagolandae nyanjet temeniguk, kiit nyanjetab Jaser: kagonam luuloindet logoeguk che bo kemei, ak ole kitue sabibuk.

³³ Ak kageisto kagasetab ge ak boiboiyet, eng’ mbaret ne rurei kot ak eng’ emetab Moab; ak kaagochi kogesgei divaik eng’ ole kituisie: mami ne tiechei eng’ waagatab kagasetab ge; maegu waagandanato waagatab kagasetab ge.

³⁴ Kagotwek ichek koboch rirekab Hesbon agoi Eleale, kot koit Jahas, koboch Soar agoi Horonaim, agoi Eglat-Selesiya: amu tendos beekab Nimrim.

³⁵ Agesu kogeny eng’ Moab, mwaei Jehovah, inendet ne igoitoi korosek eng’ ole toror, ak inendet ne beeljin nyamdutik kanamonikyik.

³⁶ Cheei anyun muguleldanyu agobo Moab ko u ndurerusiek, ak kocheei muguleldanyu ko u ndurerusiek agobo bikab Kir-heres: kagobetyo anyun chang’indab tuguk che kiga konyor.

³⁷ Amu churat metit age tugul, ak kigetil tamnet age tugul: mi eunek tugul berutik che kigitilei, ak kogermenegei kuniok.

³⁸ Mi kateiyosiek gorik tugul barak che bo Moab ak eng’ komosta age tugul eng’ ortinwekyik: amu kiatui Moab ko u teret ne magiboiboitune, mwaei Jehovah.

³⁹ Kitepto ano si koyie! Iteitoi ano ichek! Katepto ano si kotukta batai Moab eng’ kalilanet! Egu anyun Moab ne kirorechin ak koek ne kwong’e ichek tugul che mi tabanwekyik.

⁴⁰ Amu mwaei Jehovah ko u ni kole, Ogeero, tirireni ko u kipsichit, ak kouito kebebaikyik kotokyi Moab.

⁴¹ Kageluul Keriot, ak kageche irimoikyik, ak koigei mugulelwekab bik che nyigonen che bo Moab, eng’ betunoto, muguleldab kwondo ne tinyei ng’wanindo ye machei kosigis.

⁴² Ak keng’em Moab si ma koegu bororiet, amu kigotororgei kogirinda Jehovah.

⁴³ Kabwanjin kaiyweisiet, ak keringet, ak mestet, ee inye ne imenye Moab, mwaei Jehovah.

⁴⁴ Ibutyin keringet, ne mwee kaiyweisiet; ak konam mestet ne togosune keringet: ak aipchini inendet, noto ko Moab, kenyit ne aityini inendet biret, mwaei Jehovah.

⁴⁵ Tonondos che mweei ama tinyei kimnatet eng’ uruetab Hesbon: amu kamong’une mat Hesbon, ak kamong’une liblibenetab mat, Sihon, ak kagobeel luitab Moab, ak metowekwak barak che bo ichek che boldos.

⁴⁶ Bwa inye, ee Moab! Kagogesgei bikab Kemos: amu kageluul weriguk, ak kageluul tibiguk.

⁴⁷ Ago aweechi kogeny luulenikab Moab eng’ betusiek che bo let, mwaei Jehovah. Te noto anyun kiruogetab Moab.