JEREMIA 43 - BUKUIT NE TILIL

Kibistoe Israelik Ng’olyondonoto bo Jehovah, ak koba Misri

¹ Ak ye kingo kagoges Jeremia ng’alalet ne king’alaljin bik tugul ng’alek tugul che bo Jehovah Kamuktaindenywa, che kiga koyoktae Jehovah Kamuktaindenywa inendet komwachi ichek ng’alechato tugul,

² komwa anyun Asaria weritab Hosaia, ak Johanan weritab Karea, ak bik tugul che meniotin, kolenji Jeremia, Imwae lembech: ma iyogun Jehovah Kamuktaindennyo inyo imwa ile, Mobendi Misri otebe oloto:

³ ago kaiberberin Baruk weritab Neria si kogirindech, si kobiit kondeech eutab Kaldeik, si kobarech, ak komutech kebe Babulon keegu luulenik.

⁴ Ma kas it anyun kutitab Jehovah Johanan weritab Karea, ak kiptainik tugul che bo lugosiek, ak bik tugul, si kobiit komeny emetab Juda.

⁵ Ago kiimut Johanan weritab Karea ak kiptainik tugul che bo lugosiek bik tugul che king’et che ki bo Juda, che kiweeksei kobunu bororiosiek tugul ole kiga kionji, kobwa kotebe Juda;

⁶ murenik, ak kwonyik, ak lagok ak tibikab laitoriat, ak chi age tugul ne kiga kobagach Nebusaradan kiptaiyatab ribik kobagakyi Gedalia weritab Aikam, weritab Sapan, ak maotiot Jeremia, ak Baruk weritab Neria;

⁷ ak kiit emetab Misri; amu kima kas it kutitab Jehovah: ak kibwa agoi Tapanes.

Kosib kemwau katerteret ne kiterteri Misri

⁸ Yeityo konyonji ng’olyotab Jehovah Jeremia eng’ Tapanes, kolenji,

⁹ Nam koik che eechen, ak iung’e matabaruk orit eng’ ole kiyae matabaruk, ne mi ole kibunei kebendi gotab Parao eng’ Tapanes, kogeerei bikab Juda;

¹⁰ ak ilenji ichek, Mwaei Jehovah ne bo lugosiek, Kamuktaindetab Israel, ko u ni kole: Ogeero, ayoktoi kimut Nebukadresar laitoriatab Babulon, otwogindennyu, ak ande ng’echerennyi ne bo laitornatet baragutab koichu kaauny; ak koiitae baragutab koichato emainnyi ne bo laitornatet.

¹¹ Ak konyo kobar emetab Misri; che bo meet kobendi meet, ak che bo luulet, kobendi luulet, ak che bo rotwetab chok, kobendi rotwetab chok.

¹² Ak alaal mat eng’ gorikab kanamonikab Misri; ak kobeel inendet kanamonichoto, ak koib: ak kolaach emetab Misri, ko u ye ilaachi mestowot ngoriennyi; ak kwo eng’ oloto eng’ kalyet.

¹³ Butei kogeny tolochikab Bet-semes, ne mi emetab Misri; ak kobeel gorikab kanamonikab Misri.