JEREMIA 46 - BUKUIT NE TILIL

Ng’alekab maoinatet agobo Misri

¹ Kinyonji maotiot Jeremia ng’olyotab Jehovah agobo bororiosiek.

² Ng’alekab Misri: agobo lugetab Parao-neko laitoriatab Misri, ne kimi ole negite ainet Euprate eng’ Karkemis, ne kibar Nebukadresar laitoriatab Babulon eng’ kenyitab ang’wan ne bo Jeoiakim weritab Josia, laitoriatab Juda.

³ Ochob long’onik che mengech ak che eechen ak orikyi luget.

⁴ Ochob mbartanyisiek ak olany, okwek che olanye mbartanyisiek, ak otononse ko kaolaach chepkuloikwak che bo luget; osit ng’otwek, ak olaach ngoroikab luget.

⁵ Amu nee si ageere ko u noto? Arogendos ak koweechegei let; kagetuatui bikwak che kimen, ak kagomwei kochakta, ama kusegong’: mi kamuiset komosta age tugul, mwaei Jehovah.

⁶ Amat komwei ne chepcheb, anan kochilil chito ne nyigan; kigonach ge ak kobutyo eng’ murot ne bo katam eng’ ole negite ainetab Euprate.

⁷ Ng’o ni ng’eetei ko u Nael, ne wasegei beekyik ko u ainosiek?

⁸ Ng’eetei Misri ko u Nael, ak wasegei beekyik ko u ainosiek: ak len, Ang’eete ak atuch emet; ang’eme nganaset ak bik che menyei oloto.

⁹ Otogoste, okwek, mbartanyisiek; ak ochakte okwek, karikab luget; ak ingoba bik che nyigonen: Kus ak Put, che tinyei long’onik; ak Ludik, che tinyei kwangok ak kong’iei.

¹⁰ Amu bo betunoto Kiptaiyat, Jehovah ne bo lugosiek, betutab yaaktaetab mugetut, si koyaaktochi inendet mugetut eng’ bunikyik: ak koamis rotwetab chok ak kobiyo, ak koeei korotikwak kobiyo: amu tinyei Kiptaiyat, Jehovah ne bo lugosiek, tiseiywot eng’ emetab murot ne bo katam ole negite ainetab Euprate.

¹¹ Togoste Gilead ak iib mwanik che kinyaise, ee bergeiyandani, cheptab Misri: iboisie kerichek che chang’ buch; mesobe.

¹² Kigogas bororiosiek agobo tewernateng’ung’, ak kigonyi emoni rireguk: amu kagonach chito ne nyigan ne nyigan, kagobutyo tuwai.

¹³ Ni ng’olyot ne kimwachi Jehovah maotiot Jeremia, kole, nyonei Nebukadresar laitoriatab Babulon ak kobar emetab Misri.

¹⁴ Omwaite eng’ Misri, ak obarte eng’ Migdol, ak obarte eng’ Nop ak eng’ Tapanes: olenji, Otononse, ochopge; amu kagoamis rotwetab chok eng’ tabanweguk.

¹⁵ Amu nee si kibukto cheguk che kimen? Ma tononso, amu kion Jehovah.

¹⁶ Kiriich che chang’, ee, kiibutyi age baragutab age: ak kile, Ong’eetye, ongebe kogeny oldab bikyok, agoi emet ne kigisikyinech kemwee rotwetab chok ne usisiei.

¹⁷ Kiwaakyo eng’ oloto, kole, Bolatet kityo Parao laitoriatab Misri; kigobagakta kosiirto betut ne kiga kichob.

¹⁸ Mwaei Laitoriat ne kainennyi ko Jehovah ne bo lugosiek, kole, Ko u ye asobe, nyonei iman inendet ko u Tabor eng’ tulonok, ak ko u Karmel eng’ ole negite nyanjet.

¹⁹ Ee inye chepto ne imenye Misri, monorsechige si iwe keluulin: amu egu Nop karatia, ak kebeel, ama mi chi ne menyei.

²⁰ Roriat ne kararan mising’ Misri; ago kagonyo ng’emisiet ne bunu murot ne bo katam, kagonyo.

²¹ U kogeny bikyik che kesirei che mi kwenunnyi moek che neriotin; amu kagoweeigei let agichek, kagomwei tugul, ma tononso: amu kanyonji ichek betutab nyalildanywa, betut ne kibirei.

²² Wendi kutinnyi ko u erenet; amu bendi ak luget, ak kobokyine inendet aonok, ko u bik che ebei ketik.

²³ Iluuli osnennyi, mwaei Jehovah, agot ngo magimuchi kisiach; amu chang’ kosiir chereng’enyinik, ama iitoksei.

²⁴ Kiteweri cheptab Misri; kindoi eutab bikab murot ne bo katam.

²⁵ Mwaei Jehovah ne bo lugosiek, Kamuktaindetab Israel, kole: Ogeero, abire Amon ne bo No, ak Parao, ak Misri, koboto cheptalelisiekyik, ak laitorinikyik; choto ko Parao ak icheget che imang’u inendet:

²⁶ ak andoi ichek eutab icheget che cheng’ei sobonwekwak, ak eutab Nebukadresar laitoriatab Babulon, ak eutab otwogikyik; ye ibata kemeny ko u betusiek che bo keny, mwaei Jehovah.

²⁷ Ago meiywei, ee Jakobo otwogindennyu, anan iarogen, ee Israel; amu, keero, asorun eng’ ole loo, ak asoru iyoteng’ung’ eng’ emet ne kigiluulji; ak koweek Jakobo, ak komuuny ak kotebe kalyet, ama mi chi ne imui.

²⁸ Ameiywei, ee Jakobo otwogindennyu, mwaei Jehovah; amu ami koboten: amu agesu bororiosiek tugul che kigaonjin, ago magesun; ago atigonin eng’ kiruoget, amabagaktoin ama kibirin.