JEREMIA 47 - BUKUIT NE TILIL

Ng’alekab maoinatet agobo Pilistia

¹ Kinyonji ng’olyotab Jehovah maotiot Jeremia agobo Pilistik, kotomo kobar Parao Gasa.

² Mwaei Jehovah ko u ni kole: Ogeero, Tesoksei beek kobunu murot ne bo katam kot koek kererut ainet ne chwaldoi, ak kochwalda emet ak tugul che mi oloto, nganaset koboto che menyei oloto: ak koririo murenik, ak kowaakyo bik tugul che menyei emet.

³ Ye kas kirgirenetab kelyekab mbartanyisiekab bikyik che kimen, eng’ ruaetab karisiekyik che bo luget, eng’ cheetab kelyekab karisiekyik, magusyin kong’ kwanisiek lagokwak amu nyalulnatetab eunek;

⁴ amu betut ne nyonei koluulei Pilistik tugul, si koisto eng’ Turo ak Sidon toretindet age tugul ne ng’etu: amu luulei Jehovah Pilistik, che king’et che bo ngegutab Kaptor.

⁵ Kanyonji Gasa bosta; kagiges Askelon, che king’et che bo atebwenywa: itilegei kot kotianit?

⁶ Ee, inye rotwetab chok ne bo Jehovah, tianitu si tun isis? Weekyige chogeng’ung’; imuuny, ak isis.

⁷ Imuktoi ano isis, igeere ile kigong’atin Jehovah ibar Askelon, ak ngegutab nyanjet? Kigong’at ko u noto.